ନୂଆଦିଲ୍ଲୀ: ଜଣେ ମହିଳାଙ୍କ ଅତ୍ୟାଚାର ଓ ବ୍ଲାକମେଲର ଶିକାର ହୋଇ ଜଣେ ୨୭ ବର୍ଷିୟ ଯବାନ ନିଜେ ନିଜକୁ ଗୁଳି କରିଦେଇଛନ୍ତି। ଜମ୍ମୁ କାଶ୍ମୀରରେ ନିୟୋଜିତ ହୋଇଥିବା ଏହି ଯବାନ ନିଜ ସର୍ଭିସ ବନ୍ଧୁକରୁ ନିଜକୁ ଗୁଳି କରିଦେଇଛନ୍ତି। ଜାନୁୟାରୀ ୪ ତାରିଖରେ କାଶ୍ନୀରର ପୂଞ୍ଚ ଅଞ୍ଚଳରେ ଏହି ଘଟଣା ଘଟିଛି।
ଆତ୍ମହତ୍ୟା କରିଥିବା ଯବାନଙ୍କ ନାମ କ୍ରିଷ୍ଣା କୁମାର ଯାଦବ ହୋଇଥିବା ବେଳେ ତାଙ୍କ ଘର ଜୟପୁର ଅନ୍ତର୍ଗତ ଅମରସର ଗ୍ରାମରେ ହୋଇଥିବା ଜଣାପଡିଛି। ଆତ୍ମହତ୍ୟା ପୂର୍ବରୁ କ୍ରିଷ୍ଣା ଏକ ସୁଇସାଇଡ ନୋଟ ଲେଖିଯାଇଥିଲେ। ଏହି ସୁଇସାଇଡ ନୋଟରେ ମହିଲାଜଣଙ୍କ ତାଙ୍କୁ ଦୀର୍ଘ ଦୁଇବର୍ଷ ହେବ ମାନସିକ ନିର୍ଯାତନା ଦେଇ ଆସୁଥିଲେ ବୋଲି ସେ ଉଲ୍ଲେଖ କରିଛନ୍ତି।
କ୍ରିଷ୍ଣା ନିଜ ସାଙ୍ଗ ମାନଙ୍କ ସହ ରାଜସ୍ଥାନର ଶୀକର ଜିଲ୍ଲାରେ ଥିବା ଜୀନମାତା ମନ୍ଦିରକୁ ବୁଲିଯାଇଥିବା ବେଳେ ଉକ୍ତ ମହିଳା ଜଣଙ୍କ ତାଙ୍କୁ ନିଶା ଦେଇଥିଲେ। ସେ ନିଶାଗ୍ରସ୍ଥ ଅବସ୍ଥାରେ ଥିବା ବେଳେ ମହିଳା ଜଣଙ୍କ ତାଙ୍କ ସହ ଅନୈତିକ କାମ କରି ତାର ଫଟୋ ରଖି ତାଙ୍କୁ ବ୍ଲାକମେଲ କରୁଥିଲେ। ତେବେ ସେ ତାଙ୍କୁ ୧୫ ଲକ୍ଷ ଟଙ୍କା ନଦେଲେ ସବୁ ଫଟୋ ଭିଡିଓ ଭାଇରାଲ କରିଦେବେ ବୋଲି କହି ମାନସିକ ନିର୍ଯାତନା ଦେଉଥିଲେ ବୋଲି ସେ ନିଜ ସୁଇସାଇଡ ନୋଟରେ ଲେଖିଛନ୍ତି।
କ୍ରିଷ୍ଣାଙ୍କ ପରିବାର ଗତ ମଙ୍ଗଳବାର ତାଙ୍କ ମର ଶରୀରକୁ ରାସ୍ତା ଉପରେ ରଖି ଦୋଷୀକୁ ଗିରଫ କରିବା ପାଇଁ ଆନ୍ଦୋଳନ କରିଥିଲେ। ଏହି ଘଟଣା ଜଣା ପଡିବା ପରେ ଘଟଣାସ୍ଥଳରେ ବରିଷ୍ଠ ପୋଲିସ ଅଧିକାରି ମୁକେଶ ଚୌଧୁରି ପହଞ୍ଚି ତାଙ୍କ ଘର ଲୋକଙ୍କୁ ବୁଝାସୁଝା କରିବା ସହ ସେ ଏହି ଘଟଣାରେ କାର୍ଯ୍ୟାନୁଷ୍ଟାନ ନେବେ ବୋଲି ଘୋଷଣା କରିଥିଲେ।
ତେବେ ଏହି ଘଟଣାରେ ଅମରସାର ପୋଲିସ ଥାନାରେ ଅଭିଯୁକ୍ତ ମହିଳାଙ୍କ ନାମରେ କ୍ରିଷ୍ଣାଙ୍କ ପରିବାର ଲୋକ ଅଭିଯୋଗ ଦାୟର କରିଛନ୍ତି। ପୋଲିସ ଅଭିଯୋଗ ଗ୍ରହଣ କରିବା ସହ ଏ ଦିଗରେ ତଦନ୍ତ ଜାରି ରଖିଛି। ତେବେ ଖବର ଲେଖାହେବାଯାଏ ଏହି ଘଟଣାରେ କେହି ଗିରଫ ହୋଇ ନଥିବା ଜଣା ପଡିଛି।
