ଧୂଷୁରୀ,୨୪/୦୫(ସନ୍ତୋଷ ଦାସ): ୫୦ ଫୁଟ୍ ଧସିଲା କୋଚିଳା ନଦୀର ଡାହାଣ ପାର୍ଶ୍ୱ ନଦୀବନ୍ଧ । ନିମ୍ନମାନର କାର୍ଯ୍ୟ ଯୋଗୁ ବନ୍ଧ ଧସିଥିବା ଅଭିଯୋଗ ହୋଇଛି । କିଛି ଦିନ ତଳେ ୩୦ଲକ୍ଷ ଟଙ୍କା ବ୍ୟୟ ଅଟକଳରେ ନଦୀବନ୍ଧ ମରାମତି ହୋଇଥିଲା । ମାତ୍ର ଏହା ପୁଣି ଥରେ ଦବିଯାଇଛି । 

ସୂଚନା ଅନୁଯାୟୀ, ଭଦ୍ରକ ଜିଲ୍ଲା ଧାମନଗର ବ୍ଲକ୍ ସଇଲୋ ଗାଁ ନିକଟ ଦେଇ ପ୍ରବାହିତ ହୋଇଥିବା କୋଚିଳା ନଦୀର ଡାହାଣ ପାର୍ଶ୍ବ ବନ୍ଧ ଧସିଯାଇଛି । ନଦୀବନ୍ଧ ପ୍ରାୟ ୫୦ ଫୁଟ୍ ଧସିଯାଇଥିବା ଦେଖିବାକୁ ମିଳିଛି । ନିମ୍ନମାନର ମରାମତି କାର୍ଯ୍ୟ ପାଇଁ ବନ୍ଧ ଧସିଯାଇଛି ବୋଲି ଗ୍ରାମବାସୀ ଅଭିଯୋଗ କରିଛନ୍ତି । ଗାଁ ଲୋକଙ୍କ କହିବା କଥା, ପୂର୍ବରୁ ସମାନ ସ୍ଥାନରେ ନଦୀବନ୍ଧରେ ଫାଟ ସୃଷ୍ଟି ହୋଇଥିଲା । ଏହାର ମରାମତି ନିମନ୍ତେ ୩୦ ଲକ୍ଷ ଟଙ୍କାର ବ୍ୟୟ ଅଟକଳ କରାଯାଇଥିଲା । ହେଲେ ନିମ୍ନମାନର କାର୍ଯ୍ୟ ପାଇଁ ଏବେ ପୁଣି ଥରେ ନଦୀ ବନ୍ଧ ଧସିଛି । ବାରମ୍ବାର ଏଭଳି ଘଟଣା ଘଟିବାକୁ ନେଇ ବିଭାଗୀୟ ଅଧିକାରୀଙ୍କୁ ଦୋଷ ଦେଇଛନ୍ତି ସ୍ଥାନୀୟ ବାସିନ୍ଦା। ଅନ୍ୟପଟେ ଆଗକୁ ବର୍ଷା ଋତୁ ରହିଥିବାରୁ ଦୁର୍ବଳ ନଦୀବନ୍ଧକୁ ନେଇ ଭୟଭୀତ ହୋଇଛନ୍ତି ଲୋକେ ।