ଦାରିଙ୍ଗବାଡି,୧୬/୯(ଆପ୍ର): ଲୋକଙ୍କୁ ଗୋଳିଆ ପାଣି ଯୋଗାଣ କରି ନିରାପଦ ପାନୀୟ ଜଳ ଯୋଗାଣ କରାଯାଉଥିବା ନେଇ ଜିଲ୍ଲାପାଳଙ୍କୁ ରିପୋର୍ଟ ପ୍ରଦାନ କରିଛନ୍ତି ଦାରିଙ୍ଗବାଡି ବିଡ଼ିଓ ଗଦାଧର ପାତ୍ର । ଗ୍ରାମ୍ୟ ଜଳ ଯୋଗାଣ ବିଭାଗର ସହକାରୀ ଯନ୍ତ୍ରୀଙ୍କ ରିପୋର୍ଟକୁ ଆଧାର କରି ଏହି ରିପୋର୍ଟ ପ୍ରଦାନ କରାଯାଇଥିବା ଚିଠିରେ ଉଲ୍ଲେଖ ଅଛି । ଯାହାକୁ କି ଅଞ୍ଚଳବାସୀ ଆଦୌ ଗ୍ରହଣ କରି ପାରିନାହାନ୍ତି । 

ଗ୍ରାମ୍ୟ ଜଳ ଯୋଗାଣ ବିଭାଗ ସହକାରୀ ଯନ୍ତ୍ରୀ ଜିଲ୍ଲାପାଳଙ୍କୁ ଭୁଲ ତଥ୍ୟ ପ୍ରଦାନ କରି ଭୁଆଁ ବୁଲାଉଥିବା ନେଇ ତାତିଛନ୍ତି ଅଞ୍ଚଳବାସୀ । ଗତ ଜୁଲାଇ ମାସ ୧ ତାରିଖ ଦିନ ପ୍ରମେୟ ଖବର କାଗଜରେ ବିଶୁଦ୍ଧ ଜଳ ନାଁରେ ଗୋଳିଆ ପାଣି ଯୋଗାଣ ଶୀର୍ଷକ ନେଇ ଏକ ଖବର ପ୍ରକାଶ ପାଇଥିଲା । ଖବର ପ୍ରକାଶ ପାଇବା ପରେ ରାଜେଶ କୁମାର ବଗର୍ତ୍ତି ଏହାକୁ ଏକ୍ସ ମାଧ୍ୟମରେ ବିଭିନ୍ନ ବିଭାଗ ଟ୍ୟାଗ କରିଥିଲେ । ହେଲେ ଗତ ୧୨ ତାରିଖ ଦିନ ଦାରିଙ୍ଗବାଡି ବିଡ଼ିଓ ଗ୍ରାମ୍ୟ ଜଳ ଯୋଗାଣ ବିଭାଗର ସହକାରୀ ଯନ୍ତ୍ରୀଙ୍କ ରିପୋର୍ଟକୁ ଆଧାର କରି ଜିଲ୍ଲାପାଳଙ୍କୁ ଜଳ ଯୋଗାଣ ସମ୍ପର୍କୀତ ଏକ ଚିଠି (୪୨୦୮/୧୨.୦୯.୨୦୨୪) କରିଛନ୍ତି । ଉକ୍ତ ଚିଠିରେ ଉଲ୍ଲେଖ ରହିଛି ଦାରିଙ୍ଗବାଡି ବ୍ଲକରେ ୭୩ ଗୋଟି ଜଳ ଯୋଗାଣ ପ୍ରକଳ୍ପ, ୧୯୫ ଗୋଟି ସୋଲାର ଜଳ ଯୋଗାଣ ପ୍ରକଳ୍ପ ଓ ୨୪୮୮ ଟି ନଳକୂପ ରହିଥିବା ବେଳେ ୧୦ ଗୋଟି ଜଳ ଯୋଗାଣ ପ୍ରକଳ୍ପରେ ଫିଲଟର ସ୍ଥାପନ କରାଯାଇଥିବା ବେଳେ ସବୁ ଗୁଡ଼ିକ ସଠିକ୍ ପରିଚାଳନା ହେଉଥିବା ନେଇ ଚିଠିରେ ଉଲ୍ଲେଖ ରହିଛି ।

ହେଲେ ବାସ୍ତବରେ କିନ୍ତୁ ଅଲଗା । ଦାରିଙ୍ଗବାଡି ବ୍ଲକରେ ୨୫ ଗୋଟି ପଞ୍ଚାୟତ ରହିଛି । ଉକ୍ତ ପଞ୍ଚାୟତ ଗୁଡ଼ିକରେ ଯେଉଁ ସୋଲାର ଜଳ ପ୍ରକଳ୍ପ ରହିଛି ସେଠୁ ବିଶୁଦ୍ଧ ଜଳ ମିଳୁଥିବା ବେଳେ ଜଳ ଯୋଗାଣ ପ୍ରକଳ୍ପ ଓ ନଳକୂପ ଗୁଡ଼ିକରୁ ବିଶୁଦ୍ଧ ଜଳ ମିଳୁନାହିଁ । ଜଳ ଯୋଗାଣ ପ୍ରକଳ୍ପ ଗୁଡିକରେ ଗୋଳିଆ ପାଣି ଆସୁଛି । ଆଜି ପର୍ଯ୍ୟନ୍ତ ଜଳ ଯୋଗାଣ ପ୍ରକଳ୍ପରେ ଆସୁଥିବା ପାଣି ଲୋକେ କେବେ ମଧ୍ୟ ପିଇବା ପାଇଁ ବ୍ୟବହାର କରିନାହାନ୍ତି । ଉକ୍ତ ପାଣି ଲୁଗାପଟା ସଫା, ଗାଧୋଇବା, ବାସନ ମାଜିବା ଓ ଚାଷ କାମରେ ବ୍ୟବହାର ହେଉଛି । ହେଲେ ଗ୍ରାମ୍ୟ ଜଳ ଯୋଗାଣ ବିଭାଗ ଉକ୍ତ ଗୋଳିଆ ପାଣିକୁ ନିରାପଦ ପାନୀୟ ଜଳ ଯୋଗାଣ ହେଉଥିବା ଚିଠି ମାଧ୍ୟମରେ ଡିଣ୍ଡିମ ପିଟୁଛି । 

ଦାରିଙ୍ଗବାଡି ହେଡ୍ କ୍ୱାଟର ଅଞ୍ଚଳରେ ଯୋଗାଣ ହେଉଥିବା ପାଣି ଗୋଳିଆ ପାଣି । ଖାଲି ଦାରିଙ୍ଗବାଡି କଥା ନୁହଁ ସିମନବାଡ଼ି, ସୁଲୁମାହା, ଗୋଦାପୂର, କିରିକୁଟି, କାଟିଙ୍ଗିଆ, ଗୁମିକିଆ ଓ ଦନେକବାଡ଼ି ଭଳି ଅନେକ ପଞ୍ଚାୟତ ଅଞ୍ଚଳର ଗାଁ ଗୁଡିକୁ ପ୍ରକଳ୍ପ କାର୍ଯ୍ୟ ଆରମ୍ଭ ଠାରୁ ହିଁ ଗୋଳି ପାଣି ଯୋଗାଣ କରାଯାଉଛି । ଟାଙ୍କି ଗୁଡ଼ିକ ନଦୀ କଡ଼ରେ କରାଯାଇଥିବା ହେତୁ ଯେତେବେଳେ ନଦୀର ପାଣି ଯେମିତି, ସେମିତି ପାଣି ଯୋଗାଣ ହେଉଛି । ହେଲେ ବିଭାଗ ଗୋଳିଆ ପାଣିକୁ ନିରାପଦ ପାନୀୟ ଜଳ ଯୋଗାଣ ହେଉଥିବା ଜିଲ୍ଲାପାଳଙ୍କୁ ତଥ୍ୟ ପ୍ରଦାନ କରିବା ଚିନ୍ତା ଜନକ ଘଟଣା ବୋଲି ଅଞ୍ଚଳବାସୀ ଅଭିଯୋଗ କରିଛନ୍ତି । ଯେଉଁ ପାଣିକୁ ଜଳ ଯୋଗାଣ ବିଭାଗର ସହକାରୀ ଯନ୍ତ୍ରୀ ନିରାପଦ ପାନୀୟ ଜଳ କହୁଛନ୍ତି, ଉକ୍ତ ପାଣିକୁ ଅଧିକାରୀ ପିଇବେ କି ବୋଲି ପ୍ରଶ୍ନ କରିଛନ୍ତି ଅଞ୍ଚଳବାସୀ । ଅଧିକାରୀ ନିଜ ଘରେ ବ୍ରାଣ୍ଡ କମ୍ପାନୀର ଫିଲଟରରୁ ବିଶୁଦ୍ଧ ପାଣି ପିଉଥିବା ବେଳେ ଲୋକଙ୍କୁ ଗୋଳି ପାଣି ଯୋଗାଣ କରି ନିରାପଦ ପାନୀୟ ଜଳ ଯୋଗାଣ ହେଉଥିବା କଥା କହିବା ହାସ୍ୟାସ୍ପଦ ବୋଲି ଅଞ୍ଚଳବାସୀ କହିଛନ୍ତି । ସହକାରୀ ଯନ୍ତ୍ରୀ ଭୁଲ ତଥ୍ୟ ପ୍ରଦାନ କରିଥିବା ଯୋଗୁଁ ତାଙ୍କ ଉପରେ ଜିଲ୍ଲାପାଳ ତଦନ୍ତ କରି କାର୍ଯ୍ୟାନୁଷ୍ଠାନ ନେବାକୁ ଦାବି ହୋଇଛି ।