ନୂଆଦିଲ୍ଲୀ: ଆପଲ କମ୍ପାନିର ସହ ପ୍ରତିଷ୍ଠାତା ଦିବଙ୍ଗତ ଷ୍ଟିଭ ଜବ୍ସଙ୍କ ପତ୍ନୀ ଲୌରେନ ପୋଏଲ ଜବ୍ସ ସୋମବାର ଉତ୍ତରପ୍ରଦେଶର ପ୍ରୟାଗରାଜଠାରେ ହେଉଥିବା ମହାକୁମ୍ଭମେଳାରେ ପହଞ୍ଚିଛନ୍ତି। ଏକ ଗେରୁଆ ରଙ୍ଗର ଚୁନରୀ ମୁଣ୍ଡରେ ପକାଇ ଲୌରେନ ମହାକୁମ୍ଭରେ ଯୋଗଦେଇଥିବାର ଏକ ଭିଡିଓ ବର୍ତ୍ତମାନ ସୋଶିଆଲ ମିଡିଆରେ ଭାଇରାଲ ହେବାରେ ଲାଗିଛି। 

ଲୌରେନ ଶନିବାର ଭାରତରେ ପହଞ୍ଚି ପ୍ରଥମେ ବାରନାସୀ ସ୍ଥିତ କାଶୀ ବିଶ୍ୱନାଥ ମନ୍ଦିରକୁ ଦର୍ଶନ ପାଇଁ ଯାଇଥିଲେ। ସେ ପ୍ରଥମେ ମନ୍ଦିରରେ ପହଞ୍ଚି ବାବା କାଶୀ ବିଶ୍ୱନାଥଙ୍କୁ ଜଳାଭିଷେକ କରିଥିଲେ। ମହାକୁମ୍ଭ ମେଳା ସୁରୁଖୁରୁରେ ସମାପ୍ତ ହେବାପାଇଁ ସେ କାଶୀ ବିଶ୍ୱନାଥଙ୍କୁ ପ୍ରାର୍ଥନା କରିଥିଲେ ବୋଲି ସୂଚନା ମିଳିଛି। 

ତା ପରଦିନ ଅର୍ଥାତ ରବିବାର ଦିନ ସନ୍ଧ୍ୟାରେ ସେ ଆଧ୍ୟାତ୍ମିକ ଗୁରୁ ସ୍ୱାମୀ କୈଳାସନନ୍ଦ ଗିରିଙ୍କ ପ୍ରୟାଗରାଜ ସ୍ଥିତ ଆଶ୍ରମରେ ଆସି ପହଞ୍ଚିଥିଲେ। ସୋମବାର ନିରଞ୍ଜନୀ ଆଖଡା ଦ୍ୱାରା ତାଙ୍କୁ ତାଙ୍କ ହିନ୍ଦୁ ନାମ ‘କମଳା’ ପ୍ରଦାନ କରାଯାଇଥିଲା। ତେବେ ସେ ମହାକୁମ୍ଭରେ ଯୋଗଦେଇଥିଲେ ମଧ୍ୟ ଖବର ଲେଖାହେବା ଯାଏ ତ୍ରିବେଣୀ ସଙ୍ଗମଠାରେ ବୁଡ ପକେଇନଥିବା ଖବର ମିଳିଛି।

2025ରେ ହେଉଥିବା ଏହି ମହାକୁମ୍ଭ ୪୫ ଦିନ ଧରି ଚାଲିବ। ୧୨ଟି କୁମ୍ଭମେଳା ଅନୁଷ୍ଟିତ ହେବା ପରେ ମହାକୁମ୍ଭ ପ୍ରତି ୧୪୪ ବର୍ଷରେ ଥରେ ପଡିଥାଏ। ଏହି ମେଳାରେ ପ୍ରାୟ ୪୫ କୋଟି ଲୋକ ତ୍ରିବେଣୀ ସଂଙ୍ଗମରେ ବୁଡ ପକେଇବେ ବୋଲି ଆଶା କରାଯାଉଛି। ଆସନ୍ତା ଫ୍ରେବୃୟାରି ୨୬ ତାରିଖ ଯାଏ ମହାକୁମ୍ଭ ମେଳା ଚାଲୁ ରହିବ।