ନୂଆଦିଲ୍ଲୀ: ଦିଲ୍ଲୀ ବିଧାନସଭା ନିର୍ବାଚନ ଆସନ୍ତା ବର୍ଷ (୨୦୨୫) ଆରମ୍ଭରୁ ହୋଇପାରେ । ଏନେଇ କୌଣସି ବିଧିବଦ୍ଧ ବିଜ୍ଞପ୍ତି ଜାରି ହୋଇନାହିଁ। କିନ୍ତୁ ଆମ ଆଦମୀ ପାର୍ଟି (ଆପ୍) ବିଧାନସଭା ନିର୍ବାଚନ ଲାଗି ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ଜାରି କରିଛି । ପ୍ରଥମ ତାଲିକାରେ ୧୧ ଜଣ ପ୍ରାର୍ଥୀଙ୍କ ନାଁ ସାମିଲ କରିଛି ଆପ୍ । ସବୁଠୁ ବଡ଼ କଥା ହେଉଛି, ଏହି ପ୍ରାର୍ଥୀ ତାଲିକାରେ ୧୧ ଜଣଙ୍କ ମଧ୍ୟରୁ ୬ ଜଣ ଦଳଡିଆଁ ନେତା ଅଛନ୍ତି । କିଏ ବିଜେପିରୁ ତ କିଏ କଂଗ୍ରେସରୁ ଆସି ଆପ୍ରେ ଯୋଗ ଦେଇଛନ୍ତି । ଆପରେ ସାମିଲ ହେବାକୁ ଦିନ କେଇଟା ବିତିନଥିବା ବେଳେ ସେମାନଙ୍କୁ ଟିକେଟ୍ ଦେଇଛି ଦଳ । ଯାହାକୁ ନେଇ ରାଜ୍ୟ ରାଜନୀତି ସରଗରମ ହୋଇଛି ।
ବ୍ରହ୍ମା ସିଂ ତନଓ୍ବାରଙ୍କୁ ଦଳ ଛତରପୁରରୁ ପ୍ରାର୍ଥୀ କରିଛି । ୨୦୧୫ ଏବଂ ୨୦୨୦ ବିଧାନସଭା ନିର୍ବାଚନରେ ତନଓ୍ବାର ଛତରପୁରରୁ ବିଜେପି ପ୍ରାର୍ଥୀ ହୋଇଥିଲେ । ସେ ଦୁଇ ଦୁଇଥର ପରାସ୍ତ ହୋଇଥିଲେ । ଚଳିତ ବର୍ଷ ଅକ୍ଟୋବର ୩୧ରେ ସେ ବିଜେପି ଛାଡ଼ି ଆପ୍ରେ ସାମିଲ ହୋଇଥିଲେ । ତାଙ୍କ ବ୍ୟତୀତ ଦୀପକ ସିଂହଲା ବିଶ୍ବାସ ନଗରରୁ ପ୍ରାର୍ଥୀ ହୋଇଥିବା ବେଳେ ସରିତା ସିଂହ ରୋହତାସ ନଗରରୁ ଆପ୍ ଟକେଟ୍ରେ ନିର୍ବାଚନ ଲଢ଼ିବେ ।
ସେହିଭଳି ବିବି ତ୍ୟାଗୀ ଲକ୍ଷ୍ମୀ ନଗର, ରାମ ସିଂହ ନେତାଜୀ ବଦରପୁର, ଜୁବୈର ଚୌଧୁରୀ ସିଲମପୁର ଏବଂ ବୀର ସିଂହ ସୀମାପୁରରୁ ପ୍ରାର୍ଥୀ ହୋଇଛନ୍ତି । ଗୌରବ ଶର୍ମା ଘୋଣ୍ଡାରୁ, ମନୋଜ ତ୍ୟାଗୀ କରଓ୍ବାଲ ଆସନରୁ ଲଢ଼ିବାକୁ ଥିବା ବେଳେ ସୋମେଶ ଶୌକିନ ମାଟିୟାଲାରୁ ପ୍ରାର୍ଥୀ ହୋଇଛନ୍ତି । ତେବେ ୧୧ ପ୍ରାର୍ଥୀଙ୍କ ମଧ୍ୟରୁ ୬ ଜଣ ଦଳଡିଆ ନେତା ।
ସୋମେଶ ଶୌକିନ୍ କଂଗ୍ରେସ ଛାଡ଼ି ନଭେମ୍ବର ୧୮ରେ ଆପ୍ରେ ଯୋଗ ଦେଇଥିଲେ । ଅନୀଲ ଝା ବିଜେପିରୁ ଇସ୍ତଫା ଦେଇ ନଭେମ୍ବର ୧୭ରେ ଆପ୍ରେ ସାମିଲ ହୋଇଥିଲେ । ସେହିଭଳି ବୀର ସିଂହ ଏବଂ ଜୁବୈର ଚୌଧୁରୀ କଂଗ୍ରେସ ଛାଡ଼ି ଆପ୍ରେ ସାମିଲ ହୋଇଥିବା ବେଳେ ବିବି ତ୍ୟାଗୀ ନଭେମ୍ବର ୪ରେ ବିଜେପି ଛାଡ଼ି ଆପ୍ରେ ଯୋଗ ଦେଇଥିଲେ । ଏବେ ଦଳ ଡିଆଁ ନେତାଙ୍କୁ ଆଗାମୀ ନିର୍ବାଚନ ଲାଗି ପ୍ରାର୍ଥୀ କରାଇଥିବାରୁ ଆପ୍କୁ ଜୋରଦାର ଟାର୍ଗେଟ କରିଛନ୍ତି ବିରୋଧୀ ନେତା ।
