ନବରଙ୍ଗପୁର,୫/୬ : ଆଦିବାସୀ ଅଧିକାର ମଞ୍ଚର ପକ୍ଷରୁ ୧୫ଦଫା ଦାବି ନେଇ ଜିଲ୍ଲାପାଳ କାର୍ଯ୍ୟାଳୟ ଆଗରେ ଧାରଣା ଦେଇଛନ୍ତି। ମଞ୍ଚର ଜିଲ୍ଲା ସଂପାଦକ ରାଜେଶ ଜାନୀଙ୍କ ନେତୃତ୍ବରେ ମାଝୀ ଗୁଡ଼ାଠାରୁ ଜିଲ୍ଲାପାଳଙ୍କ କାର୍ଯ୍ୟାଳୟ ପର୍ଯ୍ୟନ୍ତ ଏକ ବିଶାଳ ଶୋଭାଯାତ୍ରା ବାହାରି ଜିଲ୍ଲା ପ୍ରଶାସନକୁ ଏକ ଦାବିପତ୍ର ପ୍ରଦାନ କରିଛନ୍ତି । ସେମାନେ ଦାବି କରିଛନ୍ତି ଜିଲ୍ଲାର ଜଙ୍ଗଲ ଅଧିକାର ଆଇନକୁ ଉଲ୍ଲଘଂନ କରାଯାଉଛି । ସେହିଭଳି ପେସା ଆଇନ ଲାଗୁ କରାଯାଉଛି ।
ପୁରୁଷ ପୁରୁଷ ଧରି ଜଙ୍ଗଲ ଜମିରେ ଚାଷ କରି ଜୀବିକା ନିର୍ବାହ କରୁଥିବାବେଳେ ଜଙ୍ଗଲ ଜମିରୁ ଉଚ୍ଛେଦ କରାଯାଉଛି । ସେହିଭଳି ଜିଲ୍ଲାରୁ ଭୂ-ବନ୍ଦୋବସ୍ତ ସଠିକ୍ ଭାବେ କରାଯାଇନି । କିନ୍ତୁ ଜବରଦଖଲ ଉଚ୍ଛେଦ ନାଁରେ ଗରିବଙ୍କ ଘର ଭାଙ୍ଗି ଉଚ୍ଛେଦ କରାଯାଉଛି । ଏହିଭଳି ଭାବେ ଜିଲ୍ଲା ଆଦିବାସୀଙ୍କୁ ଜମି ଉପରେ ଅଧିକାରକୁ ବଞ୍ଚିତ କରାଯାଉଛି । ବର୍ଷ ବର୍ଷ ଧରି ଅଭିଯୋଗ କଲେ ମଧ୍ୟ ପ୍ରଶାସନ ଗୁହାରୀ ଶୁଣୁନାହିଁ । ତେଣୁ ୧୫ ଦଫା ଦାବି ପୂରଣ ନ ହେବା ପର୍ଯ୍ୟନ୍ତ ଧାରଣା ଜାରି ରହିବ ବୋଲି ମଞ୍ଚ ସ୍ପଷ୍ଟ କରିଛି । ଏହି ଦାବିପତ୍ରକୁ ଅତିରିକ୍ତ ଜିଲ୍ଲାପାଳ ତପନ କୁମାର ଖୁଣ୍ଟିଆ ଗ୍ରହଣ କରିଛନ୍ତି ।
