ନୂଆଦିଲ୍ଲୀ,୭/୦୬: ୟୁକ୍ରେନ୍ ଉପରେ ଋଷର ସବୁଠୁ ବଡ଼ ଆଟାକ୍ । ଅପରେସନ୍ ସ୍ପାଇଡରଓ୍ୱେବ୍ର ଜବାବ ମିସାଇଲରେ ଦେଇଛି ଋଷିଆ। ୟୁକ୍ରେନର ପ୍ରାୟ ସମସ୍ତ ପ୍ରମୁଖ ଅଞ୍ଚଳ ଉପରେ ୪୦୦ରୁ ଅଧିକ ଡ୍ରୋନ୍ ଏବଂ ୪୦ରୁ ଅଧିକ ମିସାଇଲ ମାଡ଼ କରିଛି ଋଷ । ଯେଉଁଥିରେ ଅତିକମରେ ୬ ଜଣଙ୍କର ମୃତ୍ୟୁ ହୋଇଥିବା ବେଳେ ଅନେକ ଆହତ ହୋଇଛନ୍ତି।
ୟୁକ୍ରେନର ରାଷ୍ଟ୍ରପତି ଜେଲେନ୍ସକି ଏନେଇ ସୋସିଆଲ ମିଡ଼ିଆ ଏକ୍ସରେ ସୂଚନା ଦେଇ କହିଛନ୍ତି ଯେ, ‘ଆଜି ଆମ ଦେଶର ବିଭିନ୍ନ ଅଞ୍ଚଳ ଏବଂ ସହରଗୁଡ଼ିକରେ ଦିନସାରା ଉଦ୍ଧାର ଏବଂ ଜରୁରୀକାଳୀନ କାର୍ଯ୍ୟ ଜାରି ରହିଛି । ଋଷ ଦ୍ୱାରା ୪୦୦ରୁ ଅଧିକ ଡ୍ରୋନ୍, ୪୦ରୁ ଅଧିକ କ୍ଷେପଣାସ୍ତ୍ର ନିକ୍ଷେପ କରାଯାଇଛି । ଏଥିରେ ୮୦ ଜଣ ଆହତ ହୋଇଛନ୍ତି ଏବଂ କିଛି ଏବେ ବି ଭଗ୍ନାବଶେଷ ତଳେ ଥାଇପାରନ୍ତି’ । ସେ ଆହୁରି କହିଛନ୍ତି ‘ଦୁର୍ଭାଗ୍ୟବଶତଃ, ବିଶ୍ୱର କେହି ବି ଏପରି ଆକ୍ରମଣକୁ ନିନ୍ଦା କରନ୍ତିନି। ପୁଟିନ୍ ଏହାର ସୁଯୋଗ ନିଅନ୍ତି। ସେ ଯୁଦ୍ଧ ଜାରି ରଖିବା ପାଇଁ ନିଜକୁ ସମୟ ଦେଉଛନ୍ତି’ । ୟୁକ୍ରେନୀୟ ରାଜ୍ୟ ଜରୁରୀକାଳୀନ ସେବାର ସୂଚନା ଅନୁଯାୟୀ, କିଭରେ ୩ ଜଣ ଅଗ୍ନିଶମ କର୍ମଚାରୀ, ଲୁସ୍କରେ ଦୁଇଜଣ ସାଧାରଣ ନାଗରିକ ଏବଂ ଚେର୍ନିହିଭରେ ଆଉ ଜଣେ ବ୍ୟକ୍ତି ନିହତ ହୋଇଛନ୍ତି । ମୋଟାମୋଟି ଅତିକମରେ ୬ ଜଣଙ୍କର ମୃତ୍ୟୁ ହୋଇଥିବା ବେଳେ ଅନେକ ଆହତ ହୋଇଛନ୍ତି।
ସେପଟେ ଆକ୍ରମଣ ପରେ,ତେବେ ଆକ୍ରମଣକୁ ନେଇ ରୁଷର ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ ଏହା କିଭ୍ର ‘ଆତଙ୍କବାଦୀ କାମ’ର ଜବାବରେ ଥିଲା । ଋଷ ଗତ ସପ୍ତାହରେ ୟୁକ୍ରେନ୍ କରିଥିବା ଅପରେସନ୍ ସ୍ପାଇଡରଓ୍ୱେବ୍କୁ ଉଲ୍ଲେଖ କରିଛି । ଯେଉଁଥିରେ ରୁଷର ଏକ ତୃତୀୟାଂଶ କ୍ରୁଜ୍ ମିସାଇଲ୍ ବାହକଙ୍କୁ ୟୁକ୍ରେନ୍ ସେନା ଟାର୍ଗେଟ କରିଥିଲା । ଋଷର ଏହି ସାମରିକ ଆକ୍ରମଣ ୩ ବର୍ଷ ଧରି ଚାଲିଥିବା ଯୁଦ୍ଧରେ ୟୁକ୍ରେନ୍ ଉପରେ ହୋଇଥିବା ସବୁଠାରୁ ବଡ଼ ଆକ୍ରମଣ। ଏଥିରେ ପୁରା ୟୁକ୍ରେନ୍କୁ ଟାର୍ଗେଟ କରାଯାଇଥିଲା । ଯେଉଁଥିରେ କିଭ୍, ଲ୍ଭିଭ୍ ଏବଂ ସୁମି ସମେତ ୯ଟି ଅଞ୍ଚଳ ପ୍ରଭାବିତ ହୋଇଥିଲା।
