ଭୁବନେଶ୍ୱର,୧୬/୦୧: ଏବେ ଆଉ ୬୦ ବର୍ଷରୁ ଅଧିକ ବୟସ୍କ ନେତାଙ୍କୁ ରାଜ୍ୟ କଂଗ୍ରେସର ମଙ୍ଗୁଆଳ କରାଯିବ ନାହିଁ । ଯିଏ ରାଜ୍ୟ ସାରା ଦୌଡ଼ି ପାରିବ, ସେଭଳି ଯୁବନେତାଙ୍କୁ ଦାୟିତ୍ୱ ଦିଆଯିବ । କଂଗ୍ରେସ ଭବନଠୁ ଆରମ୍ଭ କରି ସାରା ରାଜ୍ୟରେ କଂଗ୍ରେସ ନେତାଙ୍କ ଭିତରେ ଏଭଳି ଚର୍ଚ୍ଚା ଜୋର ଧରିଛି । ଏହି ଚର୍ଚ୍ଚା ମଧ୍ୟରେ କଂଗ୍ରେସର କିଛି ଯୁବନେତାଙ୍କ ନାମ ବି ଚର୍ଚ୍ଚାକୁ ଆସିଛି । ବିଶେଷ କରି କଂଗ୍ରେସର ଓଡ଼ିଶାରୁ ଜିତିଥିବା ଏକମାତ୍ର ସାଂସଦ ସପ୍ତଗିରି ଉଲ୍ଲାକାଙ୍କ ନାମ ଆଗରେ ରହିଛି । ଏହା ବ୍ୟତୀତ ପୂର୍ବତନ କଟକ ବାରବାଟୀ ବିଧାୟକ ମହମ୍ମଦ ମୋକିମ, ସାନଖେମୁଣ୍ଡି ବିଧାୟକ ରମେଶ ଜେନାଙ୍କ ନାମରେ ମଧ୍ୟ ଚର୍ଚ୍ଚା ହେଉଛି । ସପ୍ତଗିରି ଓ କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମଙ୍କୁ ଦିଲ୍ଲୀରୁ ଡାକରା ଆସିବା ପରେ ଏହି ଚର୍ଚ୍ଚା ଅଧିକ ଜୋର ଧରିଛି ।
ବରିଷ୍ଠ କଂଗ୍ରେସ ନେତାଙ୍କ କହିବା ଅନୁସାରେ ଆଗାମୀ ଦିନରେ କଂଗ୍ରେସକୁ ଅଧିକ ଶକ୍ତିଶାଳୀ କରାଯିବ । ୨୦୨୯ ନିର୍ବାଚନ ପାଇଁ ଦଳ ଏବେଠୁ ବ୍ଲୁ ପ୍ରିଣ୍ଟ ପ୍ରସ୍ତୁତ କରିବ । ପ୍ରତିଟି ପ୍ରସଙ୍ଗରେ ଦଳ ତାର ସ୍ୱରକୁ ଶାଣିତ କରିବ । ସେ ଦରଦାମ ବୃଦ୍ଧି ହେଉ କି ରାଜ୍ୟରେ ଆଇନଶୃଙ୍ଖଳା ପରିସ୍ଥିତି, ଚାଷୀ ଆତ୍ମହତ୍ୟା ସମେତ ସମସ୍ତ ପ୍ରସଙ୍ଗରେ କଂଗ୍ରେସ ଲଢ଼େଇ କରିବ । ଦଳର ହାଇକମାଣ୍ଡ ରାଜ୍ୟ କଂଗ୍ରେସର ଦୁଇ ବରିଷ୍ଠ ନେତାଙ୍କୁ ହଠାତ୍ ଦିଲ୍ଲୀ ଡକରା ପରେ ଏବେ ରାଜ୍ୟ କଂଗ୍ରେସ ଶିବିର ବେଶ ଚଳଚଞ୍ଚଳ ହୋଇପଡ଼ିଛି । ଗୋଟିଏ ପଟେ ପିସିସି ସଭାପତି ଚୟନ ନେଇ ଚର୍ଚ୍ଚା ଜୋର ଧରିଥିବା ବେଳେ ସେପଟେ ଆସନ୍ତା ୨୦ ତାରିଖରେ ଯୁବକଂଗ୍ରେସର ରାଷ୍ଟ୍ରୀୟ ସଭାପତି ଉଦୟଭାନୁ ଚିବ୍ ଓଡ଼ିଶା ଆସୁଛନ୍ତି । ତାଙ୍କ ଗସ୍ତ ବେଳେ ଲୋୟର୍ ପିଏମଜିରେ ଏକ ବିଶାଳ ଯୁବ ସମାବେଶ କରାଯିବ । ସମାବେଶକୁ ସଫଳ କରିବା ପାଇଁ ଯୁବକଂଗ୍ରେସର ରାଷ୍ଟ୍ରୀୟ ସମ୍ପାଦକ ଓଡ଼ିଶା ଆସି ଡେରା ପକାଇଛନ୍ତି । କାର୍ଯ୍ୟକ୍ରମକୁ ସଫଳ କରିବା ପାଇଁ ଏକ କମିଟି ମଧ୍ୟ ଗଢ଼ିଛନ୍ତି। ଏହି କମିଟିରେ ଯୁବକଂଗ୍ରେସର ପୂର୍ବତନ ସଭାପତି ରଣଜିତ ପାତ୍ରଙ୍କୁ ଆବାହକ ଭାବେ ନିଯୁକ୍ତ କରାଯାଇଛି ।
ସେହିପରି ଛାତ୍ର କଂଗ୍ରେସର ପୂର୍ବତନ ରାଜ୍ୟ ସଭାପତି ତଥା ଭୁବନେଶ୍ୱର ଲୋକସଭାରୁ କଂଗ୍ରେସ ପ୍ରାର୍ଥୀ ହୋଇଥିବା ୟାସିର ନୱାଜ ଓ ଯୁବନେତା କୃଷ୍ଣ ଚନ୍ଦ୍ର ମହାନ୍ତିଙ୍କୁ ସଂଯୋଜନା ଦାୟିତ୍ୱ ଦିଆଯାଇଛି । ଏହା ବ୍ୟତୀତ ଯୁବକଂଗ୍ରେସର ନିହାର ରଞ୍ଜନ ବେହେରା, ଗୋପନ ମାର୍ଥା, ସୁଦିପ ସାମଲ, ଅଭିଜିତ ଜେନା, ସ୍ୱାଗତ କର, ମହମ୍ମଦ ଗୁଲଫାମ, ମହମ୍ମଦ ପରୱେଜ, କେଦାର ଦଳାଇ, ଲିପିକା ମାଝି ପ୍ରମୁଖଙ୍କୁ ଯୁବକଂଗ୍ରେସର ବିକ୍ଷୋଭ ସଫଳ କରିବାକୁ ଦାୟିତ୍ୱ ଦିଆଯାଇଛି।
