ନୂଆଦିଲ୍ଲୀ: ସର୍ଚ୍ଚ ଇଞ୍ଜିନ୍ ଗୁଗଲ୍ ଉପରେ ୨୦ ଡିସିଲିୟନ ଜରିମାନା ଲଗାଇଛି ଋଷର । ୨୦ ଡିସିଲିୟନର ଅର୍ଥ ୨ରେ ୩୪ଟି ଶୁନ୍ ଡଲାର । ଅର୍ଥାତ ଗୁଗଲ ଉପରେ ୨୦, ୦୦୦,୦୦୦,୦୦୦,୦୦୦,୦୦୦,୦୦୦,୦୦୦,୦୦୦,୦୦୦,୦୦୦,୦୦୦ ଡଲାରର ଜରିମାନା ଲଗାଇଛି ଋଷ । ଜରିମାନା ରାଶି ବିଶ୍ୱର ମୋଟ ଜିଡିପି ଠାରୁ ପ୍ରାୟ ୬୦୦ ଗୁଣ ଅଧିକ । ବିଶ୍ୱରେ ଯେତିକି ସମ୍ପତ୍ତି ନାହିଁ, ତା’ଠାରୁ ଅଧିକ ପରିମାଣର ଜରିମାନା ଋଷର ଗୋଟିଏ କୋର୍ଟ ଗୁଗଲ ଉପରେ ଲଗାଇଛନ୍ତି । ଗୁଗଲ ଉପରେ ଲାଗିଥିବା ଜରିମାନାକୁ ନେଇ ଏବେ ସମଗ୍ର ବିଶ୍ବରେ ଚର୍ଚ୍ଚା ଲାଗି ରହିଛି ।
ଗୁଗଲର ମୂଳ କମ୍ପାନି ଆଲଫାବେଟ୍ ମାଲିକାନାରେ ଥିବା ୟୁଟ୍ୟୁବ ଉପରେ ଏହି ଜରିମାନା ଲାଗିଛି । ୟୁକ୍ରେନ ଉପରେ ଋଷ କରୁଥିବା ଆକ୍ରମଣ ସମ୍ପର୍କିତ ଖବରକୁ ନେଇ ଗୁଗଲ ଓ ମସ୍କୋ ମୁହାଁମୁହିଁ ହୋଇଥିଲେ । ଯୁଦ୍ଧ ସମ୍ପର୍କରେ ଋଷ ସରକାରଙ୍କ ଦ୍ୱାରା ପରିଚାଳିତ ଟିଭି ଚ୍ୟାନେଲ ଯେଉଁ ଖବର ପ୍ରସାରଣ କରୁଥିଲା, ତା’କୁ ୟୁଟ୍ୟୁବ ନିଜ ପ୍ଲାଟଫର୍ମରୁ ହଟାଇ ଦେଇଥିଲା । ଏପରିକି ୟୁଟ୍ୟୁବ ଋଷ ସରକାରଙ୍କ ଚ୍ୟାନେଲକୁ ବ୍ୟାନ କରି ଦିଆଯାଇଥିଲା । ଏହା ବିରୋଧରେ ଋଷ ଏକ କୋର୍ଟରେ ମାମଲା ହୋଇଥିଲା । ଏହାର ଶୁଣାଣି କରି ଋଷୀୟ କୋର୍ଟ ଗୁଗଲ ଉପରେ ୨୦ ଡିସିଲିୟନ ଡଲାର ଜରିମାନା ଲଗାଇଛନ୍ତି ।
ୟୁଟ୍ୟୁବରେ ଋଷ ସରକାରଙ୍କ ଚ୍ୟାନେଲଗୁଡ଼ିକୁ ବ୍ୟାନ କରି ଗୁଗଲ ଜାତୀୟ ପ୍ରସାରଣ ନିୟମର ଉଲ୍ଲଂଘନ କରିଛି। ତେଣୁ ସଂସ୍ଥାକୁ ଦଣ୍ଡିତ କରାଯାଉଛି ବୋଲି କୋର୍ଟ କହିଛନ୍ତି । ଏହା ସହ ଏହି ଚ୍ୟାନେଲଗୁଡ଼ିକର ପୁନଃ ପ୍ରସାରଣ କରିବାକୁ କୋର୍ଟ ପକ୍ଷରୁ ନିର୍ଦ୍ଦେଶ ଦିଆଯାଇଛି । ଯଦି ପ୍ଲାଟଫର୍ମ ୯ ମାସ ମଧ୍ୟରେ ଏହି ଆଦେଶ ପାଳନ ନକରେ ତେବେ ଜରିମାନା ରାଶିକୁ ପ୍ରତିଦିନ ବଢ଼ାଯିବ । ପ୍ରତିଦିନ ଗୁଗଲ ଉପରେ ଲାଗିଥିବା ଜରିମାନାରେ ୧୨୦୦ ଡଲାର ଲେଖାଏଁ ବୃଦ୍ଧି ପାଇବ ବୋଲି କୋର୍ଟ କହିଛନ୍ତି ।
ସୂଚନାଯୋଗ୍ୟ, ୨୦୨୦ ପାଖରୁ ଗୁଗଲ ଉପରେ ଜରିମାନା ଲଗାଇ ଆସିଛନ୍ତି ଋଷୀୟ କୋର୍ଟ । ସେତେବେଳେ ୟୁଟ୍ୟୁବ୍ ଋଷ ସରକାରଙ୍କ ଦ୍ବାରା ସ୍ବିକୃତୀପ୍ରାପ୍ତ ଦୁଇଟି ଚ୍ୟାନେଲ୍ ସାରଗ୍ରାଡ୍ ଏବଂ ରିଆ ଫ୍ୟାନ୍କୁ ବ୍ୟାନ କରିଦେଇଥିଲା । ଏବେ ସୁଦ୍ଧା ୧୭ରୁ ଅଧିକ ଋଷୀୟ ଚ୍ୟାନେଲ୍ ୟୁଟ୍ୟୁବ୍ ବିରୋଧରେ କୋର୍ଟଙ୍କ ଦ୍ବାରସ୍ଥ ହୋଇଛନ୍ତି । ପୁଣି ଥରେ ଚ୍ୟାନେଲଗୁଡ଼ିକ ୟୁଟ୍ୟୁବ୍ରେ ଆସିବା ଦରକାର ବୋଲି କମ୍ପାନିଗୁଡ଼ିକ ଦାବି କରିଛନ୍ତି ।
