ଭୁବନେଶ୍ୱର ୧୨/୦୫: ଆମ ଦେଶରେ ଅନେକ ଗ୍ରନ୍ଥ ଲେଖାଯାଇଛି,ପଢ଼ାଯାଇଛି । କିନ୍ତୁ ଏକ ଗ୍ରନ୍ଥକୁ ନେଇ ଏପରି ବିଶ୍ୱାସ ରହିଛି ଯେ ଯାହାକୁ ପଢ଼ିବା ପାଇଁ ଯେକେହି ସାହସ ଜୁଟାଇପାରେ ନାହିଁ । ଏହି ଗ୍ରନ୍ଥଟି ଅଭିଶପ୍ତ ବୋଲି କୁହାଯାଏ । ଲୀଳାବତୀ ଗ୍ରନ୍ଥ ହେଉଛି ଏହି ଅଭିଶପ୍ତ ଗ୍ରନ୍ଥ । ଯିଏ ଏହି ଗ୍ରନ୍ଥକୁ ପାଠ କରିବ ତାହାର ଅକାଳ ମୃତ୍ୟୁ ହେବ କିମ୍ବା ତା’ର ମାନସିକ ବିକୃତି ଘଟିବ ବୋଲି ଅନ୍ଧବିଶ୍ୱାସ କରାଯାଏ । ଜନଶ୍ରୁତି ଅନୁସାରେ ଲୀଳାବତୀ ଗ୍ରନ୍ଥକୁ ଜଣେ ଯକ୍ଷଣୀ ଲେଖିଛନ୍ତି । ଆଉ କେହି କହନ୍ତି ଜଣେ ବଡ଼ ତାନ୍ତ୍ରିକ ଏହି ଗ୍ରନ୍ଥର ଲେଖକ । ତେବେ ତାନ୍ତ୍ରିକଙ୍କ ଦ୍ୱାରା ଏହା ଲେଖାଯାଇଥିବାର ଅଧିକାଂଶଙ୍କ ମତ ।
କୁହାଯାଏ ଯେ,ପ୍ରାଚୀନ କାଳରେ ଜଣେ ଶକ୍ତିଶାଳୀ ତାନ୍ତ୍ରିକ ଲୀଳାବତୀ ନାମକ ଜଣେ ତରୁଣୀଙ୍କ ପ୍ରେମରେ ପଡ଼ିଥିଲେ । ସେହି ତରୁଣୀ ତାନ୍ତ୍ରିକଙ୍କୁ ପ୍ରତ୍ୟାଖ୍ୟାନ କରିବାରୁ ତାନ୍ତ୍ରିକ ଜଣକ ହତାଶ ତଥା ଭୀଷଣ କ୍ରୋଧିତ ହୋଇ ଲୀଳାବତୀଙ୍କୁ ଅଭିଶାପ ଦେଇଥିଲେ । ଏଥିସହିତ ଲୀଳାବତୀଙ୍କୁ ନେଇ ଲେଖିଥିଲେ ଏକ ଗ୍ରନ୍ଥ । ଲୀଳାବତୀଙ୍କ ପରି ଏହି ଗ୍ରନ୍ଥଟି ମଧ୍ୟ ସେହି ତାନ୍ତ୍ରିକଙ୍କ ଅଭିଶାପର ଶିକାର ହୋଇଥିଲା । ସେବେଠାରୁ ଏହି ଗ୍ରନ୍ଥଟି ଯିଏ ପଢ଼ିଛି ସେ ନିଶ୍ଚୟ ତଳିତଳାନ୍ତ ହୋଇଯାଇଛି ବୋଲି କୁହାଯାଏ । ଗ୍ରନ୍ଥଟି ଏବେ କେଉଁଠାରେ କେଉଁ ପୁସ୍ତକାଗାରରେ ରହିଛି କି ନାହିଁ ତାହା କେହି ଜାଣନ୍ତି ନାହିଁ । ଲୀଳାବତୀ ଗ୍ରନ୍ଥ ନେଇ ଜନଶ୍ର୍ରୁତି ମହାରାଷ୍ଟ୍ର ତଥା ଦକ୍ଷିଣ ଭାରତରେ ବିଶେଷ ପ୍ରଚଳିତ । ଲୀଳାବତୀ ଗ୍ରନ୍ଥର କିଛି ଅଂଶ ଇଣ୍ଟରନେଟ୍ ଯୋଗେ ଉପଲବ୍ଧ ସତ, ମାତ୍ର ତାହା ଅସଲି କି ନକଲି ତାହା କହିହେଉ ନାହିଁ ।
