ନୂଆଦିଲ୍ଲୀ: ଋଷ ପକ୍ଷରୁ କ୍ଷେପଣାସ୍ତ୍ର ମାଡ଼ ନେଇ ଧମକ ପରେ ୟୁକ୍ରେନ୍ ସଂସଦ ଅଧିବେଶନ ରଦ୍ଦ କରାଯାଇଛି । ଡିପ୍ରୋ ଉପରେ ହାଇପରସୋନିକ ମିସାଇଲ୍ ମାଡ଼ କରି ଋଷ ପାଶ୍ଚାତ୍ୟ ରାଷ୍ଟ୍ରଙ୍କୁ ଚେତାବାନୀ ଦେଇଛି ବୋଲି କ୍ରେମଲିନ୍ କହିବା ପରେ ଏବେ କିଭ୍ରେ କୋକୁଆ ଭୟ । ଶୁକ୍ରବାର କିଭରେ ଥିବା ୟୁକ୍ରେନ୍ ସଂସଦର ଅଧିବେଶନ ଋଷ ପଟୁ ସମ୍ଭାବ୍ୟ ମିସାଇଲ୍ ମାଡ଼ ଭୟରେ ରଦ୍ଦ କରିଦିଆଯାଇଛି ବୋଲି ଦେଶର ଜଣେ ସାଂସଦ ସୂଚନା ଦେଇଛନ୍ତି ।
ଆମେରିକା ସମେତ ଅନ୍ୟ କେତେକ ଦେଶ କିଭରେ ଥିବା ନିଜ ନିଜର ଦୂତାବାସ ବନ୍ଦ କରିଦେଇଛନ୍ତି । ଏହା ପରେ ଜେଲେନସ୍କି ସରକାରଙ୍କ ଭୟ ଆହୁରି ବୃଦ୍ଧି ପାଇଛି । କିଭ୍ରେ ଥିବା ବାଣିଜ୍ୟିକ କାର୍ଯ୍ୟାଳୟଗୁଡ଼ିକ ଲାଗି ମାର୍ଗଦର୍ଶିକା ଜାରି ହୋଇଥିବା ବେଳେ ଆକ୍ରମଣର ଭୟ ଥିବା ସ୍ଥାନରୁ ଲୋକମାନଙ୍କୁ ସୁରକ୍ଷିତ ସ୍ଥାନକୁ ଚାଲିଯିବାକୁ କୁହାଯାଇଛି ବୋଲି ସାଂସଦ ମାଇକ୍ୟତା ପୋଟୁରାଇଭ୍ କହିଛନ୍ତି । ଅନ୍ୟ ଜଣେ ସାଂସଦ ଓଲେକ୍ସି ଗୋଞ୍ଚାରେଙ୍କୋ ସରକାରଙ୍କ ସଂସଦ ଅଧିବେଶନ ରଦ୍ଦ ନିଷ୍ପତ୍ତି ହାସ୍ୟାଷ୍ପଦ ବୋଲି କହିଛନ୍ତି । ଏହା ଦ୍ବାରା କିଭରେ ଆହୁରି ଭୟର ବାତାବରଣ ଖେଳିଯିବ । ଆଉ ଏହା ଋଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ସୁହାଇବ ବୋଲି ସେ କହିଛନ୍ତି ।
ସେପଟେ ରାଷ୍ଟ୍ରପତି କାର୍ଯ୍ୟାଳୟରେ ପୂର୍ବଭଳି କାର୍ଯ୍ୟ ଜାରି ରହିଛି ବୋଲି ଭୋଲଦିମିର ଜେଲେନସ୍କିଙ୍କ ପ୍ରବକ୍ତା କହିଛନ୍ତି । ତେବେ ଫେବୃଆରୀ ୨୦୨୨ରୁ ଆରମ୍ଭ ହୋଇଥିବା ଯୁଦ୍ଧରେ ଲଗାତାର କିଭ୍କୁ ଟାର୍ଗେଟ କରିଆସିଛି ଋଷ । ମଙ୍ଗଳବାର ପୁଟିନ୍ କହିଥିଲେ ଯେ, ଋଷ ପ୍ରଥମ ଥର ଯୁଦ୍ଧରେ ଆଇସିବିଏମ୍ ବ୍ୟବହାର କରିଛି । ଆମେରିକାର ଅନୁମତି ପରେ ଋଷରେ ୟୁକ୍ରେନ୍ ଦୂରଗାମୀ କ୍ଷେପଣାସ୍ତ୍ର ମାଡ଼ କରିବା ଜବାବରେ ଋଷ ଏହି ପଦକ୍ଷେପ ନେଇଛି ବୋଲି ପୁଟିନ୍ କହିଥିଲେ ।
