କୋଣାର୍କ,୯।୧(ଆପ୍ର) : କୋଣାର୍କ ସୁରକ୍ଷା ସମିତି,ବିଶ୍ବ ହିନ୍ଦୁ ପରିଷଦ,ସୌରମହାଯଜ୍ଞ ପରିଚାଳନା ସମିତି ପକ୍ଷରୁ ସୂର୍ଯ୍ୟମନ୍ଦିର ପରିକ୍ରମା ଓ ଜଗମୋହନରେ ସୂର୍ଯ୍ୟ ପୂଜା କରାଯାଇଛି। ପ୍ରତ୍ୟୁଷରୁ ଚନ୍ଦ୍ରଭାଗାରେ ସ୍ନାନ ସାରି ଶ୍ରଦ୍ଧାଳୁମାନେ ସୂର୍ଯ୍ୟପୂଜା କରିଥିଲେ ।
କୋଣାର୍କ ଜଗନ୍ନାଥ ମନ୍ଦିର ପରିସର ସୌରମହାଯଜ୍ଞ ପୀଠରୁ ଶତାଧିକ ଶ୍ରଦ୍ଧାଳୁ ଏକ ବିରାଟ ପଟୁଆରରେ ଘଣ୍ଟ ମର୍ଦ୍ଦଳ ଓ ସଂକୀର୍ତନ ଦଳ ସହିତ ଶୋଭାଯାତ୍ରାରେ ବାହାରି ସୂର୍ଯ୍ୟମନ୍ଦିରରେ ପହଞ୍ଚିଥିଲେ। ସୂର୍ଯ୍ୟମନ୍ଦିର ପରିକ୍ରମା କରିବା ପରେ ଜଗମୋହନ ଦ୍ବାରରେ ସୂର୍ଯ୍ୟଙ୍କୁ ପୂଜାର୍ଚ୍ଚନା କରାଯାଇଥିଲା। ଏହି ଅବସରରେ ତ୍ରିଦିବସୀୟ ସୌରମହାଯଜ୍ଞ ପୂର୍ଣ୍ଣାହୁତି ଦିଆଯାଇଛି। ଶାମ୍ବଦଶମୀ ଅବସରରେ କୋଣାର୍କରେ ସାଧୁସନ୍ଥମାନଙ୍କ ସମାଗମ ହୋଇଥିଲା। ସୂର୍ଯ୍ୟମନ୍ଦିର ପ୍ରବେଶ ଶୁଳ୍କ ଛାଡ଼ ରହିଥିବାରୁ ଦିନତମାମ ପର୍ଯ୍ୟଟକମାନଙ୍କ ଭିଡ ଜମିଥିଲା।
