ୱାଶିଂଟନ ୦୩/୦୩: ଆମେରିକାର ଘରୋଇ କମ୍ପାନି ‘ଫାୟାରଫ୍ଲାଏ ଏରୋସ୍ପେସ୍’ ଦ୍ୱାରା ପ୍ରକ୍ଷେପଣ ହୋଇଥିବା ମହାକାଶ ଯାନ ‘ବ୍ଲୁ ଘୋଷ୍ଟ’ ଚନ୍ଦ୍ରପୃଷ୍ଠରେ ଅବତରଣ କରିଛି । ସଫଳ ଅବତରଣ ନେଇ କମ୍ପାନିର କଣ୍ଟ୍ରୋଲ ରୁମ୍ ପକ୍ଷରୁ ସ୍ପଷ୍ଟ କରାଯାଇଛି । ବ୍ଲୁ ଘୋଷ୍ଟ ଚନ୍ଦ୍ରପୃଷ୍ଠର କିଛି ଫଟୋ ମଧ୍ୟ ପଠାଇଛି, ଯାହାକୁ କମ୍ପାନି ନିଜ ସୋସିଆଲ ମିଡିଆ ହ୍ୟାଣ୍ଡେଲରେ ସେୟାର କରିଛି । ପ୍ରଥମ ଫଟୋ ଏକ ସେଲ୍ଫି ଥିଲା । ଦ୍ୱିତୀୟ ଘରୋଇ କମ୍ପାନି ଭାବେ ଫାୟାରଫ୍ଲାଏ ଏରୋସ୍ପେସ୍ ଏହି ସଫଳତା ହାସଲ କରିଛି ।
ଜାନୁଆରୀ ୧୫ରେ ବ୍ଲୁ ଘୋଷ୍ଟ ପୃଥିବୀ ଛାଡ଼ି ଚନ୍ଦ୍ର ଅଭିମୁଖେ ଯାତ୍ରା କରିଥିଲା । ଆଗାମୀ କିଛିଦିନ ମଧ୍ୟରେ ଆଉ ଏକ ଘରୋଇ କମ୍ପାନି ‘ଇନ୍ଟୁଇଟିଭ୍ ମେସିନ୍ସ’ ଏହାର ‘ଆଥେନା’ ମହାକାଶ ଯାନକୁ ଚନ୍ଦ୍ରର ସାଉଥ୍ ପୋଲ୍ରେ ଅବତରଣ କରାଇବାକୁ ଲକ୍ଷ୍ୟ ରଖିଛି । ଏହା ପୂର୍ବରୁ ଇନ୍ଟୁଇଟିଭ୍ ପ୍ରଥମ ଘରୋଇ ସଂସ୍ଥା ଭାବେ ଚନ୍ଦ୍ରପୃଷ୍ଠରେ ଏହାର ମହାକାଶ ଯାନ ‘ଓଡେସିୟସ୍’ର ଅବତରଣ କରାଇଥିଲା । ଗତବର୍ଷ ଫେବ୍ରୁଆରୀ ୨୨ରେ ଏହା ଚନ୍ଦ୍ରପୃଷ୍ଠରେ ଓହ୍ଲାଇଥିଲା।
