ଭୁବନେଶ୍ୱର,୦୫/୦୪: ଶନିବାର ପବିତ୍ର ଅଶୋକାଷ୍ଟମୀ । ମହାପ୍ରଭୁ ଶ୍ରୀଲିଙ୍ଗରାଜଙ୍କ ରୁକୁଣା ରଥ ରାମେଶ୍ୱର ଅଭିମୁଖେ ଯାତ୍ରାରମ୍ଭ କରିବ। ରଥଗଡ଼ାରୁ ଘରଘର ନାଦ କରି ବାହାରିବ ପ୍ରଭୁଙ୍କ ରଥ । ଏହି ପଞ୍ଚ ଦିବସୀୟ ଯାତ୍ରାରେ ଏକାମ୍ରର ଆରାଧ୍ୟ ଶ୍ରୀଲିଙ୍ଗରାଜ, ଦୋଳଗୋବିନ୍ଦ ଏବଂ ଭଉଣୀ ରୁକ୍ମିଣୀ ରାମେଶ୍ୱରଙ୍କ ପୀଠକୁ ଯିବେ । ସେଠାରେ ୪ ଦିନ ଅବସ୍ଥାନ କରି ୯ ତାରିଖରେ ବାହୁଡ଼ା ଯାତ୍ରା କରିବେ ।
ଶୁକ୍ରବାର ରାତିରେ ବ୍ରାହ୍ମଣମାନଙ୍କ ଦ୍ୱାରା ରଥ ପ୍ରତିଷ୍ଠା କରାଯାଇଛି । ଠାକୁରଙ୍କ ଏହି ପ୍ରସିଦ୍ଧ ଯାତ୍ରାକୁ ଶୃଙ୍ଖଳିତ କରିବା ଦିଗରେ ପ୍ରଶାସନ ତରଫରୁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି । ସୁରକ୍ଷା ପାଇଁ ଡିସିପିଙ୍କ ନେତୃତ୍ୱରେ ୧୩ ପ୍ଳାଟୁନ ଫୋର୍ସ ମୁତୟନ ରହିବେ । ଏହା ବ୍ୟତୀତ ରାସ୍ତାରେ ପାଣି ସିଞ୍ଚନ କରିବ ଅଗ୍ନିଶମ ବିଭାଗ । ବିଏମ୍ସି ତରଫରୁ ଆଲୋକୀକରଣ, ସଫେଇ ଓ ପିଇବା ପାଣି ବ୍ୟବସ୍ଥା ହୋଇଛି । ସେହିପରି ଗମନାଗମନ ପାଇଁ କ୍ରୁଟ୍ ପକ୍ଷରୁ ଅଧିକ ମୋ ବସ ବ୍ୟବସ୍ଥା କରାଯାଇଛି । ଶ୍ରଦ୍ଧାଳୁଙ୍କୁ ଖରା ତାତିରୁ ଆଶ୍ୱସ୍ତି ଦେବାକୁ ମନ୍ଦିର ପ୍ରଶାସନ ଏବଂ ସ୍ୱେଚ୍ଛାସେବୀ ମାନେ ସିଞ୍ଚନ ମେସିନ ଯୋଗେ ପାଣି ସିଞ୍ଚନ କରିବା ଉପରେ ଗୁରୁତ୍ୱ ଦିଆଯାଇଛି ।
ରଥଯାତ୍ରା ପାଇଁ ନିର୍ଦ୍ଧାରିତ ନୀତି ଅନୁଯାୟୀ, ଭୋର ୫ଟାରେ ମନ୍ଦିର ପହୁଡ଼ ଖୋଲି ମଙ୍ଗଳ ଆଳତି ଓ ଅବକାଶ ନୀତି ସମାପନ ହେବ । ଦିନ ସାଢେ ୧୨ଟାରୁ ସାଢେ ଗୋଟାଏ ମଧ୍ୟରେ ଦେବଦେବୀଙ୍କୁ ପହଣ୍ଡି କରାଯାଇ ରଥ ଉପରକୁ ବିଜେ କରାଯିବ । ରଥ ଉପରେ ଏବଂ ତଳେ ୧୪ ପ୍ରକାରର ପୂଜା ବଢ଼ିବା ପରେ ଅଶ୍ୱ ଯୋଚା ଯିବ । ଆଜ୍ଞାମାଳ ପାଇଲା ପରେ ରଥ ଗଡ଼ିବ ।
ରଥ ଟଣା ଯିବା ସମୟରେ କର୍ଡନ ଭିତରେ କେବଳ ଖଉଡ଼ା(ରଥରେ ବ୍ରେକ୍ ଲଗାଉ ଥିବା ସେବାୟତ) ଓ ମହାରଣା ସେବାୟତ ମାନେ ରହି ପାରିବେ । ଏଥର ମଧ୍ୟ ରଥ ଟଣା ଅପରାହ୍ନ ଠିକ ସାଢେ ୩ଟାରେ ଆରମ୍ଭ ହେବ ବୋଲି ଚୂଡ଼ାନ୍ତ ହୋଇଛି । ରଥ ଗଡ଼ିବା ବାଟରେ ଗୋପାଳ ତୀର୍ଥ, ଶିବତୀର୍ଥ, ଭାରତୀ ମଠ ଓ ଅସୁର କିଆରୀଠାରେ ଦେବଦେବୀଙ୍କୁ ଭୋଗ ଲାଗି ହେବ । ରାମେଶ୍ୱର ପହଞ୍ଚିବା ପରେ ସେଠାରେ ପ୍ରଥମେ ଅଶୋକା କୁଣ୍ଡରେ ମହାପ୍ରଭୁ ସ୍ନାନ କରିବେ । ପରେ ୧୪ଟି ଅଶୋକା କଢି ମଧ୍ୟ ଲାଗି ହେବେ ।
ରାମେଶ୍ୱରଙ୍କ ସହ ଭେଟ ଆଳତି କରାଯାଇ ସେଠାରେ ଆସ୍ଥାନକୁ ବିଜେ କରିବେ । ରଥଯାତ୍ରା ପାଇଁ ରାମେଶ୍ୱର କ୍ଳବ ଓ ରାମେଶ୍ୱର ମନ୍ଦିର ୨୪ ପ୍ରହର କମିଟି ତରଫରୁ ବିଭିନ୍ନ ପ୍ରକାରର ସାଂସ୍କୃତିକ କାର୍ଯ୍ୟକ୍ରମ ବ୍ୟବସ୍ଥା କରା ଯାଇଛି । ସେହିପରି ଏକାମ୍ର ଭଜନ ମଣ୍ଡପଠାରେ ଏକାମ୍ର ସାଂସ୍କୃତିକ ପ୍ରକାଶନୀ ଦ୍ୱାରା ମଧ୍ୟ ୬ ଦିନିଆ ‘ଲିଙ୍ଗରାଜ ମହୋତ୍ସବ’ ପାଳନ କରାଯିବ।
