ନୂଆଦିଲ୍ଲୀ,୨୬/୧୨: ଦେଶରେ ଷ୍ଟାର୍ଟଅପ୍‌ ସଂସ୍କୃତିକୁ ପ୍ରୋତ୍ସାହିତ କରାଯାଉଛି । ଏବେ ମାନ୍ୟତାପ୍ରାପ୍ତ ଷ୍ଟାର୍ଟଅପ୍‌ ସଂଖ୍ୟା ୧.୫୭ ଲକ୍ଷକୁ ବୃଦ୍ଧି ହୋଇଛି ।ଶିଳ୍ପ ପ୍ରୋତ୍ସାହନ ଏବଂ ଆନ୍ତଃ  ବାଣିଜ୍ୟ ବିଭାଗ (ଡିପିଆଇଆଇଟି) ଏହି  ସଂସ୍ଥାଗୁଡିକୁ ମାନ୍ୟତା ପ୍ରଦାନ କରିଛି ।  ଡିସେମ୍ବର ୨୫ ସୁଦ୍ଧା ଡିପିଆଇଆଇଟି  ପୋର୍ଟାଲରେ ୭.୫୯ ଲକ୍ଷ ଷ୍ଟାର୍ଟଅପ୍‌  ପଞ୍ଜୀକୃତ ହୋଇଥିବା ସୂଚନା ମିଳିଛି ।  ଏଥିସହିତ ଭାରତ ବିଶ୍ୱର ଟପ୍‌-୩  ଷ୍ଟାର୍ଟଅପ୍‌ ହବ୍‌ ପାଲଟିଛି । 

ମାନ୍ୟତା ପ୍ରାପ୍ତ ଷ୍ଟାର୍ଟଅପ୍‌ ଗୁଡିକ  ମଧ୍ୟରୁ ୭୩ ହଜାରରେ ଅନ୍ତତଃ ପକ୍ଷେ  ଜଣେ ମହିଳା ନିର୍ଦ୍ଦେଶକ ରହିଛନ୍ତି ।  ଷ୍ଟାର୍ଟଅପ୍‌ ଇଣ୍ଡିଆ କାର୍ଯ୍ୟକ୍ରମ ଅଧିନରେ  ଏହି ସଂସ୍ଥାଗୁଡିକୁ ପ୍ରୋତ୍ସାହିତ କରାଯାଉଛି ।  ଏବେ ଷ୍ଟାର୍ଟଅପ୍‌ କ୍ଷେତ୍ରରେ ଭାରତ ବିଶ୍ୱର  ଏକ ପ୍ରମୁଖ ସ୍ଥଳ ଭାବେ ଉଭା ହୋଇଛି।  ଭାରତ ତୃତୀୟ ବୃହତ୍‌ ଷ୍ଟାର୍ଟଅପ୍‌ ହବ୍‌ ।  

ଭାରତ ୧୦୦ ୟୁନିକର୍ଣ୍ଣ ସୃଷ୍ଟି କରିଥିବା  ଜଣାପଡ଼ିଛି । ଏହି ଷ୍ଟାର୍ଟଅପ୍‌ଗୁଡିକ  ନବସୃଜନ ଏବଂ ଔଦ୍ୟୋଗିକତାକୁ  ତ୍ୱରାନ୍ୱିତ କରିବା ଦିଗରେ ନିରନ୍ତର ପ୍ରୟାସ  ଜାରି ରଖିଛନ୍ତି । ଗତ ୧ ଦଶନ୍ଧି ମଧ୍ୟରେ  ଦେଶର ଔଦ୍ୟୋଗକିତା ପରିଦୃଶ୍ୟରେ  ବଡ଼ ପରିବର୍ତ୍ତନ ଆସିଛି । ବେଙ୍ଗାଲୁରୁ,  ହାଇଦ୍ରାବାଦ, ମୁମ୍ବାଇ ଏବଂ ଦିଲ୍ଲୀ  ଏନ୍‌ସିଆର୍‌ ଭଳି ସହରଗୁଡିକ ଏହାର  କେନ୍ଦ୍ରସ୍ଥଳ ଭାବେ ଉଭା ହୋଇଛି ବୋଲି  ବାଣିଜ୍ୟ ମନ୍ତ୍ରଣାଳୟ ପକ୍ଷରୁ କୁହାଯାଇଛି । 

ଚଳିତ ବର୍ଷ ୧୩ ନୂଆ ପିଢ଼ିର କମ୍ପାନି  ପ୍ରାଥମିକ ପବ୍ଲିକ ଅଫର୍‌(ଆଇପିଓ) ଜାରି  କରିଛନ୍ତି । ଷ୍ଟାର୍ଟଅପ୍‌ଗୁଡିକ ଦେଶର ପୁଞ୍ଜି  ବଜାରରୁ ୨୯,୨୦୦ କୋଟିର ପାଣ୍ଠି ସଂଗ୍ରହ  କରିଛନ୍ତି । ଏହା ମଧ୍ୟରେ ୧୪,୬୭୨  କୋଟିର ଫ୍ରେସ୍‌ ଇସ୍ୟୁ ଏବଂ ୧୪,୫୪୭  କୋଟିର ଅଫର ଫର୍‌ ସେଲ୍‌ ସାମିଲ  ରହିଛି । ୧୩ ଷ୍ଟାର୍ଟଅପ୍‌ ଆଇପିଓ ମଧ୍ୟରେ  ୧୦ଟି ବଡ଼ ଏବଂ ୩ଟି ଏସ୍‌ଏମ୍‌ଇ ଆଇପିଓ  ରହିଥିଲା ।  

ଦେଶରେ ଡିଜିଟାଲିକରଣରେ ଦ୍ରୁତ  ପ୍ରସାର, ଯୁବ ଏବଂ ଦକ୍ଷ ଶ୍ରମ ଶକ୍ତି ବିଭିନ୍ନ  କ୍ଷେତ୍ରରେ ଷ୍ଟାର୍ଟଅପ୍‌ ଅଭିବୃଦ୍ଧିକୁ ତ୍ୱରାନ୍ୱିତ  କରୁଛି । ଏବେ ଫିନ୍‌ଟେକ, ଏଡୁଟେକ,  ଏବଂ ଇ-କମର୍ସ ବର୍ଗରେ ଷ୍ଟାର୍ଟଅପ୍‌ଗୁଡିକ  ଆସୁଛନ୍ତି । ଷ୍ଟାର୍ଟଅପ୍‌ ଇଣ୍ଡିଆ ପକ୍ଷରୁ  ଜାରି ଷ୍ଟାର୍ଟଅପ୍‌ ଇକୋସିଷ୍ଟମ ରିପୋର୍ଟ  ମୁତାବକ, ଏବେ ଦେଶର ଷ୍ଟାର୍ଟଅପ୍‌ଗୁଡିକ  ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ),  ବ୍ଲକ୍‌ଚେନ୍‌ ଏବଂ ଇଣ୍ଟର୍‌ନେଟ୍‌ ଅଫ୍‌ ଥିଙ୍ଗ୍‌ସ (ଆଇଓଟି)କୁ ସ୍ଥାନୀୟ ଏବଂ ବିଶ୍ୱ ସ୍ତରର  ସମସ୍ୟା ସମାଧାନ ଦିଗରେ ବ୍ୟବହାର  କରୁଛନ୍ତି । 

୨୦୧୬ରେ କେନ୍ଦ୍ର ସରକାର  ଗ୍ରହଣ କରିଥିବା ଷ୍ଟାର୍ଟଅପ୍‌ ଇଣ୍ଡିଆ  କାର୍ଯ୍ୟକ୍ରମ ଏ କ୍ଷେତ୍ରରେ ଆଧାରଶିଳା ସାବ୍ୟସ୍ତ ହୋଇଛି । ଏହାବାଦ୍‌ ଅଟଳ  ଇନୋଭେସନ ମିଶନ (ଏଆଇଏମ୍‌) ଏବଂ  ନ୍ୟାସ୍‌ନାଲ ଇନିସିଏଟିଭ ଫର୍‌ ଡେଭ୍‌ଲପିଂ  ଆଣ୍ଡ୍‌ ହାର୍‌ନେସିଂ ଇନୋଭେସନ (ନିଧି)  ନବସୃଜନକୁ ଭିତ୍ତିଭୂମି ଏବଂ ଆର୍ôଥକ  ସହାୟତା ପ୍ରଦାନ କରୁଛି । ସେହିଭଳି  ସମୃଦ୍ଧି କାର୍ଯ୍ୟକ୍ରମ ଦ୍ୱାରା ୩୦୦  ସଫ୍ଟୱେର ଉତ୍ପାଦ ଷ୍ଟାର୍ଟଅପ୍‌କୁ ସହାୟତା  ପ୍ରଦାନ କରାଯାଇଛି । ୪ ବର୍ଷ ଲାଗି  ଏହି ଷ୍ଟାର୍ଟଅପ୍‌ ୯୦ କୋଟିର ସହାୟତା ପାଇବେ । ଷ୍ଟାର୍ଟଅପ୍‌ ପିଛା ୪୦ ଲକ୍ଷର  ସହାୟତା ଦିଆଯାଉଛି ।