ନୂଆଦିଲ୍ଲୀ: ଭୟ ବଢ଼ାଉଛି ସଡ଼କ ଦୁର୍ଘଟଣାରେ ମୃତ୍ୟୁ ସଂଖ୍ୟା । ସରକାରୀ ତଥ୍ୟ କହୁଛି, ୫ ବର୍ଷରେ ପ୍ରାୟ ୮ ଲକ୍ଷ ଜୀବନ ନେଇଛି ସଡ଼କ ଦୁର୍ଘଟଣା । ୨୦୨୮-୨୦୨୨ ମଧ୍ୟରେ ସମଗ୍ର ଭାରତରେ ସଡ଼କ ଦୁର୍ଘଟଣାରେ ମୃତ୍ୟୁ ସଂଖ୍ୟା ଜାରି କରିଛି କେନ୍ଦ୍ର ସଡ଼କ ପରିବହନ ମନ୍ତ୍ରାଳୟ । ବିଭିନ୍ନ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳରୁ ମିଳିଥିବା ତଥ୍ୟକୁ ଆଧାର କରି ଏହି ରିପୋର୍ଟ ପ୍ରକାଶ ପାଇଛି । ୨୦୨୨ରେ ସଡ଼କ ଦୁର୍ଘଟଣାରେ ୧,୬୮,୪୯୧ ଜଣଙ୍କ ମୃତ୍ୟୁ ହୋଇଥିଲା ।
୨୦୨୧ରେ ହୋଇଥିବା ମୃତ୍ୟୁ ତୁଳନାରେ ଏହା ଖୁବ ଅଧିକ । ସେହିବର୍ଷ ୧,୫୩,୯୭୨ ଲୋକ ପ୍ରାଣ ହରାଇଥିଲେ । ବୁଧବାର ପ୍ରକାଶ ପାଇଥିବା ‘ଭାରତରେ ସଡ଼କ ଦୁର୍ଘଟଣା ୨୦୨୨’ ରିପୋର୍ଟ ଅନୁସାରେ, ୨୦୧୮-୨୦୨୨, ୫ ବର୍ଷ ମଧ୍ୟରେ ମୋଟ ୭ ଲକ୍ଷ ୭୭ ହଜାର ଲୋକ ସଡ଼କ ଦୁର୍ଘଟଣାରେ ପ୍ରାଣ ହରାଇଛନ୍ତି । ୨୦୨୨ରେ ଉତ୍ତର ପ୍ରଦେଶରେ ଏହି ସଂଖ୍ୟା ସର୍ବାଧିକ ୨୨,୫୯୫ ଥିଲା । ମହାରାଷ୍ଟ୍ରରେ ୧୫,୨୨୪, ତାମିଲନାଡୁରେ ୧୭ ହଜାର ୮୮୪ ଜଣ ପ୍ରାଣ ହରାଇଥିଲେ । ୫ ବର୍ଷ ମଧ୍ୟରେ ସଡ଼କ ଦୁର୍ଘଟଣାରେ ମୃତ୍ୟୁ ସଂଖ୍ୟା ମାମଲାରେ ଶୀର୍ଷ ୧୦ ରାଜ୍ୟ ମଧ୍ୟରେ ରହିଛି –
୧. ଉତ୍ତର ପ୍ରଦେଶ- ୧,୦୮,୮୮୨
୨. ତାମିଲନାଡୁ- ୮୪,୩୧୬
୩. ମହାରାଷ୍ଟ୍ର- ୬୬, ୩୭୦
୪. ମଧ୍ୟପ୍ରଦେଶ- ୫୮, ୫୮୦
୫. କର୍ଣ୍ଣାଟକ- ୫୩,୪୪୮
୬. ରାଜସ୍ଥାନ- ୫୧,୨୮୦
୭. ଆନ୍ଧ୍ର ପ୍ରଦେଶ- ୩୯,୦୫୮
୮. ବିହାର- ୩୬,୧୯୧
୯. ତେଲଙ୍ଗାନା- ୩୫, ୫୬୫
୧୦. ଗୁଜରାଟ- ୩୬, ୬୨୬
ଏହା ପୂର୍ବରୁ ଗୁରୁବାର କେନ୍ଦ୍ର ପରିବହନ ମନ୍ତ୍ରୀ ନିତିନ ଗଡ଼କରୀ କହିଥିଲେ ଯେ, ଅନ୍ତର୍ଜାତୀୟ କନଫରେନ୍ସରେ ସଡ଼କ ଦୁର୍ଘଟଣା କଥା ଆସିଲେ ସେ ଲଜ୍ଜିତ ମନେ କରନ୍ତି ଏବଂ ମୁହଁ ଲୁଚାଇ ଦିଅନ୍ତି । ୫୦ ପ୍ରତିଶତ ସଡ଼କ ଦୁର୍ଘଟଣା କମାଇବାକୁ ପ୍ରତିଶ୍ରୁତି ଦେଇଥିଲେ ହେଁ ଦେଶରେ ସଡ଼କ ଦୁର୍ଘଟଣା ଦିନକୁ ଦିନ ବଢ଼ିଚାଲିଛି । ସଡ଼କ ସୁରକ୍ଷା ପାଇଁ ଲୋକମାନଙ୍କ ଆଚରଣରେ ପରିବର୍ତ୍ତନ ଆସିବା ଦରକାର । କଠୋର ଆଇନ୍ ଆଣି ସଡ଼କ ଦୁର୍ଘଟଣା କମାଇବା ଦିଗରେ କାର୍ଯ୍ୟ କରିବା ଦରକାର ବୋଲି ଗଡ଼କରୀ କହିଥିଲେ ।
