ଉଦଳା, ୦୧/୦୩: ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଶନିବାର ମୟୂରଭଞ୍ଜ ଜିଲ୍ଲା କପ୍ତିପଦା ଉପଖଣ୍ଡ ଉଦଳାକୁ ପ୍ରଥମଥର ପାଇଁ ଗସ୍ତ କରିବେ । ଉଦଳା କଲେଜ ପଡ଼ିଆରେ ହେଲିକାପ୍ଟର ଯୋଗେ ଆସି ଖଲାଡି ପଞ୍ଚାୟତ ପାଟପୁର ପଡ଼ିଆରେ ଆୟୋଜିତ କାର୍ଯ୍ୟକ୍ରମରେ ଯୋଗ ଦେବେ । ନିର୍ବାଚନ ମଣ୍ଡଳୀର ବିଭିନ୍ନ ପ୍ରକଳ୍ପର ଶିଳାନ୍ୟାସ କରିବା ସହ ପ୍ୟାକେଜ ଘୋଷଣା କରିବେ ବୋଲି ଜଣାପଡ଼ିଛି । ଉଦଳା ବିଧାୟକ ଭାସ୍କର ମଢ଼େଇଙ୍କ ନେତୃତ୍ୱରେ ଜିଲ୍ଲା ପ୍ରଶାସନ ଓ ଭାରତୀୟ ଜନତା ପାର୍ଟି ଦିନରାତି ଏକ କରି ଦେଇଛି ।
ମୁଖ୍ୟମନ୍ତ୍ରୀଙ୍କ ଗସ୍ତକୁ ନେଇ ଉଦଳାବାସୀ ଉତ୍ସାହିତ ହୋଇପଡିଛନ୍ତି । ଜିଲ୍ଲା ପ୍ରଶାସନ ପକ୍ଷରୁ ଜିଲ୍ଲାପାଳ ହେମକାନ୍ତ ସଏ, ଉପଜିଲ୍ଲାପାଳ ଶୁଶାନ୍ତ ବାରିକଙ୍କ ସମେତ ସମସ୍ତ ଅଧିକାରୀ ମୁଖ୍ୟମନ୍ତ୍ରୀଙ୍କ ଗସ୍ତରେ ଯେପରି କୌଣସି ସମସ୍ୟା ନ ଉପୁଜେ ସେଦିଗରେ ନଜର ରଖିଛନ୍ତି ।ପୁଲିସ ପ୍ରଶାସନ ପକ୍ଷରୁ ସୁରକ୍ଷା ଓ ଟ୍ରାଫିକ ସମସ୍ୟା ପ୍ରତି ବିଶେଷ ଗୁରୁତ୍ୱ ଦେଉଥିବା ବେଳେ ଏସପି ବରୁଣ ଗୁଣ୍ଠୁପାଲୀଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ୭ପ୍ଲାଟୁନ ପୁଲିସ ଫୋର୍ସ ସହିତ ୬୦ ଗୃହରକ୍ଷୀଙ୍କୁ ମୁତୟନ କରାଯାଇଛି । ଅତିରିକ୍ତ ପୁଲିସ ଅଧୀକ୍ଷକ ଦୀପକ ଗୋଛାୟତ, ଉପଖଣ୍ଡ ପୁଲିସ ଅଧିକାରୀ ହୃଷିକେଶ ନାୟକ, ଉଦଳା ଥାନା ଅଧିକାରୀ ବନମାଳୀ ବାରିକଙ୍କ ସମେତ ୧୦ରୁ ଅଧିକ ଇନ୍ସପେକ୍ଟର, ଏସ୍ଆଇ, ଏଏସ୍ଆଇ ଦାୟିତ୍ୱରେ ରହିଛନ୍ତି । ଗସ୍ତ ସମୟରେ ଉଦଳା-ବାରିପଦା ରାଜ୍ୟ ରାଜପଥ ୧୯ରେ ଯାତାୟାତ ୧ ଘଣ୍ଟା ପାଇଁ ବିକଳ୍ପ ବ୍ୟବସ୍ଥା କରାଯିବ ବୋଲି ସୂଚନା ମିଳିଛି । ଉଦଳା କଲେଜ ପଡ଼ିଆରୁ ମୁଖ୍ୟମନ୍ତ୍ରୀ କାରକେଡରେ ଆସିବାର କାର୍ଯ୍ୟକ୍ରମ ରହିଥିବା ବେଳେ ଏକ କିମି ରାସ୍ତାରେ ଶୁକ୍ରବାର ମକଡ୍ରିଲ କରାଯାଇଛି । ଅପରପକ୍ଷେ ଉଦଳାବାସୀ ମୁଖ୍ୟମନ୍ତ୍ରୀଙ୍କ ପ୍ରଥମ ଗସ୍ତକୁ ନେଇ ରେଳସେବା, ପୌର ପରିଷଦ ମାନ୍ୟତା, କେନ୍ଦ୍ରୀୟ ବିଦ୍ୟାଳୟ ଓ ସାନ ବ୍ୟାରେଜ ନିର୍ମାଣ ପ୍ରସଙ୍ଗ ପ୍ରତି ଆଶାବାଦୀ ଥିବା ଆଲୋଚନା ହେଉଛି।
