ମୁମ୍ବାଇ: ମାର୍ଚ୍ଚ ୨୨ରୁ IPL 2025 ଆରମ୍ଭ ହେବାକୁ ଯାଉଛି । ଟୁର୍ଣ୍ଣାମେଣ୍ଟର ମୁମ୍ବାଇ ଇଣ୍ଡିଆନ୍ସ ପ୍ରଥମେ ଚେନ୍ନାଇ ସୁପର କିଙ୍ଗ୍ସ ସହ ଖେଳିବ । ଦୁଇ ଦଳ ମଧ୍ୟରେ ପ୍ରଥମ ମୁକାବିଲା ୨୩ ମାର୍ଚ୍ଚରେ ହେବ । କିନ୍ତୁ ଏହି ମ୍ୟାଚ୍ ଷ୍ଟାର ଅଲରାଉଣ୍ଡର ତଥା ମୁମ୍ବାଇ ଅଧିନାୟକ ହାର୍ଦ୍ଦିକ ପାଣ୍ଡ୍ୟା ଖେଳିପାରିବେ ନାହିଁ । ତାଙ୍କୁ ଗୋଟିଏ ମ୍ୟାଚ୍ ପାଇଁ ବାସନ୍ଦ କରାଯାଇଥିବାରୁ ଏହି ହାଇ-ଭୋଲଟେଜ୍ ମ୍ୟାଚ୍ରେ ତାଙ୍କୁ ବେଞ୍ଚରେ ବସିବାକୁ ପଡିବ । ଯଦି ସେ ନଖେଳିବେ ତେବେ ମୁମ୍ବାଇର ଅଧିନାୟକ କିଏ ହେବ ?
ଗତ ସିଜନରେ ହାର୍ଦ୍ଦିକ ଅଧିନାୟକ ଭାବରେ ମୁମ୍ବାଇ ଇଣ୍ଡିଆନ୍ସକୁ ଫେରିଥିଲେ । ଏହି କାରଣରୁ ବହୁତ ବିବାଦ ହୋଇଥିଲା। ପରିଣାମ ସ୍ୱରୂପ ମୁମ୍ବାଇ ଦଳର ପ୍ରଦର୍ଶନ ଖରାପ ହୋଇଥିଲା । ପାଣ୍ଡ୍ୟାଙ୍କ ଅଧିନାୟକତ୍ୱରେ ଦଳ ଶେଷ ସ୍ଥାନରେ ରହିଥିଲା । ଏହି କାରଣରୁ ତାଙ୍କୁ ବହୁତ ସମାଲୋଚନା କରାଯାଇଥିଲା। କେବଳ ଏତିକି ନୁହେଁ, ଅଧିନାୟକ ପାଣ୍ଡ୍ୟା ତିନି ଥର ସ୍ଲୋ ଓଭର ରେଟ୍ ପାଇଁ ଗୋଟିଏ ମ୍ୟାଚ୍ରୁ ବାସନ୍ଦ ହୋଇଥିଲେ । ତୃତୀୟ ମ୍ୟାଚ୍ଟି ମୁମ୍ବାଇ ଦଳର ଶେଷ ମ୍ୟାଚ୍ ଥିଲା । ଏଥିପାଇଁ ପାଣ୍ଡ୍ୟା ଆଇପିଏଲ ୨୦୨୫ ସିଜିନ୍ର ପ୍ରଥମ ମ୍ୟାଚ୍ରୁ ବାସନ୍ଦ ହୋଇଛନ୍ତି ।
ପ୍ରଥମ ମ୍ୟାଚ୍ରେ ପାଣ୍ଡ୍ୟା ଖେଳିବେ ନାହିଁ । ତେଣୁ ତାଙ୍କ ସ୍ଥାନରେ ଦଳର ଅନ୍ୟ କେଉଁ ଖେଳାଳି ଅଧିନାୟକ ରହିବେ । ଜସପ୍ରିତ ବୁମରାହ IPLର ପ୍ରଥମାର୍ଦ୍ଧରୁ ବାହାରେ ଅଛନ୍ତି । ଏହାର ଅର୍ଥ ହେଉଛି ସେ ମୁମ୍ବାଇ ଅଧିନାୟକ ଦୌଡ଼ରେ ରହିବେ ନାହିଁ । ଏବେ ହାର୍ଦ୍ଦିକଙ୍କ ଅନୁପସ୍ଥିତିରେ, ସୂର୍ଯ୍ୟକୁମାର ଯାଦବ ଏବଂ ରୋହିତ ଶର୍ମା ଅଧିନାୟକ ପାଇଁ ଦୁଇ ବଡ଼ ଦାବିଦାର ରହିଛନ୍ତି । ରୋହିତଙ୍କ କ୍ୟାପ୍ଟେନ୍ସିରେ ମୁମ୍ବାଇ ୫ ଥର ଟ୍ରଫି ଜିତିଥିଲା ।
ଅନ୍ୟପଟେ ଟିମ୍ ଇଣ୍ଡିଆର ଟି-୨୦ ଦଳର ଅଧିନାୟକ ଥିବା ସୂର୍ଯ୍ୟକୁମାର ଯାଦବଙ୍କର ମଧ୍ୟ ଏକ ଭଲ ରେକର୍ଡ ରହିଛି । ସେ ଅନ୍ତର୍ଜାତୀୟ ସ୍ତରରେ ୨୩ଟି ଟି-୨୦ ମ୍ୟାଚ୍ରେ ଅଧିନାୟକତ୍ୱ କରିଛନ୍ତି । ସେଥି ମଧ୍ୟରୁ ଭାରତ ୧୮ଟି ମ୍ୟାଚ୍ରେ ବିଜୟୀ ହୋଇଛି ଏବଂ ୪ଟିରେ ପରାସ୍ତ ହୋଇଛି । ତେବେ ରୋହିତ ପୁଣି ଥରେ ଅଧିନାୟକ ଦାୟିତ୍ବ ଗ୍ରହଣ କରିବା କଷ୍ଟକର ମନେ ହେଉଛି। ତେଣୁ ସୂର୍ଯ୍ୟକୁମାର ଯାଦବ ଚେନ୍ନାଇ ସୁପର କିଙ୍ଗ୍ସ ବିପକ୍ଷରେ ମୁମ୍ବାଇର ଅଧିନାୟକ ହୋଇପାରନ୍ତି ।
