ନୂଆଦିଲ୍ଲୀ: ଭାରତୀୟ ପାଣିପାଗ ବିଭାଗ (ଆଇଏମଡି)ର ୧୫୦ ବର୍ଷ ପୂର୍ତ୍ତି ଅବସରରେ ଭାରତରେ ଆୟୋଜିତ ହେବାକୁ ଥିବା ଉତ୍ସବରେ ଯୋଗ ଦେବନି ବାଂଲାଦେଶ । ଭାରତ ପକ୍ଷରୁ ନିମନ୍ତ୍ରଣ କରାଯାଇଥିବା ବେଳେ ଶୁକ୍ରବାର ବାଂଲାଦେଶ ସରକାର ଉତ୍ସବରେ ଯୋଗ ଦେବେ ନାହିଁ ବୋଲି ସ୍ପଷ୍ଟ କରିଛନ୍ତି । ସରକାରୀ ଖର୍ଚ୍ଚରେ ଅଯଥା ବିଦେଶ ଭ୍ରମଣ ଉପରେ ପ୍ରତିବନ୍ଧକ ଥିବାରୁ ବାଂଲାଦେଶର ଅଧିକାରୀ ଭାରତ ଆସିବେ ନାହିଁ ବୋଲି କୁହାଯାଇଛି । ବାଂଲାଦେଶ ପାଣିପାଗ ବିଭାଗର କାର୍ଯ୍ୟକାରୀ ନିର୍ଦ୍ଦେଶକ ମୋମିନୁଲ ଇସ୍ଲାମ କହିଛନ୍ତି, ଆଇଏମଡି ପକ୍ଷରୁ ଆମକୁ ନିମନ୍ତ୍ରଣ କରାଯାଇଥିଲା । ଆମେ ସେମାନଙ୍କ ସହ ସୁସଂପର୍କ ରଖିବୁ ଏବଂ ସହଯୋଗ କରିବୁ ।
ଆଇଏମଡି ପ୍ରତିଷ୍ଠା ଦିବସରେ ଯୋଗ ଦେବେ କି ନାହିଁ ପ୍ରଶ୍ନରେ ମୋମିନୁଲ କହିଛନ୍ତି, ଆମେ ଉତ୍ସବରେ ସାମିଲ ହୋଇପାରିବୁ ନାହିଁ । ସରକାରଙ୍କ ଦ୍ବାରା ଅଯଥା ବିଦେଶ ଭ୍ରମଣ ଉପରେ ପ୍ରତିବନ୍ଧକ ଲାଗିଛି । ଅନ୍ୟପଟେ ଆଇଏମଡି ବିଭିନ୍ନ ପଡ଼ୋଶୀ ରାଷ୍ଟ୍ରଙ୍କୁ ପ୍ରତିଷ୍ଠା ଦିବସରେ ଯୋଗ ଦେବାକୁ ଆମନ୍ତ୍ରଣ କରିଛି । ଏହି ତାଲିକାରେ ପାକିସ୍ତାନ, ଆଫଗାନିସ୍ତାନ, ମ୍ୟାଁମାର, ଭୁଟାନ, ନେପାଳ, ଶ୍ରୀଲଙ୍କା ଏବଂ ମାଳଦ୍ବୀପ ଭଳି ଦେଶ ସାମିଲ ରହିଛି । ଏହା ସହ ମଧ୍ୟପ୍ରାଚ୍ୟ ଏବଂ ଦକ୍ଷିଣ ପଶ୍ଚିମ ଏସିଆର ଦେଶମାନଙ୍କୁ ଆମନ୍ତ୍ରିତ କରାଯାଇଛି ।
ଆଇଏମଡିର ଜଣେ ଅଧିକାରୀଙ୍କ ଅନୁସାରେ, ୧୫୦ ବର୍ଷ ପୂର୍ବରୁ ଆଇଏମଡିର ପ୍ରତିଷ୍ଠା ସମୟରେ ଯେଉଁ ସବୁ ଦେଶର ପ୍ରତିନିଧି ଉପସ୍ଥିତ ଥିଲେ ସେହି ସବୁ ଦେଶକୁ ଆମନ୍ତ୍ରଣ କରାଯାଇଛି । ପାକିସ୍ତାନ ଉତ୍ସବରେ ଯୋଗ ଦେବାକୁ ରାଜି ହୋଇଥିବା ବେଳେ ବାଂଲାଦେଶ ପକ୍ଷରୁ କୌଣସି ସୂଚନା ମିଳିନାହିଁ ବୋଲି ସେ କହିଛନ୍ତି । ସୂଚନାଯୋଗ୍ୟ, ବ୍ରିଟିଶ ଅମଳରେ ପ୍ରତିଷ୍ଠା ହୋଇଥିଲା ଭାରତୀୟ ପାଣିପାଗ ବିଭାଗ (ଆଇଏମଡି) । ୧୮୭୫ରେ ପ୍ରତିଷ୍ଠା ହୋଇଥିବା ଆଇଏମଡିର କାର୍ଯ୍ୟଦକ୍ଷତାକୁ ଆଜି ସାରା ବିଶ୍ବ ପ୍ରଶଂସା କରୁଛି ।
କାର୍ଯ୍ୟ ଆରମ୍ଭ କରିବା ପାଖରୁ ଦେଶକୁ ବହୁ ପ୍ରାକୃତିକ ବିପଦରୁ ରକ୍ଷା କରିଛି ଆଇଏମଡି । ବାତ୍ୟା, ବନ୍ୟା, ଝଡ଼ ଭଳି ବିଭିନ୍ନ ପ୍ରାକୃତିକ ବିପର୍ଯ୍ୟୟର ସଠିକ୍ ପୂର୍ବନୁମାନ କରିବାରେ ମାଇଲ ଖୁଣ୍ଟ ସ୍ଥାପନ କରିଛି ଆଇଏମଡି । ପ୍ରଥମେ ଆଇଏମଡିର ମୁଖ୍ୟାଳୟ କୋଲକାତାରେ ସ୍ଥାପନ ହୋଇଥିଲା । ପରେ ଶିମଲା, ପୁନେ ଏବଂ ଶେଷରେ ୧୯୪୪ରେ ଦିଲ୍ଲୀକୁ ସ୍ଥାନାନ୍ତର ହୋଇଥିଲା ଆଇଏମଡିର ମୁଖ୍ୟାଳୟ । ତେବେ ୧୫ ଜାନୁଆରୀ ୨୦୨୫ରେ ଆଇଏମଡିକୁ ୧୫୦ ବର୍ଷ ପୂରିବାକୁ ଯାଉଛି ।
