ମୁମ୍ବାଇ: ଭାରତୀୟ ଦଳର ଷ୍ଟାର ଦ୍ରୁତ ବୋଲର ଜସପ୍ରୀତ ବୁମରାଙ୍କ ଖେଳିବା ଉପରେ ଆଶଙ୍କା ଲାଗି ରହିଛି । ଏପରିକି ତାଙ୍କୁ ଆଇପିଏଲ ୨୦୨୫ରେ ମଧ୍ୟ ଦେଖିବାକୁ ମିଳିନପାରେ । ପିଠିରେ ଆଘାତ ଯୋଗୁଁ ଭାରତୀୟ ଦଳରୁ ବାହାରେ ଥିବା ବୁମରା ଏବେ ଆଇପିଏଲରେ ମଧ୍ୟ ଖେଳିପାରିବେ ନାହିଁ । ମୁମ୍ବାଇ ଇଣ୍ଡିଆନ୍ସ ଦଳରେ ସାମିଲ ବୁମରା ଆରମ୍ଭରୁ କେତୋଟି ମ୍ୟାଚ୍ ଖେଳିବେ ନାହିଁ ବୋଲି ଜଣାପଡ଼ିଛି । ପିଠିରେ ଆଘାତ ଲାଗିଥିବାରୁ ବୁମରା ଏବେ ବି ସଂପୂର୍ଣ୍ଣ ସୁସ୍ଥ ହୋଇ ନାହାନ୍ତି । ବର୍ଡର-ଗାଭାସ୍କର ଟ୍ରଫିରେ ବୁମରାଙ୍କ ପିଠିରେ ଆଘାତ ଲାଗିଥିଲା । ୫ ମ୍ୟାଚ୍ ବିଶିଷ୍ଟ ସିରିଜର ଶେଷ ମ୍ୟାଚରେ ସେ ଏହି ଆଘାତର ଶିକାର ହୋଇଥିଲେ ।
ଏହା ପରେ ସେ ସମ୍ପୂର୍ଣ୍ଣ ମ୍ୟାଚ୍ ପାଇଁ ବୋଲିଂ କରିପାରି ନଥିଲେ । ଏହି ଆଘାତ ଯୋଗୁଁ ବୁମରା ଇଂଲଣ୍ଡ ବିପକ୍ଷ ଦିନିକିଆ ସିରିଜ ଏବଂ ୨୦୨୫ ଚାମ୍ପିଅନ୍ସ ଟ୍ରଫିରୁ ବାଦ ପଡିଥିଲେ। ଏବେ ସେ ଆଇପିଏଲ୍ ୨୦୨୫ର କିଛି ମ୍ୟାଚରୁ ବାଦ ପଡ଼ିବେ ବୋଲି ଜଣାପଡ଼ିଛି । ଇଏସ୍ପିଏନ୍ କ୍ରିକ୍ଇନଫୋର ରିପୋର୍ଟ ଅନୁସାରେ, ଜସପ୍ରିତ ବୁମରା ଏପ୍ରିଲ ଆରମ୍ଭରୁ ଦଳରେ ଯୋଗଦେବେ ବୋଲି ଆଶା କରାଯାଉଛି । ଏପରି ପରିସ୍ଥିତିରେ ସେ ମାର୍ଚ୍ଚରେ ନିର୍ଦ୍ଧାରିତ ମୁମ୍ବାଇ ଇଣ୍ଡିଆନ୍ସର ୩ଟି ମ୍ୟାଚ୍ ଖେଳିପାରିବେ ନାହିଁ । ତେବେ ପ୍ରକୃତରେ ବୁମରା କେତୋଟି ମ୍ୟାଚ୍ ଖେଳିବେ ନାହିଁ ଏବଂ ସେ କେବେ ଦଳକୁ ଫେରିବେ ସେନେଇ ଟିମ୍ ପକ୍ଷରୁ କୌଣସି ସ୍ପଷ୍ଟ ସୂଚନା ମିଳିନାହିଁ ।
ଆଇପିଏଲ ପରେ ଜୁନରେ ଟିମ୍ ଇଣ୍ଡିଆ ଟେଷ୍ଟ ସିରିଜ୍ ପାଇଁ ଇଂଲଣ୍ଡ ଗସ୍ତ କରିବ । ତେଣୁ ବିସିସିଆଇ ଏହି ଷ୍ଟାର ବୋଲରଙ୍କ ଫିଟନେସ୍ ଉପରେ ନଜର ରଖିଛି । ଏପରି ପରିସ୍ଥିତିରେ, ବିସିସିଆଇର ଟିମ୍ ମ୍ୟାନେଜମେଣ୍ଟ ଏବଂ ଡାକ୍ତରୀ ଦଳ ବୁମରାଙ୍କ ସମ୍ପର୍କରେ କୌଣସି ତରବରିଆ ପଦକ୍ଷେପ ନେବାକୁ ଚାହିଁବେ ନାହିଁ । ଏନସିଏ ବୁମରାଙ୍କୁ ଫିଟ୍ ଘୋଷଣା କରିବା ପରେ ହିଁ ସେ ଖେଳିପାରିବେ । ମୁମ୍ବାଇ ଇଣ୍ଡିଆନ୍ସ ଏବେ ଜାତୀୟ କ୍ରିକେଟ ଏକାଡେମୀ (ଏନସିଏ) ଡାକ୍ତରୀ ଦଳର ଅନୁମୋଦନ ପାଇଁ ଅପେକ୍ଷା କରିଛି । ଏହା ପରେ ହିଁ ଷ୍ଟାର ବୋଲର ବୁମରା ଆଇପିଏଲ ଖେଳିପାରିବେ ।
ସୂଚନାଯୋଗ୍ୟ, ମୁମ୍ବାଇ ଟିମ୍ ମାର୍ଚ୍ଚ ୨୩ରେ ଚେନ୍ନାଇ ସୁପର କିଙ୍ଗ୍ସ ବିପକ୍ଷରେ ନିଜର ଆଇପିଏଲ ଅଭିଯାନ କରିବ । ଏହା ପରେ ମାର୍ଚ୍ଚ ୨୯ରେ ଗୁଜରାଟ ଟାଇଟନ୍ସ ସହ ଖେଳିବ ମୁମ୍ବାଇ ଇଣ୍ଡିଆନ୍ସ । ମୁମ୍ବାଇ ଟିମ୍ ହୋମ ଗ୍ରାଉଣ୍ଡ ଓ୍ବାଙ୍ଖଡେ ଷ୍ଟାଡିୟମରେ ମାର୍ଚ୍ଚ ୩୧ରେ ଡିଫେଣ୍ଡିଂ ଚାମ୍ପିଅନ କୋଲକାତା ନାଇଟ୍ ରାଇଡର୍ସ ସହ ମୁକାବିଲା କରିବ । ସେହିଭଳି ମୁମ୍ବାଇ ନିଜର ଚତୁର୍ଥ ମ୍ୟାଚ୍ ଏଲଏସ୍ଜି ସହ ଏପ୍ରତିଲ ୪ରେ ଖେଳିବ ।
