ନୂଆଦିଲ୍ଲୀ: ଅଯୋଧ୍ୟା ରାମ ମନ୍ଦିରକୁ ଉଡ଼ାଇ ଦେବା ପାଇଁ ହୋଇଥିବା ଏକ ବଡ ଷଡ଼ଯନ୍ତ୍ରର ପର୍ଦ୍ଦାଫାଶ ହୋଇଛି । ଗୁଜରାଟ ଏବଂ ହରିୟାଣା ATS ଦଳ ଦ୍ୱାରା ଗିରଫ ହୋଇଥିବା ଜଣେ ସନ୍ଦିଗ୍ଧ ଆତଙ୍କବାଦୀ ଏହି ଖୁଲାସା କରିଛି । ଯାହା ପରେ ୟୁପି ସମେତ ଗୁଜରାଟ ଏବଂ ହରିୟାଣାରେ ଆତଙ୍କର ବାତାବରଣ ସୃଷ୍ଟି ହୋଇଛି। ଗୁଜୁରାଟ ATS ଏବଂ ପଲୱାଲ STF ସନ୍ଦିଗ୍ଧ ବ୍ୟକ୍ତିକୁ ଫରିଦାବାଦରୁ ଗିରଫ କରିଛି। ପଚରାଉଚରା ସମୟରେ ସେ ATSକୁ କହିଛି ଯେ, ତାଙ୍କର ଟାର୍ଗେଟ ଅଯୋଧ୍ୟାର ରାମ ମନ୍ଦିର ଥିଲା।

ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଫରିଦାବାଦରୁ ଧରାପଡ଼ିଥିବା ସନ୍ଦିଗ୍ଧ ବ୍ୟକ୍ତି ଏକ ବଡ଼ ଖୁଲାସା କରିଛି ଯେ, ତାଙ୍କର ଟାର୍ଗେଟ ଶ୍ରୀରାମ ଜନ୍ମଭୂମିର ରାମ ମନ୍ଦିର ଥିଲା। କେବଳ ଏତିକି ନୁହେଁ, ଗିରଫ ବ୍ୟକ୍ତି ଠାରୁ ATS ୨ ଟି ହାତ ଗ୍ରେନେଡ୍ ମଧ୍ୟ ଜବତ କରିଛି। ଗୁଜୁରାଟ ATS ଏବଂ ପଲୱାଲ STF ର ମିଳିତ ଅପରେସନରେ ସନ୍ଦିଗ୍ଧ ବ୍ୟକ୍ତିଙ୍କୁ ଫରିଦାବାଦରୁ ଗିରଫ କରାଯାଇଥିଲା। ଗିରଫ ଅଭିଯୁକ୍ତର ନାମ ଅବଦୁଲ ରହମାନ। ସେ ୟୁପିର ଫୈଜାବାଦ ଜିଲ୍ଲା (ବର୍ତ୍ତମାନ ଅଯୋଧ୍ୟା)ର ବାସିନ୍ଦା। 

ଗୁଜୁରାଟ ATSକୁ ସୂଚନା ମିଳିଥିଲା ଯେ ଜଣେ ସନ୍ଦିଗ୍ଧ ବ୍ୟକ୍ତି ଏକ ବଡ଼ ଘଟଣା ଘଟାଇବାକୁ ଯୋଜନା କରୁଛି ଏବଂ ବର୍ତ୍ତମାନ ଫରିଦାବାଦରେ ଅଛି। ଏହା ପରେ, ଗୁଜରାଟ ATS ହରିୟାଣାର ଫରିଦାବାଦକୁ ଯାଇଥିଲା, ଯେଉଁଠାରେ ଏହା ଫରିଦାବାଦ STFର ସାହାଯ୍ୟ ନେଇଥିଲା, ଏହା ପରେ ଗୁଜରାଟ ATS ଏବଂ ପଲୱାଲ STF ଏକ ମିଳିତ ଅପରେସନ୍ କରି ରବିବାର ସନ୍ଦିଗ୍ଧ ବ୍ୟକ୍ତିଙ୍କୁ ଗିରଫ କରିଥିଲା। ATS ବର୍ତ୍ତମାନ ସନ୍ଦିଗ୍ଧ ବ୍ୟକ୍ତିଙ୍କୁ ତାଙ୍କର ଆତଙ୍କବାଦୀ ସମ୍ପର୍କ ବିଷୟରେ ପଚରାଉଚରା ଜାରି ରଖିଛି।