ବେଙ୍ଗାଲୁରୁ: ଅଭିନେତ୍ରୀ ରଶ୍ମିକା ମନ୍ଦାନାଙ୍କା ଅଡ଼ୁଆ ବଢ଼ିପାରେ । କର୍ଣ୍ଣାଟକ ସଂପର୍କରେ ତାଙ୍କର ମନ୍ତବ୍ୟକୁ ନେଇ ରାଜନୀତି ଜୋର ଧରିଛି । କର୍ଣ୍ଣାଟକର କଂଗ୍ରେସ ବିଧାୟକ ରବିକୁମାର ଗୌଡା ଗାନିଗା କହିଛନ୍ତି ଯେ, ଅଭିନେତ୍ରୀ ରଶ୍ମିକା ମନ୍ଦାନା କନ୍ନଡକୁ ଅବମାନନା କରିଛନ୍ତି ଏବଂ ତାଙ୍କୁ "ପାଠ ଶିଖାଇବା" ଉଚିତ । ଗଣମାଧ୍ୟମକୁ ପ୍ରତିକ୍ରିୟା ଦେଇ ସେ କହିଛନ୍ତି, "କର୍ଣ୍ଣାଟକରେ କନ୍ନଡ ଚଳଚ୍ଚିତ୍ର କିରିକ ପାର୍ଟିରୁ କ୍ୟାରିୟର ଆରମ୍ଭ କରିଥିବା ରଶ୍ମିକାଙ୍କୁ ଗତବର୍ଷ ଆମେ ତାଙ୍କୁ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବରେ ଯୋଗ ଦେବାକୁ ନିମନ୍ତ୍ରଣ କରିଥଲୁ । କିନ୍ତୁ ସେ ମନା କରିଦେଇଥିଲେ। ସେ କହିଥିଲେ, 'ହାଇଦ୍ରାବାଦରେ ମୋର ଘର ଅଛି, ମୁଁ ଜାଣିନାହିଁ କର୍ଣ୍ଣାଟକ କେଉଁଠାରେ ଅଛି ଏବଂ ମୋ ପାଖରେ ସମୟ ନାହିଁ । ମୁଁ ଆସିପାରିବି ନାହିଁ ।
ଆମର ଜଣେ ବିଧାୟକ ବନ୍ଧୁ ତାଙ୍କୁ ନିମନ୍ତ୍ରଣ କରିବା ପାଇଁ ତାଙ୍କ ଘରକୁ ୧୦-୧୨ ଥର ଯାଇଥିଲେ । ତଥାପି ସେ ମନା କରି ଦେଇଥିଲେ । ଆମେ କ'ଣ ତାଙ୍କୁ ଜବାବ ଦେବା ଉଚିତ ନୁହେଁ କି ବୋଲି ସେ ପ୍ରଶ୍ନ କରିଛନ୍ତି । ସେପଟେ କଂଗ୍ରସେ ବିଧାୟକଙ୍କ ଏଭଳି ମନ୍ତବ୍ୟର ଜବାବ ଦେଇଛି ବିଜେପି । ବିଜେପି କହିଛି ଯେ, ବିଧାୟକ ରବିକୁମାର ଗୌଡା ସମ୍ବିଧାନକୁ ସମ୍ମାନ ଦେବା ଉଚିତ ।
ସୂଚନାଯୋଗ୍ୟ, ନିକଟରେ ଏକ କାର୍ଯ୍ୟକ୍ରମରେ ରଶ୍ମିକା କହିଥିଲେ ସେ ହାଇଦ୍ରାବାଦରୁ ଆସିଛନ୍ତି, କର୍ଣ୍ଣଟକ କେଉଁଠି ସେ ଜାଣିନାହାନ୍ତି । ଏହାକୁ ନେଇ ବିବାଦ ସୃଷ୍ଟି ହୋଇଛି । କିଛି କନ୍ନଡ ସମର୍ଥକ ରଶ୍ମିକାଙ୍କ ବିରୋଧରେ ଏକ ଅଭିଯାନ ଆରମ୍ଭ କରିଛନ୍ତି ଏବଂ କହିଛନ୍ତି ଯେ, ସେ କନ୍ନଡରେ ତାଙ୍କର ସିନେମା ଯାତ୍ରା ଆରମ୍ଭ କରିଥିଲେ ଏବଂ ଆଜି କନ୍ନଡ ବିରୋଧରେ ଏପରି ଅସମ୍ମାନଜନକ ଭାଷା କହୁଛନ୍ତି । କର୍ଣ୍ଣାଟକ ରକ୍ଷଣ ବେଦିକେ ସଭାପତି ଟି ଏ ନାରାୟଣ ଗୌଡା ମଧ୍ୟ ସମାନ ପ୍ରସଙ୍ଗରେ ମତ ରଖିଛନ୍ତି ଏବଂ ରଶ୍ମିକାଙ୍କୁ ଚେତାବନୀ ଦେଇଛନ୍ତି ।
