ନୂଆଦିଲ୍ଲୀ, ୭।୬: ନିକଟରେ ବୈଜ୍ଞାନିକ ଏକ ଚମତ୍କାର ଆବିଷ୍କାର କରିଛନ୍ତି । ନୂତନ ପ୍ରଯୁକ୍ତିବିଦ୍ୟା ସାହାଯ୍ୟରେ ପାଣିରୁ ହାଇଡ୍ରୋଜେନ୍ ଇନ୍ଧନ ବାହାର କରାଯିବ । ଲୁଣ ଅପସାରଣ ବା ବାହାର ନକରି ସିଧାସଳଖ ଉତ୍ପାଦନ ହେବ ହାଇଡ୍ରୋଜେନ୍ । ସଂଯୁକ୍ତ ଆରବ ଏମିରାତର ଶାରଜାହା ବିଶ୍ୱବିଦ୍ୟାଳୟର ବୈଜ୍ଞାନିକମାନେ ଏଭଳି ଅନନ୍ୟ ପ୍ରଯୁକ୍ତିବିଦ୍ୟା ବିକଶିତ କରିଛନ୍ତି । ଏବେ ସିଧାସଳଖ ସମୁଦ୍ର ପାଣିରୁ ସ୍ୱଚ୍ଛ ହାଇଡ୍ରୋଜେନ୍ ଇନ୍ଧନ ବାହାର କରିହେବ । କୌଣସି ରାସାୟନିକ ପଦାର୍ଥ କିମ୍ବା ମହଙ୍ଗା ଡିସାଲିନେସନ୍ (ଲୁଣ ବାହାର କରି) ପ୍ରକ୍ରିୟା ବିନା ଏହା ସମ୍ଭବ ହେବ । ଏହି ପ୍ରଯୁକ୍ତିବିଦ୍ୟା ଖଣିଜ ଲବଣ ଅପସାରଣ ନକରି ସମୁଦ୍ରର ଲୁଣିଆ ପାଣିରୁ ଶିଳ୍ପ ସ୍ତରରେ ହାଇଡ୍ରୋଜେନ୍ ଉତ୍ପାଦନ ସମ୍ଭବ କରିଥାଏ ।
ସାଧାରଣତଃ, ହାଇଡ୍ରୋଜେନ୍ ତିଆରି କରିବା ପାଇଁ ବିଶୁଦ୍ଧ ପାଣି ଆବଶ୍ୟକ, ଯାହା ଅନେକ ଦେଶରେ ଉପଲବ୍ଧ ନୁହେଁ, କିନ୍ତୁ ଏହି ନୂତନ ଆବିଷ୍କାର ସେହି ଆବଶ୍ୟକତାକୁ ଦୂର କରିଛି । ଏହି ଗବେଷଣାର ପ୍ରମୁଖ ବୈଜ୍ଞାନିକ ଡକ୍ଟର ତନବୀର ଉଲ୍ ହଙ୍କଙ୍କ ଅନୁଯାୟୀ, ଦଳ ଏକ ବହୁସ୍ତରୀୟ ଇଲେକ୍ଟ୍ରୋଡ୍ ପ୍ରସ୍ତୁତ କରିଛି, ଯାହା ସମୁଦ୍ର ପାଣିରେ କ୍ଲୋରାଇଡ୍ ଆୟନ ଦ୍ୱାରା ହେଉଥିବା କ୍ଷୟ ଏବଂ ଅବକ୍ଷୟରୁ ନିଜକୁ ରକ୍ଷା କରେ । ଏହି ଇଲେକ୍ଟ୍ରୋଡ୍ ଏକ ସୂକ୍ଷ୍ମ-ପରିବେଶ ସୃଷ୍ଟି କରେ ଯାହା ହାଇଡ୍ରୋଜେନ୍ ଉତ୍ପାଦନକୁ ତ୍ୱରାନ୍ୱିତ କରେ ଏବଂ ଡିଭାଇସକୁ ଦୀର୍ଘ ସମୟ ପାଇଁ ସ୍ଥାୟୀ କରିଥାଏ ବା ଠିକ ରଖିଥାଏ । ଏହି ସିଷ୍ଟମରେ କୌଣସି ରାସାୟନିକ ପଦାର୍ଥ ବ୍ୟବହାର କରାଯିବ ନାହିଁ ଏବଂ ଏହା କୌଣସି କାର୍ଯ୍ୟଦକ୍ଷତା କ୍ଷତି ବିନା ୩୦୦ ଘଣ୍ଟା ପର୍ଯ୍ୟନ୍ତ କାମ କରେ ।
