ମୁମ୍ବାଇ,୧୪/୦୩: ଚଳିତ ବର୍ଷ ମହିଳା ପ୍ରିମିୟର ଲିଗ୍ ଫାଇନାଲ୍ରେ ଦୁଇ ପ୍ରମୁଖ ପ୍ରତିଦ୍ୱନ୍ଦ୍ୱୀ ଦିଲ୍ଲୀ କ୍ୟାପିଟାଲ୍ସ ଓ ମୁମ୍ବାଇ ଇଣ୍ଡିଆନ୍ସ ପରସ୍ପରକୁ ଭେଟିବେ । ପ୍ରଥମ ସଂସ୍କରଣରେ ମଧ୍ୟ ଉଭୟ ଫାଇନାଲ୍ ଖେଳିଥିଲେ । ଶନିବାର ଅର୍ଥାତ ୧୫ ତାରିଖ ସନ୍ଧ୍ୟା ସାଢ଼େ ୭ଟାରେ ଭଦୋଦରା ବିସିଏ ଷ୍ଟାଡିୟମରେ ଦୁଇ ପ୍ରମୁଖ ପ୍ରତିଦ୍ୱନ୍ଦ୍ୱୀଙ୍କ ମଧ୍ୟରେ କଡ଼ା ଟକ୍କର ଦେଖିବାକୁ ମିଳିବ।
ଗୁରୁବାର ଅନୁଷ୍ଠିତ ଏଲିମିନେଟର ମୁକାବିଲାରେ ମୁମ୍ବାଇ ଇଣ୍ଡିଆନ୍ସ ୪୭ ରନ୍ରେ ଗୁଜରାଟ ଜାଏଣ୍ଟ୍ସକୁ ପରାସ୍ତ କରିଥିଲା । ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି ମୁମ୍ବାଇ ଇଣ୍ଡିଆନ୍ସ ୪ ୱିକେଟ୍ ବିନିମିୟରେ ୨୧୩ ରନ ସଂଗ୍ରହ କରିଥିଲା । ଏହାର ଜବାବରେ ଗୁଜରାଟ ଜାଏଣ୍ଟ୍ସ ୧୯.୨ ଓଭରରେ ୧୬୬ ରନ କରି ଅଲ୍ ଆଉଟ୍ ହୋଇଯାଇଥିଲା । ଅର୍ଦ୍ଧଶତକ ସହ ୩ଟି ୱିକେଟ୍ ନେଇ ବିଜୟରେ ମୁଖ୍ୟ ଭୂମିକା ଗ୍ରହଣ କରିଥିବା ହେଲି ମାଥ୍ୟୁସ ପ୍ଳେୟାର ଅଫ ଦ ମ୍ୟାଚ୍ ବିବେଚିତ ହୋଇଥିଲେ ।
ଟସ ଜିତି ଫିଲ୍ଡିଂ ନିଷ୍ପତ୍ତି ନେବା ଗୁଜରାଟ ଜାଏଣ୍ଟ୍ସ ପାଇଁ ମହଙ୍ଗ ପଡ଼ିଥିଲା । ବ୍ୟାଟିଂ ଆମନ୍ତ୍ରଣ ପାଇଥିବା ମୁମ୍ବାଇ ଇଣ୍ଡିଆନ୍ସର ଦୁଇ ଓପନର ହେଲି ମାଥ୍ୟୁସ୍ ଓ ୟସ୍ତିକା ଭାଟିଆ ୪ଓଭରରେ ୨୬ ରନ ସଂଗ୍ରହ କରିଥିଲେ । ପଞ୍ଚମ ଓଭରରେ ୟସ୍ତିକାଙ୍କୁ ଆଉଟ୍ କରିଥିଲେ ଡାନିଏଲା ଗିବସନ । ୟସ୍ତିକା ୩ଟି ଚୌକା ବଳରେ ୧୫ ରନ୍ କରିଥିଲେ ହେଁ ପ୍ରାରମ୍ଭିକ ୱିକେଟ୍ ମୁମ୍ବାଇ ଇଣ୍ଡିଆନ୍ସକୁ ପ୍ରଭାବିତ କରିନଥିଲା। ଏହାପରେ ବ୍ୟାଟିଂ କରିବାକୁ ଆସିଥିବା ନାତାଲି ସ୍କିଭର-ବ୍ରଣ୍ଟ ଅପରାଜିତ ମାଥ୍ୟୁସଙ୍କ ସହ ମିଶି ବିସ୍ଫୋରକ ବ୍ୟାଟିଂ କରିଥିଲେ। ଉଭୟ ପଟୁ ଚୌକା ଓ ଛକା ବର୍ଷା ହୋଇଥିଲା । ଗୁଜରାଟ ଜାଏଣ୍ଟ୍ସ ୬ଜଣ ବୋଲରଙ୍କୁ ନିୟୋଜିତ କରିଥିଲେ ହେଁ କୌଣସି ସୁଫଳ ମିଳିନଥିଲା। ଉଭୟ ଅର୍ଦ୍ଧଶତକ ଅର୍ଜନ କରିଥିଲେ ଓ ଦ୍ୱିତୀୟ ୱିକେଟ୍ରେ ୧୩୩ ରନ୍ର ଭାଗିଦାରୀ ଗଠନ କରିଥିଲେ । ଦଳୀୟ ସ୍କୋର ୧୫୯ରେ ପହଞ୍ଚି ସାରିଥିଲା । ଶେଷରେ କାଶଭୀ ଗୌତମ ଯୋଡ଼ି ଭାଙ୍ଗିଥିଲେ । ମାଥ୍ୟୁସ ୫୦ଟି ବଲ୍ରୁ ୧୦ଚୌକା ଓ ୩ଛକା ବଳରେ ୭୭ ରନ୍ କରି ଆଉଟ୍ ହୋଇଥିଲେ ।
ମୁମ୍ବାଇ ଇଣ୍ଡିଆନ୍ସର ଆକ୍ରମଣ ଏତିକିରେ ଥମି ନଥିଲା । ପରବର୍ତ୍ତୀ ବ୍ୟାଟର ହର୍ମନପ୍ରୀତ କୌର ଧୂଆଁଧାର ବ୍ୟାଟିଂ କରିଥଲେ । ଅନ୍ୟ ଅପରାଜିତ ବ୍ୟାଟର ସ୍କିଭର-ବ୍ରଣ୍ଟ ୪୧ଟି ବଲ୍ରୁ ୧୦ ଚୌକା ଓ ୨ଛକା ବଳରେ ୭୭ ରନ୍ କରି ଆଉଟ୍ ହୋଇଥିଲେ । ହର୍ମନପ୍ରୀତ ୧୨ଟି ବଲ୍ରୁ ୨ଚୌକା ଓ ୪ଛକା ବଳରେ ୩୬ ରନ୍ କରିବା ଫଳରେ ଦଳୀୟ ସ୍କୋର ୨୧୩ରେ ପହଞ୍ଚିଥିଲା
୧୨୦ଟି ବଲ୍ରେ ୨୧୪ ରନ୍ର ଲକ୍ଷ୍ୟ ହାସଲ କରିବା ସହଜ ନଥିଲା । ଗଜୁରାଟ ଜାଏଣ୍ଟ୍ସ ବିଶାଳ ଲକ୍ଷ୍ୟର ଚାପରେ ଭାଙ୍ଗି ପଡ଼ିଥିଲା । ମୁମ୍ବାଇ ଇଣ୍ଡିଆନ୍ସ ବୋଲରମାନେ ମଧ୍ୟ ଶୃଙ୍ଖଳିତ ବୋଲିଂ କରିଥିଲେ । ଫଳରେ ଗୁଜରାଟ ଜାଏଣ୍ଟ୍ସ ବ୍ୟାଟରମାନେ ବଡ଼ ସଟ୍ ଖେଳିବାକୁ ଯାଇ ବିଫଳ ହୋଇଥିଲେ । ଦଳ ନିୟମିତ ବ୍ୟବଧାନରେ ୱିକେଟ୍ ହରାଇ ଶେଷରେ ୧୯.୨ ଓଭରରେ ୧୬୬ ରନ କରି ଅଲ୍ ଆଉଟ୍ ହୋଇଯାଇଥିଲା । ଓପନର ଡାନିଏଲା ଗିବସନ ସର୍ବାଧିକ ୩୪(୫ଚୌକା, ୧ଛକା) ରନ କରିଥିଲେ । ଅନ୍ୟମାନଙ୍କ ମଧ୍ୟରେ ଫୋଏବ ଲିଚଫିଲ୍ଡ ୨୦ଟି ବଲ୍ରୁ ୩୧(୪ଚୌକା, ୧ଛକା), ଭାରତୀ ଫୁଲମାଲି ୨୦ଟି ବଲ୍ରୁ ୩୦(୩ଚୌକା, ୧ଛକା), ସିମରନ ଶେଖ ୧୭ ଓ ତନୁଜା କୱଁର ୧୬ ରନ କରିଥିଲେ । ଅନ୍ୟ କେହି ଦୁଇ ଅଙ୍କ ଛୁଇଁପାରି ନଥିଲେ । ମୁମ୍ବାଇ ଇଣ୍ଡିଆନ୍ସ ପକ୍ଷରୁ ମାଥ୍ୟୁସ ୩ଟି ଓ ଆମେଲିଆ କେର ୨ଟି ୱିକେଟ୍ ନେଇଥିଲେ ।
