ନୂଆଦିଲ୍ଲୀ: ଭାଟିକାନ ସିଟି ପୋପ୍ ଫ୍ରାନ୍ସିସ୍ଙ୍କ ଦେହବସାନ ପରେ ପ୍ରଥମ ଥର ପାଇଁ ଫଟୋ ଜାରି କରିଛି। ଯେଉଁଥିରେ ତାଙ୍କୁ କାଠ ଶବାଧାରରେ ରଖାଯାଇଛି ଏବଂ ଭାଟିକାନ ସେକ୍ରେଟାରୀ ଅଫ୍ ଷ୍ଟେଟ୍ ତାଙ୍କ ପାଇଁ ପ୍ରାର୍ଥନା କରୁଥିବା ନଜରକୁ ଆସିଛନ୍ତି। ୮୮ ବର୍ଷୀୟ ପୋପ୍ ଫ୍ରାନ୍ସିସ୍ ସୋମବାର ଦିନ ଷ୍ଟ୍ରୋକ୍ ଓ ହୃଦ୍ଘାତ ଯୋଗୁ ମୃତ୍ୟୁବରଣ କରିଥିଲେ। ଭାଟିକାନ ଘୋଷଣା କରିଛି ଯେ ତାଙ୍କ ଅନ୍ତିମ ସଂସ୍କାର ଶନିବାର ସକାଳ ୮ଟା (ସ୍ଥାନୀୟ ସମୟ)ରେ ସେଣ୍ଟ ପିଟର୍ସ ବାସିଲିକାରେ ଅନୁଷ୍ଠିତ ହେବ।
ମଙ୍ଗଳବାର ପ୍ରକାଶିତ ଫଟୋରେ ପୋପ୍ ଫ୍ରାନ୍ସିସ୍ଙ୍କୁ ତାଙ୍କ ଫାଦର ପୋଷାକରେ ସଜ୍ଜିତ କରାଯାଇ ସାନ୍ତା ମାର୍ଟା ଆବାସର ଚାପେଲ୍ରେ ରଖାଯାଇଥିବା ଦେଖାଯାଇଛି। ସେ ତାଙ୍କ ୧୨ ବର୍ଷର ପୋପ୍ କାର୍ଯ୍ୟକାଳ ମଧ୍ୟରେ ରହୁଥିଲେ। ତେବେ ଶବାଧାରର ଉଭୟ ପାର୍ଶ୍ୱରେ ସୁଇସ୍ ଗାର୍ଡମାନେ ଛିଡ଼ା ହୋଇଥିବା ଦେଖାଯାଇଛି। କାର୍ଡିନାଲମାନେ ନିଷ୍ପତ୍ତି ନେଇଛନ୍ତି ଯେ ବୁଧବାର ସକାଳୁ ସେଣ୍ଟ ପିଟର୍ସ ବାସିଲିକାରେ ସାଧାରଣ ଲୋକଙ୍କ ଦର୍ଶନ ପାଇଁ ଶବାଧାର ରଖାଯିବ। ଯେଉଁଠି ସମସ୍ତେ ତାଙ୍କର ଶେଷ ଦର୍ଶନ କରିପାରିବେ।
ପୋପ୍ ଫ୍ରାନ୍ସିସ୍ଙ୍କ ଦେହବସାନ ପରେ ପୁରାତନ ରୀତି ଅନୁସରଣ କରାଯାଇଛି। ଯେଉଁଥିରେ ତାଙ୍କ ଫିଶରମ୍ୟାନ୍ସ ରିଙ୍ଗ୍ ଏବଂ ଲେଡ୍ ସିଲ୍ ଭାଙ୍ଗି ଦିଆଯାଇଛି, ଯାହା ଅନ୍ୟ କେହି ବ୍ୟବହାର କରିପାରିବେ ନାହିଁ। ସୋମବାର ସନ୍ଧ୍ୟାରେ ସେଣ୍ଟ ପିଟର୍ସ ସ୍କ୍ୱାୟାରରେ କାର୍ଡିନାଲ ମାଉରୋ ଗାମ୍ବେଟି ପ୍ରାର୍ଥନା କାର୍ଯ୍ୟକ୍ରମରେ ନେତୃତ୍ୱ ନେଇ କହିଥିଲେ, "ଆମେ ପୋପ୍ ଫ୍ରାନ୍ସିସ୍ଙ୍କ ଆପୋଷ୍ଟୋଲିକ ସେବା ମାଧ୍ୟମରେ ସମଗ୍ର ଚର୍ଚ୍ଚକୁ ପ୍ରଭୁଙ୍କ ଦେଇଥିବା ଉପହାର ପାଇଁ ଧନ୍ୟବାଦ ଜଣାଉଛୁ।"
ଚଳିତ ବର୍ଷ ଆରମ୍ଭରେ ପୋପ୍ ଫ୍ରାନ୍ସିସ୍ ଡବଲ୍ ନିମୋନିଆରେ ପୀଡ଼ିତ ହୋଇ ପାଞ୍ଚ ସପ୍ତାହ ଯାଏ ହସ୍ପିଟାଲରେ ରହିଥିଲେ। ପ୍ରାୟ ମାସେ ତଳେ ସେ ଭାଟିକାନକୁ ଫେରିଥିଲେ ଏବଂ ଇଷ୍ଟର ସନ୍ଡେରେ ସେଣ୍ଟ ପିଟର୍ସ ସ୍କ୍ୱାୟାରରେ ସାର୍ବଜନୀନ ଉପସ୍ଥିତି ଦେଖାଇ ସୁସ୍ଥ ହେଉଥିବାର ସଙ୍କେତ ଦେଇଥିଲେ।
ଅନ୍ତିମ ସଂସ୍କାରରେ ବିଶ୍ୱର ବିଭିନ୍ନ ନେତାଙ୍କ ଯୋଗଦାନ ଆଶା କରାଯାଉଛି। ଯେଉଁମାନଙ୍କ ମଧ୍ୟରେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଆର୍ଜେଣ୍ଟିନାର ରାଷ୍ଟ୍ରପତି ଜାଭିଅର ମିଲେଇ ଅନ୍ୟତମ। ଟ୍ରମ୍ପ ଓ ପୋପ୍ ଫ୍ରାନ୍ସିସ୍ ଅଭିବାସନ ପ୍ରସଙ୍ଗରେ ବାରମ୍ବାର ମତପାର୍ଥକ୍ୟ ଦେଖାଇଥିଲେ। ପୋପ୍ ଫ୍ରାନ୍ସିସ୍ ତାଙ୍କ କାର୍ଯ୍ୟକାଳ ମଧ୍ୟରେ ଗରିବ ଓ ଉପେକ୍ଷିତଙ୍କ ପାଇଁ କାମ କରିଥିଲେ।
ପୋପ୍ ଫ୍ରାନ୍ସିସ୍ ନିଜେ ନିର୍ଦ୍ଦେଶ ଦେଇଥିଲେ ଯେ ତାଙ୍କ ଅନ୍ତିମ ସଂସ୍କାରର ଖର୍ଚ୍ଚ ଜଣେ ଦାତାଙ୍କ ଦ୍ୱାରା ପ୍ରଦାନ କରାଯିବ। ଯାହାକୁ ସେ ପାପାଲ ବାସିଲିକା ଅଫ୍ ସେଣ୍ଟ ମେରୀ ମେଜରକୁ ହସ୍ତାନ୍ତର କରିବାକୁ ବ୍ୟବସ୍ଥା କରିଥିଲେ। ତାଙ୍କ ଇଚ୍ଛାନୁସାରେ, ସେ ସେଣ୍ଟ ପିଟର୍ସ ବାସିଲିକା ନୁହେଁ, ବରଂ ରୋମ୍ର ସାନ୍ତା ମାରିଆ ମାଜିଓରେ ସମାଧିସ୍ଥ ହେବେ।
ଭାଟିକାନ ପକ୍ଷରୁ ରୋମ୍ରେ ଥିବା ସମସ୍ତ କାର୍ଡିନାଲଙ୍କୁ ଅନ୍ତିମ ସଂସ୍କାର ବ୍ୟବସ୍ଥା ନେଇ ଆଲୋଚନା ପାଇଁ ସକାଳ ୯ଟାରେ ଏକତ୍ରିତ ହେବାକୁ ନିମନ୍ତ୍ରଣ କରାଯାଇଛି। ଏହି ସମୟରେ କାର୍ଡିନାଲମାନେ ଚର୍ଚ୍ଚର ଦୈନଦିନ କାର୍ଯ୍ୟ ଓ ନୂଆ ପୋପ୍ ନିର୍ବାଚନ ପୂର୍ବରୁ ସ୍ଥିତି ପରିଚାଳନା କରିବେ।
