ନୂଆଦିଲ୍ଲୀ,୩।୩: ୟୁଏଇର ରାଜଧାନୀ ଆବୁଧାବୀରେ ୪ ମାସର ଶିଶୁକୁ କଥିତ ହତ୍ୟା ମାମଲାରେ ଉତ୍ତର ପ୍ରଦେଶର ମହିଳାଙ୍କୁ ମିଳିଲା ଫାଶି। ୟୁପିର ଶହଜାଦି ଖାନ୍ଙ୍କୁ ୧୫ ଫେବୃଆରୀରେ ଫାଶୀ ଦିଆଯାଇଛି। ଝିଅର ଜୀବନ ରକ୍ଷା ପାଇଁ ଦିଲ୍ଲୀ ହାଇକୋର୍ଟ ଆବେଦନ କରିଥିବା ମହିଳାଙ୍କ ବାପାଙ୍କୁ ବୈଦେଶିକ ମନ୍ତ୍ରଣାଳୟ ସୂଚନା ଦେଇଛି। ଘଟଣା ସମ୍ପର୍କରେ ସୂଚନା ମିଳିବା ପରେ ଜଷ୍ଟିସ୍ ସଚିନ ଦତ୍ତ ଏହାକୁ ଖୁବ୍ ଦୁର୍ଭାଗ୍ୟପୂର୍ଣ୍ଣ ବୋଲି କହିଛନ୍ତି। ବାନ୍ଦା ଜିଲ୍ଲାର ୩୩ ବର୍ଷୀୟ ମହିଳାଙ୍କ ଉପରେ ୪ ମାସର ଶିଶୁକୁ ହତ୍ୟା କରିବା ଅଭିଯୋଗରେ ଅବୁଧାବୀରେ ଫାଶୀ ଦଣ୍ଡ ଦିଆଯାଇଛି।
ଆଡିସନାଲ ସଲିସିଟର ଜେନେରାଲ ଚେତନ ଶର୍ମା କୋର୍ଟଙ୍କୁ କହିଛନ୍ତି, ମହିଳାଙ୍କୁ ୧୫ ଫେବୃଆରୀରେ ଫାଶୀ ଦିଆଯାଇଥିଲା। ତାଙ୍କର ଅନ୍ତିମ ସଂସ୍କାର ୫ ମାର୍ଚ୍ଚରେ ହେବ। ସରକାରଙ୍କ ପକ୍ଷରୁ ଏହି ସୂଚନା ଶେହଜାଦିଙ୍କ ବାପାଙ୍କୁ ଜଣାଇ ଦିଆଯାଇଛି। ଶହଜାଦି ଖାନ୍ଙ୍କୁ ୧୦ ଫେବୃଆରୀ ୨୦୨୩ ରେ ଆବୁଧାବୀ ପୋଲିସକୁ ହସ୍ତାନ୍ତର କରାଯାଇଥିଲା। ୩୧ ଜୁଲାଇ ୨୦୨୩ରେ ତାଙ୍କୁ ଫାଶୀ ସଜା ଶୁଣାଯାଇଥିଲା।ଶହଜାଦିଙ୍କ ବାପା ଶବୀର ଖାନ୍ କହିଛନ୍ତି, ତାଙ୍କ ଝିଅର ସ୍ଥିତିକୁ ନେଇ ଘୋର ଅନିଶ୍ଚିତତା ଲାଗି ରହିଥିଲା। ସ୍ଥିତି ଜାଣିବାକୁ ସେ ବାରମ୍ବାର ବୈଦେଶିକ ମନ୍ତ୍ରଣାଳୟ ନିକଟରେ ଆବେଦନ କରିଥିଲେ। ହେଲେ ସବୁ ଚେଷ୍ଟା ବିଫଳ ହୋଇଥିଲା। ଶେହଜାଦିଙ୍କ ଉପରେ ଅଭିଯୋଗ ଥିଲା ସେ ତାଙ୍କ ନିଯୁକ୍ତିଦାତାଙ୍କ ୪ ମାସର ପୁଅକୁ ହତ୍ୟା କରିଛନ୍ତି। ତେବେ ତାଙ୍କ ବାପା କହିଛନ୍ତି, ମୋ ଝିଅକୁ ନିଜର ପକ୍ଷ ରଖିବାକୁ ସୁଯୋଗ ଦିଆଗଲାନି। ଅପରାଧ ସ୍ବୀକାର କରିବାକୁ କେବଳ ଚାପ ପକାଗଲା, ଯେଉଁ କାରଣରୁ ତାଙ୍କୁ ଫାଶୀ ଦିଆଗଲା।
