ୱାଶିଂଟନ,୨୨/୦୫: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ହ୍ୱାଇଟ୍ ହାଉସ୍ରେ ବୁଧବାର ଦକ୍ଷିଣ ଆଫ୍ରିକା ରାଷ୍ଟ୍ରପତି ସାଇରିଲ୍ ରାମାଫୋସାଙ୍କୁ ଜୋରଦାର ଘେରିଛନ୍ତି । ଦୁଇଘଣ୍ଟା ଧରି ଉଭୟଙ୍କ ମଧ୍ୟରେ ବୈଠକ ବସିଥିଲା । କିନ୍ତୁ ଏଥିରୁ କୌଣସି ନିର୍ଯାସ ବାହାରି ନ ଥିଲା । ଦ୍ୱିପାକ୍ଷିକ ସମ୍ପର୍କକୁ ନେଇ ସେଭଳି କୌଣସି ବଡ଼ ନିଷ୍ପତ୍ତି ହୋଇନଥିଲା । ବୈଠକରେ ରାମାଫୋସା ଅଧିକ ସମୟ ଧରି ଚୁପ୍ଚାପ୍ ବସି ଟ୍ରମ୍ପ୍ଙ୍କ କଥା ଶୁଣିଥିଲେ । ଦକ୍ଷିଣ ଆଫ୍ରିକାରେ ଶ୍ୱେତାଙ୍ଗ ଲୋକମାନଙ୍କୁ ବିଶେଷକରି ଶ୍ୱେତାଙ୍କ ଚାଷୀଙ୍କୁ ହତ୍ୟା କରାଯାଉଥିବା ନେଇ ଟ୍ରମ୍ପ୍ ଅଭିଯୋଗ କରିଥିଲେ । ପ୍ରମାଣସ୍ୱରୂପ ହ୍ୱାଇଟ୍ ହାଉସ୍ରେ ପ୍ରାୟ ୫ ମିନିଟ୍ର ଭିଡିଓ ଦେଖାଯାଇଥିଲା ।
ଟ୍ରମ୍ପ୍ କହିଥିଲେ, ଏହି ଅଭିଯୋଗକୁ ପ୍ରମାଣିତ କରିବା ପାଇଁ ଆମ ପାଖରେ ହଜାର ହଜାର କାହାଣୀ ରହିଛି । ଡକ୍ୟୁମେଣ୍ଟାରି ବି ଅଛି । ଏହାପରେ ଉକ୍ତ ଭିଡିଓକୁ ହ୍ୱାଇଟ୍ ହାଉସ୍ର ‘ଏକ୍ସ’ ଆକାଉଣ୍ଟରେ ପୋଷ୍ଟ କରାଯାଇଥିଲା । ଭିଡିଓ ଦେଖିବା ପରେ ରାମାଫୋସା ଟ୍ରମ୍ପ୍ଙ୍କ ‘ହ୍ୱାଇଟ୍ ଜେନୋସାଇଡ୍’ (ଶ୍ୱେତାଙ୍ଗ ନରସଂହାର) ଅଭିଯୋଗକୁ ଖଣ୍ଡନ କରିଥିଲେ । ସେ କହିଥିଲେ ଯେ ଦକ୍ଷିଣ ଆଫ୍ରିକାରେ ଏଭଳି କୌଣସି ଘଟଣା ଘଟୁନାହିଁ । ଦେଶରେ କେବଳ ଶ୍ୱେତାଙ୍ଗ ଲୋକ ପ୍ରାଣ ହରାଉ ନାହାନ୍ତି । କୃଷ୍ଣକାୟ ଲୋକଙ୍କୁ ବି ହତ୍ୟା କରାଯାଉଛି । ବୈଠକରେ ଉପସ୍ଥିତ ଥିବା ଦକ୍ଷିଣ ଆଫ୍ରିକାର କୃଷି ମନ୍ତ୍ରୀ ଜନ୍ ଷ୍ଟିନ୍ହୁସେନ କହିଥିଲେ, ସରକାର ସମସ୍ତ ଚାଷୀଙ୍କୁ ସୁରକ୍ଷା ଯୋଗାଇବାକୁ ପ୍ରତିଶ୍ରୁତିବଦ୍ଧ । ଦେଶରେ କେବଳ ଶ୍ୱେତାଙ୍ଗ ଚାଷୀଙ୍କୁ ଟାର୍ଗେଟ୍ କରାଯିବା ଖବର ଭିତ୍ତିହୀନ । ଅଧିକାଂଶ ଚାଷୀ ଦେଶ ଛାଡ଼ିବାକୁ ଚାହୁଁନାହାନ୍ତି।
ଦକ୍ଷିଣ ଆଫ୍ରିକା ରାଷ୍ଟ୍ରପତି ରାମାଫୋସା ବୁଧବାର ବୈଠକରେ ବିଳମ୍ବରେ ଯୋଗଦେଇଥିଲେ । ସେ ସାମ୍ବାଦିକଙ୍କ ପ୍ରଶ୍ନର ଉତ୍ତର ଦେଇ କହିଥିଲେ, ଆମେରିକା-ଦକ୍ଷିଣ ଆଫ୍ରିକା ସମ୍ପର୍କକୁ ପୁନଃସ୍ଥାପନ କରିବା ଉଦ୍ଦେଶ୍ୟରେ ସେ ଆସିଛନ୍ତି। ଟ୍ରମ୍ପ୍ଙ୍କ ଅନୁରୋଧକ୍ରମେ ସେ ଗଲ୍ଫ କିମ୍ବଦନ୍ତୀ ଏର୍ନି ଏଲ୍ସ ଓ ରେତିଫ୍ ଗୁସେନ୍ଙ୍କୁ ସାଙ୍ଗରେ ଆଣି ଆସିଥିଲେ । ଏମିତି କି ଟ୍ରମ୍ପ୍ଙ୍କୁ ସେ ୧୪ କିଲୋଗ୍ରାମ ଓଜନର ଏକ ପୁସ୍ତକ ଉପହାର ଦେଇଥିଲେ । ଏଥିରେ ଦକ୍ଷିଣ ଆଫ୍ରିକୀୟ ଗଲ୍ଫ କୋର୍ସ ବିଷୟରେ ଦର୍ଶାଯାଇଛି । କିନ୍ତୁ ରାମାଫୋସାଙ୍କୁ ଘେରିବା ଲାଗି ଟ୍ରମ୍ପ୍ ଯୋଜନାବଦ୍ଧ ଭାବେ ଆସିଥିବା କୁହାଯାଉଛି । ଏଥିପାଇଁ ପୂର୍ବରୁ ଭିଡିଓ ପ୍ରସ୍ତୁତ ରହିଥିଲା । ବୈଠକ କକ୍ଷରେ ଏଲନ୍ ମସ୍କ ବି ଉପସ୍ଥିତ ଥିଲେ । ଏହା ପୂର୍ବରୁ ଟ୍ରମ୍ପ୍ ହ୍ୱାଇଟ୍ ହାଉସ୍ରେ ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନସ୍କିଙ୍କୁ ଜୋରଦାର ଘେରିଥିଲେ । ଏହି ସମୟରେ ଆମେରିକାର ଉପରାଷ୍ଟ୍ରପତି ଜେ ଡି ଭାନ୍ସ ବି ଉପସ୍ଥିତ ଥିଲେ । କିନ୍ତୁ ଛୋଟ ଦେଶର ରାଷ୍ଟ୍ରପତି ହୋଇଥିଲେ ହେଁ ଜେଲେନସ୍କି ନରମ ପଡ଼ି ନ ଥିଲେ । ଟ୍ରମ୍ପ୍ ଓ ଭାନ୍ସଙ୍କୁ ସେ କଡ଼ା ଜବାବ ଦେଇଥିଲେ । ଏ ନେଇ ଭିଡିଓ ସୋସିଆଲ ମିଡିଆରେ ବେଶ୍ ଭାଇରାଲ ହୋଇଥିଲା ।
