କୋଣାର୍କ,୬/୬ : କୋଣାର୍କ ମଙ୍ଗୁଳିଶ୍ବର ମନ୍ଦିରରୁ ଜଣେ ଫ୍ରାନ୍ସ ପର୍ଯ୍ୟଟକଙ୍କୁ କୋଣାର୍କ ପୁଲିସ ଗିରଫ କରିଛି । ୧୪ ମାସ ହେବ ତାଙ୍କର ଭିସା ଅବଧି ଶେଷ ହୋଇଥିବାବେଳେ ସେ ଏଠାରେ ବେନିୟମ ଭାବେ ଅବସ୍ଥାନ କରୁଥିଲେ। ଫ୍ରାନ୍ସର ନାଗରିକ କାଇଜରଗୁଏସ ଟୋନି ଗତ ୨୦୨୩ଜୁନ୍ ମାସରେ କୋଣାର୍କ ପରିଦର୍ଶନରେ ଆସିଥିଲେ।
ପର୍ଯ୍ୟଟକ ଟୋନିଙ୍କ ୧ବର୍ଷର ଅବଧି ଥିବା ଇ-ଟୁରିଷ୍ଟ ଭିସାରେ ୬ମାସ ପାଇଁ ଭାରତ ପରିଦର୍ଶନରେ ଆସିଥିଲେ। କୋଣାର୍କରେ କିଛିଦିନ ରହିବା ପରେ ଆଉ ନିଜ ଦେଶକୁ ଫେରିନଥିଲେ। ମଙ୍ଗୁଳିଶ୍ବର ମନ୍ଦିର ପରିସର ଆଶ୍ରମରେ ରହିଯାଇଥିଲେ। ଗତ ଏପ୍ରିଲ ୨୦୨୪ରେ ଟୋନିଙ୍କ ଭିସା ଅବଧି ଶେଷ ହୋଇଥିଲା । ହେଲେ ସେ ଆଉ ଫେରି ପାରିନଥିଲେ। ଏ ସମ୍ପର୍କରେ ହାଇଦ୍ରାବାଦରେ ଥିବା ବୈଦେଶିକ ମନ୍ତ୍ରଣାଳୟକୁ ଅବଗତ କରାଯାଇଥିଲା । ପୁରୀ ଏସପିଙ୍କ ନିର୍ଦ୍ଦେଶରେ ଶୁକ୍ରବାର ଫ୍ରାନ୍ସ ପର୍ଯ୍ୟଟକ ଟୋନିଙ୍କୁ କୋଣାର୍କ କୋର୍ଟ ଚାଲାଣ କରାଯାଇଥିବା କୋଣାର୍କ ଥାନା ଆଇଆଇସି ପୂର୍ଣ୍ଣଚନ୍ଦ୍ର ସେଠୀ ସୂଚନା ଦେଇଛନ୍ତି।
