ନୂଆଦିଲ୍ଲୀ,୦୮/୦୭: ଆମେରିକାର ଆଟଲାଣ୍ଟାରେ ମର୍ମନ୍ତୁଦ ସଡ଼କ ଦୁର୍ଘଟଣା । ମିନି ଟ୍ରକ୍ ସହ ଧକ୍କ ହୋଇ ଜଳିଗଲା କାର୍ । ଏହି ଛାତିଥରା ଦୁର୍ଘଟଣାରେ କାର୍ଟି ସମ୍ପୂର୍ଣ୍ଣ ଭାବେ ଜଳିଯାଇଛି । ଫଳରେ ଗୋଟିଏ ପରିବାରର ୪ଜଣ ଜୀବନ୍ତ ଦଗ୍ଧ ହୋଇଛନ୍ତି । ତେବେ ମୃତକମାନେ ହାଇଦ୍ରାବାଦର ବୋଲି ଜଣାପଡ଼ିଛି ।
ସୂଚନା ମୁତାବକ, ମୃତ ତେଜସ୍ୱିନୀ ଏବଂ ଶ୍ରୀଯୁକ୍ତ ଭେଙ୍କଟ ଓ ସେମାନଙ୍କର ଦୁଇ ପିଲା ଡାଲାସରୁ ଛୁଟି ସମୟରେ ଆଟଲାଣ୍ଟାରେ ଥିବା ସମ୍ପର୍କୀୟଙ୍କୁ ଭେଟିବାରୁ ଯାଇଥିଲେ। ଗୋଟିଏ ସପ୍ତାହ ପରେ, ଆଟଲାଣ୍ଟାରୁ ଡାଲାସ ଫେରୁଥିବା ସମୟରେ, ମଧ୍ୟରାତ୍ରିରେ ସେମାନଙ୍କ କାର୍ ଦୁର୍ଘଟଣାଗ୍ରସ୍ତ ହୋଇଥିଲା। ସ୍ଥାନୀୟ ପୋଲିସର ସୂଚନା ଅନୁଯାୟୀ, ରାସ୍ତାର ଭୁଲ୍ ପାର୍ଶ୍ୱରେ ଯାଉଥିବା ଏକ ମିନି ଟ୍ରକ୍ ସେମାନଙ୍କ କାର୍ ସହିତ ଧକ୍କା ଦେଇଥିଲା। ଦୁର୍ଘଟଣା ପରେ କାରରେ ନିଆଁ ଲାଗିଯାଇଥିଲା । ଏଥିରେ ଥିବା ଗୋଟିଏ ପରିବାର ଚାରିଜଣ ଜୀବନ୍ତ ଦଗ୍ଧ ହୋଇଛନ୍ତି ।
ସେପଟେ ଏହି ଘଟଣାର ଖବର ପାଇ ପରିବାରରେ ଶୋକଛାୟା ଖେଳିଯାଇଛି । ପ୍ରକାଶ ଥାଉକି, ମେ' ୧୦ ତାରିଖରେ ନ୍ୟୁୟର୍କରେ ଏକ ସଡ଼କ ଦୁର୍ଘଟଣାରେ ଦୁଇଜଣ ଭାରତୀୟ ଛାତ୍ରଙ୍କ ମୃତ୍ୟୁ ହୋଇଥିଲା। କ୍ଲିଭଲ୍ୟାଣ୍ଡ ଷ୍ଟେଟ୍ ୟୁନିଭରସିଟିରେ ପଢ଼ୁଥିବା ଦୁଇ ଭାରତୀୟ ଛାତ୍ର ୨୦ ବର୍ଷୀୟ ମାନବ ପଟେଲ ଏବଂ ୨୩ ବର୍ଷୀୟ ସୌରଭ ପ୍ରଭାକର -ନ୍ୟୁୟର୍କରେ ଏକ କାର ଦୁର୍ଘଟଣାରେ ମୃତ୍ୟୁବରଣ କରିଥିଲେ।
