ନୂଆଦିଲ୍ଲୀ, ୩।୩: ସ୍କୁଲରେ ପଢୁଥିବା ପିଲା ଏବେ ସ୍ମାର୍ଟଫୋନ୍ ବ୍ୟବହାର କରିବାରେ ବ୍ୟସ୍ତ । ପିଲାଏ ସ୍ମାର୍ଟଫୋନ୍ରେ ଏମିତି ଅଭ୍ୟସ୍ତ ହୋଇଗଲେଣି ଯେ ଏବେ ସ୍କୁଲକୁ ବି ଫୋନ୍ ନେଇ ଯିବାରେ ଲାଗିଲେଣି । ଯାହାକୁ ନେଇ ହାଇକୋର୍ଟ ବିରକ୍ତ ପ୍ରକାଶ କରିଛନ୍ତି । ସ୍କୁଲରେ ସ୍ମାର୍ଟଫୋନ୍କୁ ସଂପୂର୍ଣ୍ଣ ବନ୍ଦ କରିବାକୁ କୋର୍ଟ ବିଚାର କରୁଥିବା ବେଳେ ଅନ୍ୟପଟେ ସ୍କୁଲରେ ପିଲାଙ୍କର ସ୍ମାର୍ଟଫୋନ୍ କେତେ ଜରୁରୀ ସେନେଇ ଓକିଲାତି କରିଛି କେନ୍ଦ୍ରୀୟ ବିଦ୍ୟାଳୟ ସଙ୍ଗଠନ ।
କହିରଖୁ କି, କୋର୍ଟ ଜଣେ ନାବାଳକ ମାମଲାରେ ଶୁଣାଣି କରୁଥିଲେ । ଯେଉଁଥିରେ ନାବାଳକ ଜଣକ ସ୍କୁଲରେ ସ୍ମାର୍ଟ ଫୋନର ଦୁରୁପଯୋଗ କରିଥିଲେ । ଯାହା ପରେ କୋର୍ଟ ସ୍କୁଲ ପିଲାଙ୍କ ଲାଗି ନିର୍ଦ୍ଦେଶନାମା ଜାରି କରିଛନ୍ତି । ନିର୍ଦ୍ଦେଶନାମା ଅନୁସାରେ, ସ୍ମାର୍ଟଫୋନ୍ ସ୍କୁଲ ପିଲାଙ୍କ ଲାଗି କେତେ ଜରୁରୀ କେତେ ନୁହେଁ ସେନେଇ ବିଜ୍ଞପ୍ତି ପ୍ରକାଶ ପାଇବା ଆବଶ୍ୟକ । ସ୍କୁଲ କର୍ତ୍ତୃପକ୍ଷ ଏନେଇ କୌଣସି ସାଲିସ ନକରି ସ୍କୁଲରେ ସଂପୂର୍ଣ୍ଣ ଭାବରେ ମୋବାଇଲ୍ ବନ୍ଦ କରିଦେବାର ଆବଶ୍ୟକତା ବୋଲି କହିଛନ୍ତି କୋର୍ଟ । ସ୍କୁଲପିଲା ଯେଉଁ ଢଙ୍ଗରେ ସ୍ମାର୍ଟଫୋନ୍ ବ୍ୟବହାର କରୁଛନ୍ତି ତାହା ପିଲାଙ୍କ ଲାଗି କ୍ଷତିକାରକ ହୋଇପାରେ । ହାଇକୋର୍ଟଙ୍କ ଏଭଳି ନିର୍ଦ୍ଦେଶ ପରେ କେନ୍ଦ୍ରୀୟ ବିଦ୍ୟାଳୟ ସଂଗଠନ କହିଛି, କୋର୍ଟ ନିର୍ଦ୍ଦେଶ ଦିଅନ୍ତୁ କି ପିଲାମାନେ ସ୍କୁଲରେ ସ୍ମାର୍ଟଫୋନ୍ ବ୍ୟବହାର କରିପାରିବେ । ହେଲେ କୋର୍ଟ କହିଛନ୍ତି, ବର୍ତ୍ତମାନ ପରିସ୍ଥିତିରେ ପ୍ରତିଦିନ ପିଲାମାନେ ସ୍ମାର୍ଟଫୋନ୍ ସ୍କୁଲକୁ ନେଇକି ଯିବା ଉପରେ ରୋକ୍ ଲଗାଯାଇପାରିବ ନାହିଁ । ସ୍କୁଲରେ କେଉଁ ପିଲା ସ୍ମାର୍ଟଫୋନ୍ ନେଉଛନ୍ତି ଏବଂ ସେମାନେ ଏହାର ବ୍ୟବହାର କେମିତି କରୁଛନ୍ତି ସେନେଇ ଯାଞ୍ଚ ହେବାର ଆବଶ୍ୟକତା ରହିଛି । ଯେଉଁ ସମୟରେ ସେମାନେ ମୋବାଇଲ୍ ବ୍ୟବହାର କରିବାର ଆବଶ୍ୟକତା ନାହିଁ ସେହି ସମୟରେ ମୋବାଇଲକୁ ସେମାନେ ସ୍କୁଲ କର୍ତ୍ତୁପକ୍ଷଙ୍କୁ ଜମା କରିଦେବାର ଆବଶ୍ୟକତା ରହିଛି ।
କୋର୍ଟ ଆହୁରି କହିଛନ୍ତି, ସ୍କୁଲକୁ ପିଲାମାନେ ସ୍ମାର୍ଟଫୋନ୍ ନେଇଯାଉଥିବାକୁ ରୋକାଯାଇପାରିବ ନାହିଁ । ହେଲେ ଏହାର ବ୍ୟବହାର କରିବା ଉପରେ ନିୟନ୍ତ୍ରଣ କରାଯାଇପାରିବ । ଯେତେ ଦୂର ସମ୍ଭବ ସ୍କୁଲରେ ସ୍ମାର୍ଟଫୋନ୍ ଦାଖଲ କରିବା ଦିଗରେ କର୍ତ୍ତୃପକ୍ଷ ଧ୍ୟାନ ଦେବାର ଆବଶ୍ୟକତା ରହିଛି । ଶ୍ରେଣୀ ଗୃହରେ ସ୍ମାର୍ଟଫୋନ୍ ବ୍ୟବହାର ଉପରେ ରୋକ୍ ଲଗାଯିବାର ଆବଶ୍ୟକତା ରହିଛି । ପ୍ରତି ସ୍କୁଲରେ ସ୍ମାର୍ଟଫୋନ୍ର ଡିଜିଟାଲ୍ ବ୍ୟବହାର , ଅନଲାଇନ୍ ସୁରକ୍ଷା ଉପରେ ଶିକ୍ଷା ଦେବାର ଆବଶ୍ୟକତା ରହିଛି । ଅତ୍ୟଧିକ ସ୍ମାର୍ଟଫୋନ୍ ବ୍ୟବହାର ଏବଂ ସୋସିଆଲ ମିଡିଆ ଉପରେ ପ୍ରତିବନ୍ଧକ ଲଗାଇବାର ଆବଶ୍ୟକତା ରହିଛି । ମୋଟ୍ ଉପରେ ସ୍ମାର୍ଟଫୋନ୍ ବ୍ୟବହାର ଉପରେ ରୋକ ଲଗାଯିବା ନେଇ ଅନେକ ସମୟରେ ନିର୍ଦ୍ଦେଶନାମା ଆସୁ ବୋଲି ଦାବି ହେଉଛି । ହେଲେ କୋର୍ଟ ଏବେ ଯେଉଁ ନିର୍ଦ୍ଦେଶନାମା ଜାରି କରିଛନ୍ତି ତାହାକୁ ନେଇ ଚର୍ଚ୍ଚା ଚାଲିଛି ।
