ନୂଆଦିଲ୍ଲୀ: ଜର୍ମାନୀ ପରେ ଏବେ ନାଇଜେରିଆରେ ଖ୍ରୀଷ୍ଟମାସ ସେଲିବ୍ରେସନ ସମୟରେ ଏକ ବଡ଼ ଦୁର୍ଘଟଣା ଘଟିଛି । ନାଇଜେରିଆରେ ଖ୍ରୀଷ୍ଟମାସ ସେଲିବ୍ରେସନର ଦୁଇଟି କାର୍ଯ୍ୟକ୍ରମରେ ଦାନ ଏବଂ ଖାଦ୍ୟ ସାମଗ୍ରୀ ବଣ୍ଟନ ସମୟରେ ଏକ ଦଳାଚକଟା ପରିସ୍ଥିତି ଆରମ୍ଭ ହୋଇଥିଲା । ଏଥିରେ ମୃତ୍ୟୁ ସଂଖ୍ୟା ଏବେ ୩୨ ରେ ପହଞ୍ଚିଛି। ରବିବାର ପୋଲିସ ଏହି ସୂଚନା ଦେଇଛି । ପୋଲିସର ସୂଚନା ଅନୁଯାୟୀ, ହଠାତ୍ ଖାଦ୍ୟ ସାମଗ୍ରୀ ଆଣିବା ପାଇଁ ଏକ ବିରାଟ ଜନସମାଗମ ହୋଇଥିଲା ଏବଂ ଠେଲାପେଲା ହେତୁ ଅନେକ ଲୋକ ତଳେ ପଡ଼ିଯାଇଥିଲେ, ଯେଉଁଥିପାଇଁ ଅନେକ ଲୋକଙ୍କର ମୃତ୍ୟୁ ହୋଇଥିଲା।
ପୋଲିସ ମୁଖପାତ୍ର ତୋଚୁକୁ ଇକେଙ୍ଗା କହିଛନ୍ତି, ପ୍ରଥମ ଘଟଣା ଦକ୍ଷିଣ-ପୂର୍ବ ଅନମ୍ବ୍ରା ରାଜ୍ୟର ଓକିଜା ସହରରେ ଘଟିଛି, ଯେଉଁ ଠାରେ ୨୨ ଜଣଙ୍କର ମୃତ୍ୟୁ ଘଟିଛି । ଖ୍ରୀଷ୍ଟମାସ ଅବସରରେ ଓକିଜାରେ ଜଣେ ପରୋପକାରୀ ବ୍ୟକ୍ତି ଖାଦ୍ୟ ବିତରଣର ଆୟୋଜନ କରିଥିଲେ, ଯେଉଁଥିରେ ଲୋକଙ୍କ ମଧ୍ୟରେ ଏକ ଦଳାଚକଟା ପରିସ୍ଥିତି ଉପୁଜିଥିଲା । ଏଥି ସହ ରାଜଧାନୀ ଆବୁଜାର ଏକ ଚର୍ଚ୍ଚ ଖାଦ୍ୟ ଏବଂ ପୋଷାକ ବଣ୍ଟନ ପାଇଁ ଏକ କାର୍ଯ୍ୟକ୍ରମ ଆୟୋଜନ କରିଥିଲା। ଏହି ସମୟରେ ଦଳାଚକଟା ଯୋଗୁଁ ଘଟିଥିବା ଦୁର୍ଘଟଣାରେ ୧୦ ଜଣଙ୍କର ମୃତ୍ୟୁ ହୋଇଥିବା ନିଶ୍ଚିତ କରାଯାଇଛି ।
ଏହାର ଗୋଟିଏ ଦିନ ପୂର୍ବରୁ, ଶନିବାର ଦିନ, ଖ୍ରୀଷ୍ଟମାସ ଉତ୍ସବ ସମୟରେ ଜର୍ମାନୀରେ ଏକ ବଡ଼ ଦୁର୍ଘଟଣା ଘଟିଥିଲା । ଏଥିରେ ୫ ଜଣଙ୍କର ମୃତ୍ୟୁ ଘଟିଥିବା ବେଳେ ୭ ଜଣ ଭାରତୀୟଙ୍କ ସମେତ ୨୦୦ ରୁ ଅଧିକ ଲୋକ ଆହତ ହୋଇଥିଲେ ।
