ନୂଆଦିଲ୍ଲୀ,୧୧।୧:ଅରବିନ୍ଦ କେଜ୍ରିଓ୍ବାଲ ଓ ମନୀଷ ସିସୋଦିଆ ଯେଉଁଠିକୁ ଯାଆନ୍ତି, ସେଠାରେ ଲୋକଙ୍କୁ ମଦ ବୋତଲ ଦେଖାଯାଏ। ଏଭଳି କିଛି ଆମ୍ ଆଦମୀ ପାର୍ଟିର ରାଷ୍ଟ୍ରୀୟ ଅଧ୍ୟକ୍ଷ ଅରବିନ୍ଦ୍ର କେଜ୍ରିଓ୍ବାଲଙ୍କୁ ଟାର୍ଗେଟ କରି କହିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ। ଏ କାର୍ଯ୍ୟକ୍ରମରେ ଯୋଗ ଦେଇ ଶାହ କହିଛନ୍ତି, ୫ ଫେବୃଆରୀରେ ଦିଲ୍ଲୀର ଆପ-ଦା ମୁକ୍ତି ଦିନ ରହିଛି। ଯେଉଁ ଲୋକ ଦୁର୍ନୀତି ବିରୋଧରେ ଆନ୍ଦୋଳନ କରୁଥିଲେ, ଆନ୍ନା ହଜାରେଙ୍କ ଭଳି ସନ୍ଥ ପୁରୁଷଙ୍କୁ ଆଗରେ ଆଣି, ଏବେ ସେମାନେ ଦିଲ୍ଲୀବାସୀଙ୍କ ପାଇଁ ଆପ-ଦା ଆଣିଛନ୍ତି। କାରଣ କେଜ୍ରିଓ୍ବାଲ ଆପ୍ ପାଇଁ ଆପ-ଦା ପାଲଟିଛନ୍ତି। କେଜ୍ରିଓ୍ବାଲ ଓ ସିସୋଦିଆ ଯେଉଁଠିକୁ ଯାଉଛନ୍ତି, ସେଠାରେ ଲୋକଙ୍କୁ ମଦ ବୋତଲ ଦେଖାଯାଏ।
ଶାହ କହିଛନ୍ତି, ଦିଲ୍ଲୀରେ ବସ୍ତିରେ ରହୁଥିବା ଲୋକଙ୍କୁ ମଇଳା ପାଣି ମିଳୁଛି। ବସ୍ତିରେ ରହୁଥିବା ଲୋକ ଆମକୁ ପଚାରୁଛନ୍ତି ଦିଲ୍ଲୀ ଦୁନିଆର ସବୁଠାରୁ ପ୍ରଦୂଷିତ ସହର କାହିଁକି ? ଗତ ୧୦ ବର୍ଷରେ କେଜ୍ରିଓ୍ବାଲ ଦିଲ୍ଲୀରେ କ’ଣ କହିଛନ୍ତି ? ଯଦି କେଜ୍ରିଓ୍ବାଲ କିଛି କରିପାରୁ ନାହାନ୍ତି ତାଙ୍କୁ ନିଜର ସରକାର ଛାଡିଦେବା ଦରକାର। ବିଜେପି ସବୁ କରିକି ଦେଖାଇବ। କେଜ୍ରିଓ୍ବାଲ ଏକମାତ୍ର ସିଏମ୍ ଯିଏକି ଜେଲ୍ ଯିବାପରେ ବି ଇସ୍ତଫା ଦେଇନାହାନ୍ତି।
ଅମିତ ଶାହ କହିଛନ୍ତି,ଆମେ କହିଥିଲୁ ଅଯୋଧ୍ୟାରେ ରାମ ମନ୍ଦିର ହେବ। କେଜ୍ରିଓ୍ବାଲ କହୁଥିଲେ ମନ୍ଦିର ହେଲେ କ’ଣ ହେବ ? ଶୌଚାଳୟ ତିଆରି କରିବା ଦରକାର। କେଜ୍ରିଓ୍ବାଲ ଜୀ ଆମେ ଟଏଲେଟ୍ ବି ତିଆରି କରିଛୁ। ୫୫୦ ବର୍ଷର ଅପେକ୍ଷା ପରେ ଅଯୋଧ୍ୟାରେ ରାମ ମନ୍ଦିର ହେଲା। ମୋଦିଙ୍କ ଗ୍ୟାରେଣ୍ଟି ହେଉଛି ବସ୍ତିରେ ରହୁଥିବା ଲୋକଙ୍କୁ ପକ୍କା ଘର ଦିଆଯିବ। କେଜ୍ରିଓ୍ବାଲଙ୍କ ‘ଶିଶାମହଲ’ର ଶୌଚାଳୟ ଏହି ବସ୍ତିଠାରୁ ବି ମହୁତ ମହଙ୍ଗା।’
