ଚେନ୍ନାଇ,୩।୩: ତାମିଲନାଡୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନଙ୍କ ଅଦ୍ଭୁତ ବୟାନ। ଏବେ ସେ ନିଜ ରାଜ୍ୟର ଲୋକମାନଙ୍କୁ ଅଧିକ ସନ୍ତାନ ଜନ୍ମ କରିବାକୁ ନିବେଦନ କରିଛନ୍ତି। ସୀମା ନିର୍ଦ୍ଧାରଣ ଏବଂ ଜାତୀୟ ଶିକ୍ଷା ନୀତି (NEP) ପ୍ରସଙ୍ଗରେ ସେ ସୋମବାର ଏଭଳି କିଛି କହିଛନ୍ତି। ଷ୍ଟାଲିନଙ୍କ ମତରେ ଜନସଂଖ୍ୟା ଆଧାରିତ ସୀମା ନିର୍ଦ୍ଧାରଣ ତାମିଲନାଡୁର ସଂସଦୀୟ ଆସନ ହ୍ରାସ କରିପାରେ। ତେଣୁ ସେ ଲୋକମାନଙ୍କୁ ସେମାନଙ୍କର ବ୍ୟକ୍ତିଗତ ମତାମତକୁ ପାଶୋରି ଏହି ଆବେଦନକୁ ଗମ୍ଭୀରତାର ସହ ବିଚାର କରିବାକୁ ଅନୁରୋଧ କରିଥିଲେ।   ଷ୍ଟାଲିନ ନାଗାଇ ଜିଲ୍ଲାର ପାର୍ଟି ସମ୍ପାଦକଙ୍କ ବିବାହରେ ଯୋଗ ଦେଇଥିଲେ। ସେଠାରେ ସେ ଜନସଂଖ୍ୟା ଏବଂ ସୀମା ନିର୍ଦ୍ଧାରଣ ପ୍ରସଙ୍ଗରେ ଏଭଳି କିଛି କହିଛନ୍ତି।

ଏହି ସମୟରେ ଷ୍ଟାଲିନ୍ କହିଥିଲେ, ଆମେ କହୁଥିଲୁ, ସନ୍ତାନ ଜନ୍ମ କରିବା ପୂର୍ବରୁ ଭଲ ଭାବରେ ଚିନ୍ତା କର। ବର୍ତ୍ତମାନ ପରିସ୍ଥିତି ବଦଳି ଯାଇଛି। ଏବେ ଆମକୁ କହିବାକୁ ପଡିବ, ଶୀଘ୍ର ଏକ ସନ୍ତାନ ଜନ୍ମ କର। ଆମେ ପରିବାର ନିୟୋଜନକୁ ସଫଳତାର ସହିତ କାର୍ଯ୍ୟକାରୀ କରିଛୁ। ଏବେ ସେଥିପାଇଁ ଆମେ ଏହି ପରିସ୍ଥିତିର ସମ୍ମୁଖୀନ ହେଉଛୁ। ମୁଖ୍ୟମନ୍ତ୍ରୀ ନବବିବାହିତ ଦମ୍ପତିଙ୍କୁ ଶୀଘ୍ର ପରିବାର ଆରମ୍ଭ କରିବାକୁ ଉତ୍ସାହିତ କରିଛନ୍ତି। ସେ କହିଛନ୍ତି ଏପରି କରିବା ଦ୍ୱାରା ସୀମା ନିର୍ଦ୍ଧାରଣ ପରେ ପର୍ଯ୍ୟାପ୍ତ ରାଜନୈତିକ ପ୍ରତିନିଧିତ୍ୱ ସୁନିଶ୍ଚିତ ହେବ।

ଏହି ପ୍ରକ୍ରିୟା ଭାରତୀୟ ସମ୍ବିଧାନର ଧାରା ୮୨ ଏବଂ ୧୭୦ ଅନୁଯାୟୀ  ସାମ୍ବିଧାନିକ ବ୍ୟବସ୍ଥା ଦ୍ୱାରା ପରିଚାଳିତ। ଧାରା ୮୨ ଅନୁଯାୟୀ, ପ୍ରତ୍ୟେକ ଜାତୀୟ ଜନଗଣନା ପରେ, ସଂସଦକୁ ଲୋକସଭା ନିର୍ବାଚନମଣ୍ଡଳୀର ସୀମା ଏବଂ ସଂଖ୍ୟା ପୁନଃନିର୍ମାଣ କରିବା ପାଇଁ ଏକ ସୀମା ନିର୍ଦ୍ଧାରଣ ଆଇନ ପ୍ରଣୟନ କରିବାକୁ ପଡିବ। ଧାରା ୧୭୦ ରାଜ୍ୟ ବିଧାନସଭା ସୀମା ନିର୍ଦ୍ଧାରଣ ପାଇଁ ନିର୍ଦ୍ଦେଶାବଳୀ ସ୍ଥାପନ କରେ, ଯାହା ଜନସଂଖ୍ୟା ତଥ୍ୟ ଆଧାରରେ ଆସନ ବଣ୍ଟନ ନିର୍ଦ୍ଦାରିତ କରେ।

ଷ୍ଟାଲିନ୍ ଏହି ପ୍ରସଙ୍ଗକୁ ତାମିଲନାଡୁ ଉପରେ ଝୁଲୁଥିବା ଖଣ୍ଡା ବୋଲି କହିଛନ୍ତି। ସେ କହିଛନ୍ତି, ସୀମା ନିର୍ଦ୍ଧାରଣ କାର୍ଯ୍ୟକାରୀ କରିବାକୁ ଚେଷ୍ଟା କରୁଛନ୍ତି, ଯାହା ତାମିଲନାଡୁରେ ଲୋକସଭା ଆସନ ସଂଖ୍ୟା ହ୍ରାସ କରିବ। ସୀମା ନିର୍ଦ୍ଧାରଣ ଉପରେ ଆମର ମତ ଉପରେ ଆଲୋଚନା କରିବା ପାଇଁ ମୁଁ ମାର୍ଚ୍ଚ ୫ରେ ଏକ ସର୍ବଦଳୀୟ ବୈଠକ ଡାକିଛି। ନିର୍ବାଚନ କମିଶନଙ୍କ ପାଖରେ ପଞ୍ଜିକୃତ ୪୦ ଟି ରାଜନୈନିକ ଦଳକୁ ନିମନ୍ତ୍ରଣ କରାଯାଇଛି। ସେମାନଙ୍କ ମଧ୍ୟରୁ ଅଧିକାଂଶ ହଁ କହିଛନ୍ତି, କିଛି ଏହାକୁ ଏଡ଼ାଇ ଯାଉଛନ୍ତି। କିନ୍ତୁ ସେମାନଙ୍କୁ ବୁଝିବା ଉଚିତ ଯେ ଏହା ଡିଏମକେର ସମସ୍ୟା ନୁହେଁ, ଏହା ସମଗ୍ର ରାଜ୍ୟର ସମସ୍ୟା। ତେଣୁ ମୁଁ ପୁଣିଥରେ ସମସ୍ତଙ୍କୁ ଏହି ରାଜ୍ୟର କଲ୍ୟାଣ ଏବଂ ଏହାର ଅଧିକାର ପାଇଁ ଏକାଠି ଠିଆ ହେବାକୁ ଅନୁରୋଧ କରୁଛି।