ରିସ୍କ ଟେକର : ଟାଟା କୁହନ୍ତି ରିସ୍କ ନ ନେବା ହିଁ ସବୁଠୁ ବଡ଼ ରିସ୍କ । ଏହା ତାଙ୍କ କାର୍ଯ୍ୟଧାରାରେ ଦେଖାଯାଉଥିଲା । ତାଙ୍କ ଭଳି କୌଣସି ଭାରତୀୟ ବିଜନେସ ଲିଡର ବିଶ୍ୱ ବଜାରର ବଡ଼ କମ୍ପାନିଙ୍କୁ ଅଧିଗ୍ରହଣ କରିବାରେ ଏତେଟା ସଫଳ ନୁହଁନ୍ତି । ଜାଗୁଆର ଲ୍ୟାଣ୍ଡରୋଭରଠାରୁ ଆରମ୍ଭ କରି ଇସ୍ପାତ କମ୍ପାନି କୋରସ, ବିଶ୍ୱର ଦ୍ୱିତୀୟ ବଡ଼ ଚା ଉତ୍ପାଦନକାରୀ ତିତ୍ଲୀର ସେ ଅଧିଗ୍ରହଣ କରିଥିଲେ, ଯାହା ଟାଟା ଟି ଠାରୁ ଥିଲା ୩ ଗୁଣ ବଡ଼ ।
ଦୃଢ଼ ନିଷ୍ପତ୍ତି: ଟାଟା କହୁଥିଲେ ମୁଁ ଠିକ୍ ନିଷ୍ପତ୍ତି ନେଇଛି କି ନାହିଁ, ତାହା ଉପରେ କେବେ ସନ୍ଦେହ କରେ ନାହିଁ । ଯାହା କିଛି ନିଷ୍ପତ୍ତି ନେଇଛି ସେହି କାମକୁ ଠିକ୍ ଭାବେ କରିବାକୁ ଧ୍ୟାନ ଦେଇଥାଏ । ଏକଥାକୁ ମଧ୍ୟ ସେ କାମରେ କରି ଦେଖାଇଥିଲେ । ପାସେଞ୍ଜର କାର ନିର୍ମାଣକୁ ନେଇ ଉଭୟ ଦେଶ ଏବଂ ବିଦେଶରେ ଟାଟାଙ୍କୁ ସମାଲୋଚନା ଶୁଣିବାକୁ ପଡ଼ିଥିଲା । କମ୍ପାନି ବନ୍ଦ ହେବା ସ୍ଥତି ଆସିଥିଲା । ତେବେ ସେ ଟାଟା ମୋଟର୍ସକୁ ଧୈର୍ଯ୍ୟର ସହ ଆଧୁନିକୀକରଣ ଏବଂ ସଫଳ କରାଇଥିଲେ । ସେହିଭଳି କୋରସ ଅଧିଗ୍ରହଣ ନିଷ୍ପତ୍ତି ଠିକ୍ ବୋଲି ପ୍ରମାଣିତ କରିଥିଲେ ଟାଟା ।
ଭିନ୍ନ ଚିନ୍ତାଧାରା: ସବୁବେଳେ ଭିନ୍ନ କରିବା ଏବଂ ବଡ଼ କରିବା ଟାଟାଙ୍କର ଲକ୍ଷ୍ୟ ଥିଲା । ଏତେ ବଡ଼ ବ୍ୟବସାୟିକ ପରିବାରରୁ ଆସିଥିଲେ ମଧ୍ୟ ବିଳାସବ୍ୟସନ ଛାଡି ସେ ଭିନ୍ନ କରିବା ପଛରେ ଲାଗି ରହିଥିଲେ । ତାଙ୍କ ଅନ୍ୟତମ ପ୍ରକଳ୍ପ ନାନୋ ବିଫଳ ହୋଇଥିଲେ ମଧ୍ୟ ୧ ଲକ୍ଷ ଟଙ୍କାର କାର୍କୁ ଚାରି ଆଡୁ ବେଶ୍ ପ୍ରଶଂସା ମିଳିଥିଲା । ଟାଟା ଇଣ୍ଡିକା, ଟାଟା ସଫାରୀ ତାଙ୍କର ସଫଳ ଉତ୍ପାଦ । ଏକଦା ଟାଟା କହିଥିଲେ, ଯେଉଁ କ୍ଷେତ୍ରରେ ଲୋକେ କିଛି କରିବାକୁ ଡରୁଥିଲେ ସେଭଳି କ୍ଷେତ୍ରରେ କିଞ୍ଚିତ ମାତ୍ର କାମ କରିଥିଲେ ବି ଖୁସି । ଏହା ସାରା ଜୀବନ ପାଇଁ ସନ୍ତୋଷ ଦେଇଥାଏ ।
ନେତୃତ୍ୱ: ଟାଟାଙ୍କୁ ଜଣେ ବଡ଼ ଟିମ୍ ଲିଡର ବୋଲି ବିବେଚନା କରାଯାଏ । ସେ ଥରେ କହିଥିଲେ ପ୍ରକୃତ ଲିଡର ତାଙ୍କ ଚର୍ତୁପାଶ୍ୱର୍ରେ ତାଙ୍କ ଠାରୁ ବୁଦ୍ଧିମାନ ଲୋକଙ୍କ ସହ ରହିଥାନ୍ତି । ଟାଟା ସବୁବେଳେ କମ୍ପାନି ଲାଗି ସ୍ପଷ୍ଟ ଲକ୍ଷ୍ୟ ରଖୁଥିଲେ । ସେହି ଲକ୍ଷ୍ୟ ହାସଲ କରିବା ଲାଗି ଟିମ୍କୁ ଉତ୍ସାହିତ କରୁଥିଲେ । କର୍ମଚାରୀଙ୍କ ଖରାପ ସମୟରେ ତାଙ୍କ ସହ ଛିଡ଼ା ହେଉଥିଲେ । ଗତ ୨ ବର୍ଷ ପୂର୍ବେ କମ୍ପାନିର ଜଣେ କର୍ମଚାରୀଙ୍କୁ ଭେଟିବା ଲାଗି ସେ ମୁମ୍ବାଇରୁ ପୁନେ ପହଞ୍ଚି ଯାଇଥିଲେ ।
ଉଦ୍ଭାବନ: ଟାଟା କହୁଥିଲେ ଷ୍ଟାର୍ଟଅପ୍ଗୁଡିକର ଭବିଷ୍ୟତ ସେତେବେଳେ ଉଜ୍ଜ୍ୱଳ ହେବ ଯେବେ ସେଥିରେ ଉଦ୍ଭାବନ ହେବ । ନୂଆ ପ୍ରୟୋଗ ଦ୍ୱାରା ଷ୍ଟାର୍ଟଅପଗୁଡିକର ସଫଳତା ହାର ବଢ଼ିଥାଏ । ଉଦ୍ଭାବନ କରିଥିବା ବିଭିନ୍ନ ଷ୍ଟାର୍ଟଅପ୍ରେ ଟାଟା ନିବେଶ କରିଛନ୍ତି । ଓଲା ଇଲେକ୍ଟ୍ରିକ, ଲେନ୍ସକାର୍ଟ, ପେଟିଏମ୍ ଭଳି କମ୍ପାନି ଏହି ତାଲିକାରେ ସାମିଲ ରହିଛନ୍ତି ।
