ନୂଆଦିଲ୍ଲୀ : ବର୍ତ୍ତମାନ ସମୟରେ ସେଲ୍ଫି ସମସ୍ତଙ୍କୁ କିମିଆ କରିଛି। ସବୁ ବର୍ଗର ଲୋକେ ସେଲ୍ଫି ଫଟୋ ଉଠାଇବାରେ ମତୁଆଲା। ଅନେକ ସମୟରେ ଏହି ସେଲ୍ଫି ବି ହୋଇଯାଏ କାଳ । ଅସାବଧାନତା ଯୋଗୁଁ ଚାଲିଯାଏ ଜୀବନ। ଏମିତି ହିଁ ଏକ ଘଟଣା ତେଲେଙ୍ଗାନାର ସିଦ୍ଦିପେଟ ଜିଲ୍ଲାରୁ ସାମ୍ନାକୁ ଆସିଛି। ଏଠାରେ ଏକ ଡ୍ୟାମ୍ରେ ବୁଡ଼ି ଯିବାରୁ ୫ଜଣ ଯୁବକଙ୍କ ମୃତ୍ୟୁ ହୋଇଛି। ଏଥିରେ ଦୁଇଭାଇ ଥିଲେ।
ସୂଚନା ମୁତାବିକ , ୭ ଜଣ ଯୁବକ ବୁଲିବା ପାଇଁ ହାଇଦ୍ରାବାଦରୁ ମରକୁର ମଣ୍ଡଳର କୋଣ୍ଡାପୋଚମ୍ମା ସାଗର ଡ୍ୟାମ୍କୁ ଯାଇଥିଲେ। ପୁଲିସ ମୁତାବିକ , ସେ ଡ୍ୟାମ୍ର ପାଣିରେ ଓହ୍ଲାଇ ସେଲ୍ଫି ନେଉ ଥିଲେ। ସେତିକି ବେଳେ ଏହି ଅଘଟଣ ଘଟିଥିଲା। ଦୁଇଜଣଙ୍କୁ ଉଦ୍ଧାର କରାଯାଇ ଥିବା ବେଳେ ୫ଜଣଙ୍କ ମୃତ୍ୟୁ ହୋଇଥିବା ସୂଚନା ରହିଛି। ବୁଡ଼ିଯାଇ ଥିବା ଯୁବକମାନେ ହେଲେ ଧନୁଷ ( ୨୦ ବର୍ଷ) , ଲୋହିତ (୧୭ ବର୍ଷ) , ଦିନେଶ୍ୱର (୧୭ ବର୍ଷ), ଜତିନ (୧୭) ଓ ଶ୍ରୀନିବାସ (୧୭) ।
ଧନୁଷ ଓ ଲୋହିତ ଉଭୟ ଦୁଇ ଭାଇ ଥିଲେ । ସୂଚନା ମୁତାବିକ , ଶବ ଗୁଡ଼ିକର ପୋଷ୍ଟମର୍ଟମ ପାଇଁ ପଠାଇ ଦିଆଯାଇଛି। ବୁଡ଼ାଳିଙ୍କ ସାହାଯ୍ୟରେ ମୃତଦେହ ଗୁଡ଼ିକୁ ବାହାର କରାଯାଇଛି। ସୁରକ୍ଷିତ ଉଦ୍ଧାର କରାଯାଇ ଥିବା ଯୁବକଙ୍କ ନାଁ କୋମାରୀ ମୃଗାଙ୍କ ଓ ମହମ୍ମଦ ଇବ୍ରାହିମ୍।
ଉଲ୍ଲେଖନୀୟ ଯେ, ଗତବର୍ଷ ଅଗଷ୍ଟରେ ବାରଣାସୀରେ ସେଲ୍ଫି ନେବା ସମୟରେ ୩ଜଣ ଛାତ୍ରଛାତ୍ରୀଙ୍କ ଜୀବନ ଚାଲି ଯାଇଥିଲା। ସେ ନାଆରେ ବସି ସେଲ୍ଫି ନେଉଥିଲେ । ସେତେବେଳେ ଏକ ଯୁବତୀଙ୍କ ପାଦ ଖସି ଯାଇ ଥିବା ଏବଂ ସେଠାରେ ଗଙ୍ଗାରେ ଖସି ପଡ଼ିଥିଲେ।ତାଙ୍କୁ ବଞ୍ଚାଇବା ଚକ୍କରରେ ଦୁଇ ଯୁବକ ନଦୀକୁ ଡ଼େଇ ପଡ଼ିଥିଲେ। ତାଙ୍କର ମଧ୍ୟ ଜୀବନ ଚାଲିଗଲା।
