ଭୁବନେଶ୍ଵର, ୧୬/୦୧ : ଯାଜପୁର ଜିଲ୍ଲାର ପ୍ରସିଦ୍ଧ ବୌଦ୍ଧ ବିହାର ଉଦୟଗିରିରେ ଅନ୍ତର୍ଜାତୀୟ ବୌଦ୍ଧ ସମ୍ମିଳନୀ ଅନୁଷ୍ଠିତ ହୋଇଛି। ଯାହାକୁ ନେଇ ବିଶ୍ୱ ପ୍ରସିଦ୍ଧ ବୌଦ୍ଧ ବିହାର ତଥା ହୀରକ ତ୍ରିଭୁଜ କୁହାଯାଉଥିବା ଲଳିତଗିରି, ଉଦୟଗିରି ଓ ରତ୍ନଗିରି ପୀଠ ଚଳଚଞ୍ଚଳ ହୋଇଛି। ଗୁରୁ ପଦ୍ମସମ୍ଭବଙ୍କ ବୌଦ୍ଧ ମନ୍ତ୍ର ଗାନ ଓ ପ୍ରାର୍ଥନାରେ ପୁରା ପରିବେଶ ଗୁଞ୍ଜରିତ ହେଉଛି। ବୌଦ୍ଧ ସମ୍ମିଳନୀରେ ୧୭ଟି ରାଷ୍ଟ୍ରରୁ ପାଖାପାଖି ୧୫ଶହ ବୌଦ୍ଧ ସନ୍ୟାସୀ ଯୋଗ ଦେଇଛନ୍ତି। ପ୍ରତ୍ୟେହ ବିଭିନ୍ନ ପ୍ରସଙ୍ଗରେ ଆଲୋଚନା ଚକ୍ର ଅନୁଷ୍ଠିତ ହେଉଛି। ବୌଦ୍ଧ ବିହାରକୁ ପର୍ଯ୍ୟଟକଙ୍କ ସୁଅ ଛୁଟୁଛି।
ସୂଚନାନୁଯାୟୀ, ଉଦୟଗିରି ଠାରେ ଅନ୍ତର୍ଜାତୀୟ ବୌଦ୍ଧ ସମ୍ମିଳନୀ ଚାଲିଛି। ଏହି ସମାରୋହରେ ଦେଶ ବିଦେଶରୁ ଆସିଥିବା ବିଭିନ୍ନ ବୌଦ୍ଧ ଭିକ୍ଷୁ ଓ ପ୍ରତିନିଧି ମଣ୍ଡଳୀ ପବିତ୍ର ଧର୍ମଗ୍ରନ୍ଥ ପାଠ କରୁଛନ୍ତି। ଉଦୟଗିରିର ମାଧବପୁର ବୌଦ୍ଧ ବିହାର ଅଗଣାରେ ବିନୟ ପିଟକ ଗ୍ରନ୍ଥର ଅଧ୍ୟାୟ ପାଠ କରାଯାଉଛି। ସେହିପରି ମହାସ୍ତୁପର ପଛ ପାର୍ଶ୍ଵରେ ଆହୋରାତ୍ର ଶତାଧିକ ଦୀପ ପ୍ରଜ୍ବଳିତ କରି ରଖାଯାଇଛି। ମହାବିହାରକୁ ଯାଇଥିବା ରାସ୍ତାରେ ଅସ୍ଥାୟୀ ତମ୍ବୁ ଶିବିର କରାଯାଇଛି। ସାରାରାତି ସେଠାରେ ପ୍ରାର୍ଥନା ସହିତ ବୌଦ୍ଧ ଭିକ୍ଷୁମାନେ ମନ୍ତ୍ର ଉଚ୍ଚାରଣ କରୁଛନ୍ତି। ଏପଟେ ବୌଦ୍ଧ ସମ୍ମିଳନୀ ପାଇଁ ପର୍ଯ୍ୟଟକ ଓ ବୌଦ୍ଧ ପ୍ରେମୀଙ୍କ ସମାଗମ ହେଉଥିବା ଦେଖିବାକୁ ମିଳିଛି। ପ୍ରଥମ ଥର ପାଇଁ ଓଡ଼ିଶାର ଉଦୟଗିରି ଠାରେ ଅନୁଷ୍ଠିତ ଏହି ଅନ୍ତର୍ଜାତୀୟ ବୌଦ୍ଧ ସମ୍ମିଳନୀରେ ୧୭ଟି ରାଷ୍ଟ୍ରରୁ ପାଖାପାଖି ୧୫ଶହ ବୌଦ୍ଧ ସନ୍ୟାସୀ ଯୋଗ ଦେଇଛନ୍ତି। ସେମାନଙ୍କୁ ଆତିଥ୍ୟ ଦେବା ସହ ରହଣୀ ପାଇଁ ପ୍ରଶାସନ ପକ୍ଷରୁ ସମସ୍ତ ପ୍ରକାର ବ୍ୟବସ୍ଥା କରାଯାଇଛି।
