ଭୁବନେଶ୍ୱର,୦୧/୦୩: ବୈଶାଖରେ ଖରା ଫ୍ୟାସନ୍କୁ ଆପଣାଉଥିବା ମହିଳା ଏ ବର୍ଷ ଫାଲଗୁନରୁ ଗରମ ପାଇଁ ସଜବାଜ ଆରମ୍ଭ କରିଦେଲେଣି । କିଏ ବଜାରକୁ ଯାଇ ହାଲୁକା ସୁତା ବସ୍ତ୍ର କିଣିବାରେ ଲାଗିପଡ଼ିଲେଣି ତ ଆଉ କିଏ ତ୍ୱଚା ପାଇଁ ସନ୍ସ୍କ୍ରିନ୍ ଲୋସନ୍ ଅର୍ଡର କଲେଣି । ଗ୍ରାହକଙ୍କ ଚାହିଦାକୁ ଦେଖି ଦୋକାନୀ ମଧ୍ୟ ଭଳିକି ଭଳି ଖରା ସାମଗ୍ରୀର ପସରା ମେଲାଇଲେଣି ।
ଆଖିରେ ଚଷମା, ହାତରେ ଗ୍ଲୋଭ୍ସ
ଆଖିର ସୁରକ୍ଷା ପାଇଁ ମହିଳା ୟୁଭି ପ୍ରୋଟେକ୍ସନ ଚଷମା କିଣିବା ଆରମ୍ଭ କରିଦେଲେଣି । ଏହାଦେଖି ସୋ’ ରୁମଠାରୁ ଆରମ୍ଭ କରି ବିଭିନ୍ନ ଚଷମା ଦୋକାନ ପର୍ଯ୍ୟନ୍ତ ସବୁଠି ଭଳିକି ଭଳି ଚଷମା ବିକ୍ରି ହେଲାଣି । ପିଲାଙ୍କ ପାଇଁ ମଧ୍ୟ ଛୋଟ ଛୋଟ ଚଷମା ବିକ୍ରି ହେଉଛି ଯାହାକୁ ଅଭିଭାବକ କିଣୁଛନ୍ତି । ଏହି ଚଷମା ୧୫୦ ଟଙ୍କାରୁ ଆରମ୍ଭ ହେଉଥିବାବେଳେ ବଡ଼ଙ୍କ ଚଷମା ୨୫୦ ଟଙ୍କାରୁ ଆରମ୍ଭ ହେଉଛି । ତା’ ସାଙ୍ଗକୁ ହାତ ପାଇଁ ହ୍ୟାଣ୍ଡ୍ଗ୍ଲୋଭ୍ସ । ହାତକୁ ସୂର୍ଯ୍ୟଙ୍କ ପ୍ରଖର କିରଣରୁ ରକ୍ଷା କରିବା ପାଇଁ ମହିଳା ଏହାକୁ ବ୍ୟବହାର କରୁଛନ୍ତି । ବିଶେଷ କରି କର୍ମଜୀବୀ ମହିଳାମାନେ ଗାଡ଼ି ଚଲାଇବା ବେଳେ ଏହାକୁ ପିନ୍ଧିବାକୁ ଅଧିକ ପସନ୍ଦ କରୁଛନ୍ତି ଯାହାର ମୂଲ୍ୟ ୫୦ ଟଙ୍କାରୁ ଆରମ୍ଭ ହେଉଛି ।
ଟ୍ରେଣ୍ଡ୍ରେ ଫ୍ଲାୱାର ପ୍ରିଣ୍ଟ୍ ପୋଷାକ
ମହିଳାଙ୍କ ଟ୍ରେଣ୍ଡ ତାଲିକାରେ ଯୋଡ଼ିହୋଇଯାଇଛି ହାଲୁକା ଫ୍ଲାୱାର ପ୍ରିଣ୍ଟ୍ ପୋଷାକ । ଏହାର କପଡା଼ ପ୍ରାୟ ସୁତା ରହୁଛି । ମହିଳାମାନେ ଏହାକୁ ଢିଲା ପିନ୍ଧିବାକୁ ପସନ୍ଦ କରୁଛନ୍ତି । ଏହାବାଦ୍ ଧଳା ରଙ୍ଗର ସୁତା ଓଢ଼ଣୀ କିଣିବା ପାଇଁ ମହିଳା ଇଛା କରୁଛନ୍ତି । ମୁଖ୍ୟତଃ କର୍ମଜୀବୀ ଏବଂ କଲେଜ ପଢୁଆ ଝିଅମାନେ ଏହାକୁ ପରିଧାନ କରୁଛନ୍ତି । ଏହାବାଦ୍ ପୁରୁଷ ଲୋକମାନେ ଟାଇଁଟାଇଁ ଖରାରୁ ମୁକ୍ତି ପାଇବା ପାଇଁ ଟୋପି ପିନ୍ଧୁଛନ୍ତି ।
କିଣା ସରିଲାଣି ସନ୍ସ୍କ୍ରିନ୍
ସୂର୍ଯ୍ୟଙ୍କର ପ୍ରଖର କିରଣରୁ ତ୍ୱଚାକୁ ରକ୍ଷା କରିବା ପାଇଁ ମହିଳାମାନେ କିଣିସାରିଲେଣି ସନ୍ସ୍କ୍ରିନ । ଏଥିପାଇଁ କିଏ ଅନ୍ଲାଇନ୍ରେ ଅର୍ଡର କରୁଛନ୍ତି ତ ଆଉ କିଏ ନିଜ ପ୍ରିୟ ପ୍ରସାଧନ ଦୋକାନରୁ କିଣୁଛନ୍ତି । ମୁଖ୍ୟତଃ ଅଧିକ ଏସ୍ପିଏଫ୍ (ସନ୍ ପ୍ରୋଟେକ୍ସନ୍ ଫ୍ୟାକ୍ଟର) ଥିବା ସନ୍ସ୍କ୍ରିନ୍ କିଣିବାକୁ ମହିଳା ପସନ୍ଦ କରୁଛନ୍ତି । ଏଥିସହିତ ଅଧିକାଂଶ ମହିଳା ଅର୍ଗାନିକ୍ ସନ୍ସ୍କ୍ରିନ୍ ମଧ୍ୟ କିଣୁଛନ୍ତି ।
ସୁରକ୍ଷା ଦେଉଛି ଛତା
ଟାଇଁ ଟାଇଁ ଖରାରେ ସୁରକ୍ଷା ଦେଉଛି ଛତା । ବିଶେଷକରି ବାଟୋଇ ଏବଂ ଶିକ୍ଷାର୍ଥୀମାନେ ଏହାକୁ ଅଧିକ ବ୍ୟବହାର କରୁଛନ୍ତି । ଏମାନଙ୍କ ପାଇଁ ଛତା ପାଲଟିଛି ସୁରକ୍ଷା କବଚ । ଖରାକୁ ଦେଖି ଅଧିକାଂଶ ଲୋକ କଳା ରଙ୍ଗର ଛତା କିଣିବାକୁ ଆଗ୍ରହ ପ୍ରକାଶ କରୁଛନ୍ତି ।
