ନୂଆଦିଲ୍ଲୀ: ଧୀରେ ଧୀରେ ବଳ ଗୋଟାଉଛି ପାକିସ୍ତାନ। ମଝଭୁତ କରୁଛି ସେନା। କେବେ ମିସାଇଲ ଟେଷ୍ଟ ତ ଆଉ କେତେବେଳେ କିଣୁଛି ଫାଇଟର ଜେଟ୍। ଏବେ ଚୀନ ଠାରୁ ଅତ୍ୟାଧୁନିକ ଆଡ୍ଭାନ୍ସ ଫାଇଟର ଜେଟ୍ କିଣିବାକୁ ଯାଉଛି ପାକିସ୍ତାନ। ଚୀନ ପାକିସ୍ତାନକୁ ଏହାର ପଞ୍ଚମ ପିଢ଼ିର ଫାଇଟର ଜେଟ୍ ଜେ-୩୫ ଦେବ। ଏନେଇ ଚୁକ୍ତି ସରିଛି। ପାକିସ୍ତାନ ସରକାର ଫାଇଟର ଜେଟ୍ କିଣିବା ନେଇ ଘୋଷଣା କରିଛନ୍ତି।
ବିଶ୍ୱର ପ୍ରଥମ ଦେଶ ଭାବେ ପାକିସ୍ତାନ ଚାଇନାଠୁ ଏହି ଫାଇଟର ଜେଟ୍ କିଣିବାକୁ ଯାଉଛି। ଚୀନଠୁ ଏହି ଫାଇଟର ଜେଟ୍ ପାଇବା ପରେ ପାକିସ୍ତାନର ବାୟୁ ସେନା ପୂର୍ବ ଅପେକ୍ଷା ଅଧିକ ଶକ୍ତିଶାଳି ହୋଇଯିବ। ଯାହା ଭାରତ ପାଇଁ ଚିନ୍ତାର କାରଣ।
ପାକିସ୍ତାନର ବାୟୁସେନା(ପିଏଏଫ)ରେ ଥିବା ଏଫ-୧୬ ଓ ଫ୍ରାନ୍ସ ନିର୍ମିତ ମିରାଜ ଜାହାଜ ବହୁ ପୁରୁଣା ହୋଇଗଲାଣି। ଏଣୁ ପିଏଏଫ ଚିନଠୁ ୪୦ଟି ଜେ-୩୫ ଫାଇଟର ଜେଟ୍ କିଣିବ। ଏନେଇ ପାକିସ୍ତାନର ବିଭିନ୍ନ ଗମମାଧ୍ୟମରେ ଖବର ପ୍ରକାଶ ପାଇଛି। ଏହି ଫାଇଟର ଜେଟ୍ଗୁଡ଼ିକୁ ଚାଇନା ଦୁଇମାସ ମଧ୍ୟରେ ପାକିସ୍ତାନକୁ ଯୋଗାଇଦେବ ବୋଲି ଘୋଷଣା କରିଛି।
ଏହା ପୂର୍ବରୁ ପାକିସ୍ତାନୀ ପାଇଲଟମାନେ ଚୀନର ଜେ-୩୧ ବିମାନ ଉଡ଼ାଇବା ପାଇଁ ପ୍ରଶିକ୍ଷଣ ନେଉଥିଲେ। ଏନେଇ ଚଳିତ ବର୍ଷ ଜୁଲାଇ ମାସରେ ପାକିସ୍ତାନ ମିଡିଆରେ ଖବର ପ୍ରକାଶ ପାଇଥିଲା। ଚାଇନାରେ ଜେ-୩୫କୁ ଜେ-୩୧ କୁହାଯାଇଥାଏ। ଚଳିତ ବର୍ଷ ଜାନୁୟାରି ମାସରେ ପାକିସ୍ତାନର ଏୟାର ଚିପ ମାର୍ଶଲ ଜାହିର ଅହମ୍ମଦ ବାବର ଜେ-୩୧ କିଣିବା ନେଇ ପ୍ରଥମେ ଘୋଷଣା କରିଥିଲେ।
ଦୁଇବର୍ଷ ପୁର୍ବେ ଚୀନ ନିର୍ମିତ ଜେ-୧୦ସିଇ ମଲ୍ଟିରୋଲ ଫାଇଟର ଜେଟ୍କୁ ପାକିସ୍ତାନ ନିଜ ବାୟୁସେନାରେ ସାମିଲ କରିଥିଲା। ପାକିସ୍ତାନ ଚାଇନା ସହ ହାତ ମିଶାଇ ଭାରତ ବିରୁଦ୍ଧରେ ନିଜ ବାୟୁସେନାକୁ ଶକ୍ତିଶାଳି କରୁଛି। ତେବେ ଏହି ଫାଇଟର ଜେଟ୍ ବିଷୟରେ ଚାଇନା ବିଶେଷ ଭାବେ କିଛି ଘୋଷଣା କରିନଥିବାରୁ ପ୍ରଥମରୁ ଏହାର ବିଶ୍ୱାସନିୟତା ଉପରେ ପ୍ରଶ୍ନ ଉଠିଛି। କାରଣ ପୂର୍ବରୁ ଚୀନ ଯୋଗାଇ ଥିବା ଏମିତି ଅନେକ ଜାହାଜ ବାରମ୍ବାର ଦୁର୍ଘଟଣା ଗ୍ରସ୍ତ ହୋଇଛି। ତେଣୁ ଏହା କେତେ ଉନ୍ନତମାନର ପାକିସ୍ତାନ କିଣିଲା ପରେ ଜାଣିପାରିବ।
