ନୀଳଗିରି,୦୬/୧୧: ଆୟୁଷ୍ମାନ ଆରୋଗ୍ୟ କେନ୍ଦ୍ର (ଉପ ସ୍ୱାସ୍ଥ୍ୟ କେନ୍ଦ୍ର)ର ଦୁଇଟି ସେଣ୍ଟରରେ ବ୍ୟାପକ ସିରିଜ୍ ଚୋରି । ତାଲା ଭାଙ୍ଗି କମ୍ପ୍ୟୁଟର, ପ୍ରିଣ୍ଟର, ଇନ୍ଭଟର, ବ୍ୟାଟେରୀ, ଫ୍ୟାନ୍, ଓଜନ ମେସିନ୍ ସହିତ ବିଭିନ୍ନ ମୂଲ୍ୟବାନ ସାମଗ୍ରୀ ଲୁଟି ନେଲେ ଦୁର୍ବୃତ୍ତ । ବାଲେଶ୍ୱର ଜିଲ୍ଲା ନୀଳଗିରି ଥାନା ଅନ୍ତର୍ଗତ ପୋଡାଶୁଳ ଓ ସିଆଡିମାଳ ଆୟୁଷ୍ମାନ ଆରୋଗ୍ୟ କେନ୍ଦ୍ରରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଆୟୁଷ୍ମାନ ଆରୋଗ୍ୟ କେନ୍ଦ୍ର (ଉପ ସ୍ୱାସ୍ଥ୍ୟ କେନ୍ଦ୍ର)ର ଦୁଇଟି ସେଣ୍ଟରରେ ତାଲା ଭାଙ୍ଗି ମୁଲ୍ୟବାନ ସାମଗ୍ରୀ ଲୁଟି ନେଲେ ଦୁର୍ବୃତ୍ତ । ସ୍ୱାସ୍ଥ୍ୟ କେନ୍ଦ୍ରରେ ଥିବା କମ୍ପ୍ୟୁଟର, ପ୍ରିଣ୍ଟର, ଇନ୍ଭଟର, ବ୍ୟାଟେରୀ ଚୋରି କରି ନେଇଥିଲେ ଦୁର୍ବୃତ୍ତ । କେବଳ ସେତିକି ନୁହେଁ, ଫ୍ୟାନ୍, ଓଜନ ମେସିନ୍ ସହିତ ବିଭିନ୍ନ ମୂଲ୍ୟବାନ ସାମଗ୍ରୀ ମଧ୍ୟ ଲୁଟି ନେଇଥିଲେ । ଏ ବିଷୟରେ ସ୍ୱାସ୍ଥ୍ୟ କେନ୍ଦ୍ରର କର୍ମଚାରୀ ଜାଣିବାକୁ ପାଇଥିଲେ । ଏହା ଜାଣି ତୁରନ୍ତ ନୀଳଗିରି ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ଦୁର୍ବୃତ୍ତଙ୍କୁ ଖୋଜି ଘଟଣାର ତଦନ୍ତ ଚଳାଇଛି ।
ତେବେ ଏହି ଲୁଟ୍ ହେବାର ଗୋଟିଏ ଦିନ ପୂର୍ବରୁ ପୋଡାଶୁଳ ଗ୍ରାମରେ ଘରେ ଗଡ଼ରେଜ ତାଲା ଭାଙ୍ଗି ୪୦ ହଜାର ଟଙ୍କା ସହ ସୁନା ଗହଣା ଲୁଟ୍ କରିଥିଲେ ଦୁର୍ବୃତ୍ତ । ଏନେଇ ନୀଳଗିରି ଥାନାରେ ଅଭିଯୋଗ ହୋଇଥିଲା । ଏହି ଦୁଇଟି ଅଭିଯୋଗ ଆଧାରରେ ଦୁର୍ବୃତ୍ତଙ୍କୁ ଖୋଜୁଛି ପୋଲିସ ।
