ନୂଆଦିଲ୍ଲୀ: ଭାରତ ଶେୟାର ବଜାରରୁ ବୁଡିଗଲା କୋଟିକୋଟି ଟଙ୍କା । କେବଳ ଭାରତୀୟ ନୁହେଁ ବିଦେଶୀ ନିବେଶକ ମାନେ ମଧ୍ୟ ଶେୟାର ବଜାରରୁ ମୁହଁ ଫେରାଇଛନ୍ତି । କୋଟିପତି ବ୍ୟାବସାୟୀ ଗୈାତମ ଆଦାନୀଙ୍କ ଉପରେ ଲାଞ୍ଚ ମାମଲା ଥିବା ନେଇ ଆମେରିକା ଆଇନ ବିଭାଗ ଆରୋପ ଲଗାଇବା ପରେ ଶେୟାର ମାର୍କେଟର ଗ୍ରାଫ ତଳମୁହାଁ ରହିଛି । କିଛିମାସ ଆଗରୁ ଆମେରିକୀୟ ସଂସ୍ଥା ହିଣ୍ଡେନସ ବର୍ଗ ଓ ଏବେ ଆମେରିକା ଆଇନ ବିଭାଗଙ୍କର ଏହି ବିସ୍ପୋରକ ବୟାନ ଭାରତୀୟ ଶେୟାର ବଜାରରେ କମ୍ପନ ସୃଷ୍ଟି କରିଛି । 

ଆଦାନୀ ଗ୍ରୁପର ମୁଖ୍ୟ ଗୌତମ ଆଦାନୀଙ୍କ ଉପରେ କୋଟିକୋଟି ଡଲାରର ଲାଞ୍ଚ ଓ ଠକେଇ ଅଭିଯୋଗ ଆଣିଛି ଆମେରିକାର ଆଇନ ବିଭାଗ । ଆଦାନୀଙ୍କ ପୁତୁରା ସାଗର ଆଦାନୀଙ୍କ ସହ ଆଉ ୭ ବରିଷ୍ଠ ଅଧିକାରୀ ଏହି ଘଟଣାରେ ସମିଲ ଥିବା ନେଇ ଆଇନ ବିଭାଗ ଦାବି କରିଛି । ଶକ୍ତି ବିତରଣ କ୍ଷେତ୍ରରେ ଥିବା ବିଭିନ୍ନ କଣ୍ଟ୍ରାକ୍ଟ ହାସଲ ପାଇଁ ବିଭିନ୍ନ ସରକାରୀ ଅଧିକାରୀଙ୍କୁ ୨୫୦ ମିଲିୟନ ଡଲାର(୨୨୩୬ କୋଟି ଟଙ୍କା) ଠୁ ଅଧିକ ଲାଞ୍ଚ ଦେବା ପାଇଁ ଯୋଜନା କରିଥିବା ସମସ୍ତଙ୍କ ଉପରେ ଅଭିଯୋଗ ଲାଗିଛି । ଏହି ଲାଞ୍ଚ ୨୦୨୦ରୁ ୨୦୨୪ ମଧ୍ୟରେ ପର୍ଯ୍ୟାୟକ୍ରମେ ସମସ୍ତ ଅଧିକାରୀଙ୍କୁ ଦିଆଯାଇଛି ବୋଲି ମଧ୍ୟ ଏହାର ଅଧ୍ୟାଦେଶରେ କୁହାଯାଇଛି । 

ଆଦାନୀ ଗ୍ରୀନ ଏନର୍ଜିର ଏକ ଶାଖା କମ୍ପାନୀ ହେଉଛି ‘ଇଣ୍ଡିଆନ ଏନର୍ଜି କମ୍ପାନୀ’। ଏହା ଆମେରିକିୟ କମ୍ପାନୀ ୟୁଏସ ଇସୁଅର(US Issuer) ସହ ମିଳିତ ଭାବେ ଷ୍ଟେଟ-ଓନ୍ଡ ସୋଲାର ଏନର୍ଜି କର୍ପୋରେସନ ଅଫ ଇଣ୍ଡିଆ (SECI) ପାଇଁ ୧୨ ଗିଗାଓ୍ବାଟର ସୋଲାର ପାଓ୍ବାର ବିତରଣ ଉପରେ କାର୍ଯ୍ୟ କରୁଥିଲେ । ଏହି ପ୍ରୋଜେକ୍ଟକୁ କେହି କ୍ରେତା ନମିଳିବାରୁ ବିଭିନ୍ନ ରାଜ୍ୟର ସରକାରୀ ଅଧିକାରୀଙ୍କୁ ଲାଞ୍ଚ ଦେଇ ଏହାର ବିଡକୁ ରାଜ୍ୟରେ ବିତରଣ ପାଇଁ ବାଧ୍ୟ କରାଯାଉଥିଲା ବୋଲି ଆମେରିକାର ନ୍ୟାୟିକ କୋର୍ଟରେ କୁହାଯାଇଛି । 

ଗୁରୁବାର ଏହି ଘଟଣା ସମ୍ନାକୁ ଆସିବା ପରେ ଭାରତୀୟ ଶେୟାର ବଜାର ତଳମୁହାଁ ହୋଇଛି । ୪୦୦ରୁ ଅଧିକ ପଏଣ୍ଟର କ୍ଷତି ସହି ବଜାର ବନ୍ଦ ହୋଇଥିଲା । ଆଦାନୀ ଗ୍ରୃପର ଶେୟାର ସବୁଠୁ ଅଧିକ ଖରାପ ପ୍ରଦର୍ଶନ କରିଥିଲେ ଯାହା ଫଳରେ କମ୍ପାନୀକୁ ମୋଟ ୨ ଲକ୍ଷ କୋଟିରୁ ଅଧିକ କ୍ଷତି ହୋଇଛି ।