ମୁମ୍ବାଇ ୨୨/୦୬: ‘ରାଞ୍ଝଣା’ ଓ ‘ତନୁ ୱେଡ୍‌ସ ମନୁ’ ଭଳି ଫିଲ୍ମ ଜରିଆରେ ଇଣ୍ଡଷ୍ଟ୍ରିରେ ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି ଅଭିନେତ୍ରୀ ସ୍ୱରା ଭାସ୍କର । ସୋସିଆଲ ମିଡିଆରେ ବେପରୁଆ ବୟାନବାଜି ପାଇଁ ମଧ୍ୟ ସେ ଖୁବ୍‌ ପରିଚିତ । ନିକଟରେ ଏକ ସାକ୍ଷାତକାରରେ ସ୍ୱରା କହିଥିଲେ, ନିର୍ଭୀକ ଭାବେ ନିଜ ମତ ରଖୁଥିବାରୁ ସେ ସର୍ବଦା ବିବାଦ ଘେରରେ ରହୁଛନ୍ତି । ସେଥିପାଇଁ ସିନେ ଇଣ୍ଡଷ୍ଟ୍ରିରେ ତାଙ୍କର ଏକ ଭିନ୍ନ ଛବି ସୃଷ୍ଟି ହୋଇଛି । ଏହି କାରଣ ପାଇଁ ଫିଲ୍ମ ନିର୍ମାତା ତାଙ୍କ ସହ କାମ କରିବାକୁ ଚାହୁଁନାହାନ୍ତି । ଏହା ଦେଖି ସ୍ୱରାଙ୍କ ସ୍ୱାମୀ ତାଙ୍କୁ ଚୁପ୍‌ ରହିବାକୁ ପରାମର୍ଶ ଦେଇଛନ୍ତି । 

ସୋସିଆଲ ମିଡିଆ ଆକାଉଣ୍ଟ୍‌ ତାଙ୍କ ପାଇଁ ସବୁଠୁ ମହଙ୍ଗା ହୋଇଛି । କାରଣ ଏହା ଯୋଗୁ ତାଙ୍କ କ୍ୟାରିଅର ଶେଷ ହୋଇଯିବାକୁ ବସିଛି । ଏବେ ଇଣ୍ଡଷ୍ଟ୍ରିରେ ତାଙ୍କୁ ଅଛୁଆଁ ଭଳି ବ୍ୟବହାର କରାଯାଉଥିବା ସେ କହିଛନ୍ତି । କିଛି କାଷ୍ଟିଂ ଡାଇରେକ୍ଟର ସ୍ୱରାଙ୍କୁ କହିଛନ୍ତି, ଫିଲ୍ମରେ ସେମାନେ ତାଙ୍କ ଭଳି ଅଭିନେତ୍ରୀଙ୍କୁ କାଷ୍ଟ୍‌ କରିବାକୁ ଚାହୁଁଛନ୍ତି । କିନ୍ତୁ ତାଙ୍କୁ ନେବାକୁ ଚାହୁଁନାହାନ୍ତି । କାରଣ କୌଣସି ବିବାଦରେ ସେମାନେ ଫସିବାକୁ ଚାହୁଁନଥିବା ସ୍ପଷ୍ଟ କରିଛନ୍ତି । ଶୁଭଚିନ୍ତକ, ନିର୍ଦ୍ଦେଶକ, ପ୍ରଯୋଜକ ବନ୍ଧୁମାନେ ଏ କଥା ନିଜେ ସ୍ୱରାଙ୍କୁ କହିଛନ୍ତି । କିଛି ନିର୍ଦ୍ଦେଶକ କହିଛନ୍ତି, ସେମାନେ ସ୍ୱରାଙ୍କୁ କାଷ୍ଟ୍‌ କରିବାକୁ ଚାହୁଁଛନ୍ତି । କିନ୍ତୁ ପ୍ରଡକ୍ସନ୍‌ ହାଉସ୍‌ରେ ତାଙ୍କ ନାଁକୁ ପ୍ରତ୍ୟାଖ୍ୟାନ କରି ଦିଆଯାଉଛି । ୨୦୨୩ ମସିହାରେ ସ୍ୱରା ସମାଜବାଦୀ ପାର୍ଟିର ନେତା ଫହାଦ ଅହମଦଙ୍କୁ ବିବାହ କରିଥିଲେ । ସେହି ବର୍ଷ ସେପ୍ଟେମ୍ବର ୨୩ରେ ସେ ରାବିୟା ନାମ୍ନୀ ଏକ କନ୍ୟା ସନ୍ତାନ ଜନ୍ମ ଦେଲେ । ବିବାହ ପରଠୁ ସ୍ୱରା ଫିଲ୍ମ ଦୁନିଆଠୁ ଦୂରରେ ରହିଛନ୍ତି ।