ବାହାଡ଼ା ଝୋଲା, ୨୮/୦୫ : ନୟାଗଡ଼ ଜିଲ୍ଲା ନୂଆଗାଁ ବ୍ଲକ ଅନ୍ତର୍ଗତ ୫୭ନଂ ଜାତୀୟ ରାଜପଥ ମହିପୁରୁ ଠାରୁ ବାହାଡ଼ା ଝୋଲା ପୂର୍ତ୍ତ ବିଭାଗ ରାସ୍ତାର ଉନ୍ନତୀକରଣ କାମରେ ଅହେତୁକ ବିଳମ୍ଵ। ତିନି ବର୍ଷ ତଳେ କାର୍ଯ୍ୟ ଆରମ୍ଭ ହୋଇଥିଲେ ବି ଏପର୍ଯ୍ୟନ୍ତ ସରୁନି। ବାରମ୍ଵାର ଅଭିଯୋଗ ସତ୍ତ୍ଵେ ରାସ୍ତା କାମ ଆଗୋଉନି। ପ୍ରତିଶୃତି ପାଲଟିଛି ପାଣିର ଗାର। ତୁରନ୍ତ ରାସ୍ତା ନିର୍ମାଣ ଦାବିରେ ବୁଧବାର ପୁଣି ଥରେ ରାସ୍ତାକୁ ଓହ୍ଲାଇଲେ ଗାତେରୀ ଗ୍ରାମବାସୀ। ରାସ୍ତାରେ ଶଗଡ଼ ଥୋଇ କଲେ ପ୍ରତିବାଦ।
ସୂଚନା ଥାଉକି, ରାସ୍ତା ନିର୍ମାଣ ଦାବିରେ ଗତ ୨୧ ତାରିଖରେ ଗାତେରୀ ଗ୍ରାମବାସୀ ରାସ୍ତାରୋକ କରିଥିଲେ। ପୂର୍ତ୍ତ ବିଭାଗ ଜେଇ ଦୁଇଦିନ ମଧ୍ୟରେ କାର୍ଯ୍ୟ ଆରମ୍ଭ କରିବା ପାଇଁ ପ୍ରତିଶୃତି ଦେଇଥିଲେ। କିନ୍ତୁ ରାସ୍ତା କାମରେ ବିଳମ୍ବ ହେବାରୁ ଆଜି ପୁଣି ଥରେ ଗ୍ରାମବାସୀ ରାସ୍ତାରେ ଶଗଡ଼ ଥୋଇ ପ୍ରତିବାଦ କରିଛନ୍ତି। ଖବର ଲେଖାହେବା ପର୍ଯ୍ୟନ୍ତ ମହିପୁରୁ ପୋଲିସ ଅତିରିକ୍ତ ତହସିଲଦାର ଓ ପୂର୍ତ୍ତ ବିଭାଗ ଜେଇ ଉପସ୍ଥିତ ରହିଛନ୍ତି। ରାସ୍ତାରୋକ ଜାରି ରହିଛି। ପୂର୍ତ୍ତ ବିଭାଗ ଜେଇଙ୍କୁ ପଚାରିବାରୁ ବର୍ଷା ଯୋଗୁଁ ପିଚୁ ପଡ଼ିପାରୁ ନଥିବା କହିଛନ୍ତି।
