ନୂଆଦିଲ୍ଲୀ: ଯୁଦ୍ଧଗ୍ରସ୍ତ ଇସ୍ରାଏଲରେ ଉତ୍ତରାଞ୍ଚଳରେ ଥିବା ହାଇଫା ସହରରେ ହିଂସା ଦେଖା ଦେଇଛି। ସୋମବାର ଏକ ଆତତାୟୀର ଚାଖୁ ମାଡରେ ଜଣେ ୬୦ ବର୍ଷ ବୟଷ୍କ ଲୋକଙ୍କ ମୃତ୍ୟୁ ହେବା ସହ ୪ ଜଣ ଲୋକ ଗୁରୁତର ଆହତ ହୋଇଛନ୍ତି। ତେବେ ଏହି ଘଟମା ସମ୍ପର୍କରେ ପୋଲିସକୁ ସୂଚନା ମିଳିବା ପରେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା। ପୋଲିସର ଗୁଳିମାଡରେ ଆତତାୟିର ମୃତ୍ୟୁ ହୋଇଥିବା ଜଣା ପଡିଛି। ତେବେ ଏହି ଚାଖୁମାଡ ଘଟଣାକୁ ପୋଲିସ ଆତଙ୍କବାଦି ଆକ୍ରମଣ ବୋଲି କହିଛି।
ଗତ କିଛି ଦିନ ଭିତରେ ଇସ୍ରାଏଲରେ ଏହି ପରି ହିଂସ୍ରକ ଆକ୍ରମଣରେ ବୃଦ୍ଧି ପରିଲକ୍ଷିତ ହୋଇଛି। କିଛି ଦିନ ତଳେ ଏକ ଚଳନ୍ତା କାର ପଥଚାରିମାନଙ୍କ ରାସ୍ତାକୁ ଧସେଇ ପଶି ରାସ୍ତାରେ ଯାଉଥିବା ଲୋକମାନଙ୍କ ଉପରେ ମାଡି ଯାଇଥିଲା। ଏହି ଦୁର୍ଘଟଣାରେ ୧୦ ଜଣ ଗୁରୁତର ଆହତ ହୋଇଥିବା ବେଳେ ୪ଜଣଙ୍କ ମୃତ୍ୟୁ ହୋଇଥିଲା। ଏହି ଘଟଣାରେ ମଧ୍ୟ ଆତଙ୍କବାଦି ହାତ ରହିଥିବା ନେଇ ପୋଲିସ ଅଭିଯୋଗ ଆଣିଥିଲା।
ସୋମବାର ଘଟିଥିବା ଚାଖୁ ମାଡ ଘଟଣାରେ ଜଣେ ସୁରକ୍ଷା କର୍ମୀ ଓ ଜଣେ ସାଧାରଣ ନାଗରିକ ମିଶି ଉକ୍ତ ଆକ୍ରମଣକାରୀକୁ ଗୁଳିମାରି ହତ୍ୟା କରିଛନ୍ତି। ତେବେ ଏହି ଘଟଣାରେ ମୁଖ୍ୟ ଅଭିଯୁକ୍ତ ଜଣକ ଏକ ଆରବ ନାଗରିକ ହୋଇଥିଲା ବେଳେ କିଛି ବର୍ଷ ପୂର୍ବେ ସେ ଇସ୍ରାଏଲି ନାଗରିକତ୍ୱ ଗ୍ରହଣ କରିଥିଲେ ବୋଲି ପୋଲିସ ସୂଚନା ପ୍ରଦାନ କରିଛି।
ଅସ୍ତ୍ର ବିରତୀକୁ ନେଇ ଇସ୍ରାଏଲ ଓ ଗାଜା ମଧ୍ୟରେ ପରିସ୍ଥିତି ଅତ୍ୟନ୍ତ ଜଟିଳ ପ୍ରକ୍ରିୟା ଦେଇ ଗତି କରୁଥିବା ବେଳେ ଏହି ଆକ୍ରମଣ ଇସ୍ରାଏଲର ଚିନ୍ତା ବଢାଇଛି। ଅନ୍ୟପଟେ ଆତଙ୍କବାଦୀ ସଂଗଠନ ହମାସ ଏହି ଆକ୍ରମଣର ପ୍ରଶଂସା କରିଛି। କିନ୍ତୁ ଏହି ଆକ୍ରମଣ ପଛରେ ସଂଗଠନର ହାତ ଥିବା ନେଇ କୌଣସି ଘୋଷଣା କରିନାହିଁ।
