ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଟେସଲା ମୁଖ୍ୟ ଏଲୋନ ମସ୍କଙ୍କ ମଧ୍ୟରେ ବିବାଦ ବଢ଼ିବା ପରେ,ଏବେ ବାକ୍ ଯୁଦ୍ଧ ମଧ୍ୟ ତୀବ୍ର ହେବା ଆରମ୍ଭ ହେଲାଣି। ଆମେରିକା ରାଷ୍ଟ୍ରପତି ନିର୍ବାଚନ ସମୟରେ ଉଭୟ ପରସ୍ପରର ବହୁତ ପ୍ରଶଂସା କରୁଥିଲେ, ଏବେ ଉଭୟ ଖୋଲାଖୋଲି ଭାବେ ମୁହାଁମୁହିଁ ହୋଇଛନ୍ତି। ଟ୍ରମ୍ପ ଶୁକ୍ରବାର କହିଛନ୍ତି ଯେ, ଏଲନ ମସ୍କ ତାଙ୍କ ସହ କଥା ହେବାକୁ ଚାହାଁନ୍ତି,କିନ୍ତୁ ସେ ଆଲୋଚନା ପାଇଁ ପ୍ରସ୍ତୁତ ନୁହଁନ୍ତି।

ଏକ ଗଣମାଧ୍ୟମର ସାକ୍ଷାତକାରରେ ଟ୍ରମ୍ପ ଏଲନ ମସ୍କଙ୍କ ବିଷୟରେ କହିଛନ୍ତି ଯେ, ସେ ପାଗଳ ହୋଇଯାଇଛନ୍ତି। ଏହା ପୂର୍ବରୁ ଖବର ଆସିଥିଲା ଯେ ହ୍ୱାଇଟ୍ ହାଉସ୍ ଅଧିକାରୀ ମାନେ ବିବାଦର ଅନ୍ତ ପାଇଁ ଜୁନ୍ ୬ ରେ ଟ୍ରମ୍ପ ଏବଂ ଏଲନ ମସ୍କଙ୍କ ମଧ୍ୟରେ ଏକ ବୈଠକ ସ୍ଥିର କରିଛନ୍ତି। ଆଉ ଯେତେବେଳେ ଏବେ ଟ୍ରମ୍ପଙ୍କୁ ଏହି ବୈଠକର କାର୍ଯ୍ୟସୂଚୀ ବିଷୟରେ ପଚରାଯାଇଥିଲା, ସେ ଏଲନ ମସ୍କଙ୍କୁ ଭେଟିବାକୁ ମନା କରିଦେଇଥିଲେ।

ଟ୍ରମ୍ପ କହିଥିଲେ ଯେ, ସେ ଏଲନ ମସ୍କଙ୍କୁ ବହୁତ ସାହାଯ୍ୟ କରିଥିଲେ, କିନ୍ତୁ ଏବେ ସେ ମସ୍କଙ୍କ ଉପରେ ବହୁତ ନିରାଶ। ସେ ଦାବି କରିଛନ୍ତି ଯେ, ମସ୍କ EV ଟିକସ ପ୍ରୋତ୍ସାହନ ହଟାଇବା ଉପରେ ରାଗିଛନ୍ତି। ଏହା ଉପରେ ମସ୍କ ଦାବି କରିଛନ୍ତି ଯେ,ମୋତେ ଏହି ବିଲ୍ ବିଷୟରେ ଥରେ ମଧ୍ୟ ସୂଚନା ଦିଆଯାଇ ନଥିଲା ଏବଂ ଏହା ମଧ୍ୟରାତ୍ରିରେ ପାସ୍ ହୋଇଥିଲା। ମସ୍କ ଏପରିକି କହିଥିଲେ ଯେ ଟ୍ରମ୍ପ ମୋ ଯୋଗୁଁ ନିର୍ବାଚନ ଜିତିଛନ୍ତି। ଯଦି ମୁଁ ସେଠାରେ ନ ଥାନ୍ତି, ତେବେ ଟ୍ରମ୍ପଙ୍କ ପରାଜୟ ନିଶ୍ଚିତ ଥିଲା।

ତେବେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଥିଲେ ଯେ ଯେତେବେଳେ ମୁଁ ବୈଦ୍ୟୁତିକ ଯାନବାହନ ସମ୍ବନ୍ଧୀୟ ତାଙ୍କର ଆଇନଗତ ଆଦେଶ ପ୍ରତ୍ୟାହାର କରିନେଲି, ମସ୍କ ରାଗିଗଲେ । ଟ୍ରମ୍ପ ମସ୍କଙ୍କ କମ୍ପାନୀକୁ ଦିଆଯାଇଥିବା ସବସିଡି ବନ୍ଦ କରିବାକୁ ମଧ୍ୟ ଧମକ ଦେଇଥିଲେ, ଯାହା ପରେ ଏଲନ ମସ୍କ ମଧ୍ୟ ଖୋଲାଖୋଲି ଭାବରେ ବିବାଦକୁ ଓହ୍ଲାଇଥିଲେ।