ନୂଆଦିଲ୍ଲୀ, ୧୮।୪: ଭାରତରେ ଏବେ ମଧ୍ୟ ଅନେକ ଜନଜାତି ଅଛନ୍ତି, ଯେଉଁମାନେ ସମାଜର ମୁଖ୍ୟସ୍ରୋତଠୁ ଖୁବ୍ ଦୂରରେ । ଏମାନଙ୍କ ମଧ୍ୟରୁ କିଛି ଜନଜାତିଙ୍କର ସଂସ୍କୃତି, ପରମ୍ପରା ଭିନ୍ନ ହୋଇଥିବା ବେଳେ କିଛି ଜନଜାତିଙ୍କ ପରମ୍ପରା ଅଜବ । ଠିକ୍ ସେହିପରି ଏକ ଆଦିବାସୀ ଜନଜାତି ହେଉଛନ୍ତି, ଆଫ୍ରିକାର ଦକ୍ଷିଣ ସୁଦାନରେ ରହୁଥିବା ମୁଣ୍ଡାରୀ ଜନଜାତି । ଏହି ଜନଜାତିଙ୍କ ପାଇଁ ଗାଈ କେବଳ ପଶୁ ନୁହେଁ ବରଂ ସେମାନଙ୍କ ଜୀବନ । ଯଦି କେହି ନିଜ ଗାଈକୁ ନେଇ ଥଟ୍ଟା କରନ୍ତି ତେବେ ସେମାନେ ତାକୁ ଦଣ୍ଡ ଦିଅନ୍ତି । ଏହି ଜନଜାତିର ବିଶେଷତ୍ୱ ହେଉଛି ଯେ, ସେମାନେ ଗୋରୁମାନଙ୍କୁ ସେମାନଙ୍କର ସବୁକିଛି ବୋଲି ଭାବନ୍ତି । ଗାଈଗୋରୁଙ୍କ ଉପରେ ଏମାନେ ସମ୍ପୂର୍ଣ୍ଣ ନିର୍ଭରଶୀଳ । ଯେହେତୁ ଏହା ସେମାନଙ୍କର ଆୟର ମୁଖ୍ୟ ଉତ୍ସ, ତେଣୁ ସେମାନେ ପାଳିଥିବା ଗାଈ ପାଇଁ ସବୁ ପ୍ରକାର ସୁବିଧା କରିଥାନ୍ତି ।
ଏମାନେ ଗାଈଗୋରୁଙ୍କୁ ଏତେ ଭଲପାନ୍ତି ଯେ, ଗାଈ ରାତିରେ ଶୋଇଥିବା ବେଳେ ଏହି ଜନଜାତିର ଲୋକେ ବନ୍ଧୁକ ଧରି ପହରା ଦେଇଥାଆନ୍ତି । ଏଭଳି କରି ସେମାନେ ନିଜ ପାଳିତ ଗାଈମାନଙ୍କୁ ସୁରକ୍ଷା ଦେଇଥାଆନ୍ତି । ତେବେ ସାଧାରଣତଃ ଆମେ ମୁହଁରେ ପାଉଡର ବ୍ୟବହାର କରାଯାଉଥିବା ବେଳେ ମୁଣ୍ଡ ସଫା ପାଇଁ ଶାମ୍ପୁର ବ୍ୟବହାର କରାଯାଏ । କିନ୍ତୁ, ଜାଣି ଆଶ୍ଚର୍ଯ୍ୟ ହେବେ ଏହି ଜନଜାତିର ଲୋକେ ଗୋମୂତ୍ରରେ ମୁଣ୍ଡ ଧୋଇଥାନ୍ତି । ମୁଣ୍ଡାରି ଜନଜାତିର ଲୋକେ ଗୋମୂତ୍ରରେ ମୁଣ୍ଡ ଧୋଉଥିବାରୁ ଏଥିରେ ଥିବା ୟୁରିକ୍ ଏସିଡ୍ ହେତୁ ସେମାନଙ୍କ କେଶ ରଙ୍ଗିନ୍ ହୋଇଯାଏ । ଗାଈର ଗୋବରରେ ଦାନ୍ତ ସଫା କରନ୍ତି ଓ ଏହାକୁ ପାଉଡର ଆକାରରେ ମଧ୍ୟ ବ୍ୟବହାର କରନ୍ତି । ଏହି ଜନଜାତିର ଏହି ଲୋକମାନଙ୍କ ପାଇଁ ଗାଈ ସେମାନଙ୍କ ପରିବାର ସଦସ୍ୟ ପରି । ସେମାନେ ଆଦୌ ସେମାନଙ୍କଠାରୁ ଦୂରରେ ରହିବାକୁ ଚାହାଁନ୍ତି ନାହିଁ । ସେମାନେ ଗାଈମାନଙ୍କୁ ଏତେ ଖାଇବାକୁ ଦିଅନ୍ତି ଯେ ଗାଈମାନଙ୍କର ଉଚ୍ଚତା ୮ ଫୁଟ୍ ପର୍ଯ୍ୟନ୍ତ ହୋଇଥାଏ ।
ତେବେ ସବୁଠୁ ଭାରୀ ଗୋରୁମାନଙ୍କ ହାରାହାରି ମୂଲ୍ୟ ପ୍ରାୟ ୪୨ ହଜାର ଟଙ୍କା । ସବୁଠୁ ବଡ଼ କଥା ହେଉଛି ସେମାନଙ୍କୁ ହତ୍ୟା କରାଯାଏ ନାହିଁ କିନ୍ତୁ, ଏହା ଯୌତୁକ କିମ୍ବା ଉପହାର ଭାବେ ଦିଆଯାଏ । ମୁଣ୍ଡାରି ଲୋକମାନେ ଦିନକୁ ଦୁଇଥର ସେମାନଙ୍କ ଗୋରୁକୁ ମାଲିସ୍ କରନ୍ତି ଏବଂ ଗାଈ ଏମାନଙ୍କ ପ୍ରିୟ ପଶୁ ହୋଇଥିବାରୁ ଅନେକ ସମୟରେ ତାଙ୍କ ସହ ଶୋଇଥା’ନ୍ତି । ଗାଈ ତାଙ୍କର ଷ୍ଟାଟସ୍ ସିମ୍ବଲ । ମୁଣ୍ଡାରି ଜନଜାତି ବିବାହରେ ଗାଈଗୋରୁମାନଙ୍କୁ ଯୌତୁକ ଆକାରେ ଦିଆଯାଏ । ଆଣ୍ଟିବାୟୋଟିକ୍ଠାରୁ ଆରମ୍ଭ କରି ମଶାରୁ ରକ୍ଷା ପାଇବା ପାଇଁ ଏମାନେ ଗାଈର ଗୋବର ଏବଂ ଗୋମୂତ୍ରକୁ ଆଣ୍ଟିବାୟୋଟିକ୍ ଭାବରେ ବ୍ୟବହାର କରନ୍ତି ।