ଜୟପୁର: ଅସୁସ୍ଥ ସ୍ତ୍ରୀଙ୍କ ସେବା କରିବାକୁ ସ୍ବାମୀ ସରକାରୀ ଚାକିରିରୁ ସ୍ବେଚ୍ଛାକୃତ ଅବସର ନେଇଥିଲେ । ଉଭୟ ସ୍ବାମୀ ଓ ସ୍ତ୍ରୀ ଏଥିପାଇଁ ବେଶ୍ ଖୁସି ଥିଲେ । ସ୍ତ୍ରୀ ଭାବିଥିଲେ ସ୍ବାମୀ ଏବେ ଘରେ ରହିବେ, ତାଙ୍କର ଯତ୍ନ ନେବେ । ଆଉ ସେ ଧିରେଧିରେ ସୁସ୍ଥ ହୋଇଯିବେ । ଅବସର ମିଳିବା ଖୁସିରେ ପାର୍ଟି ବି ହୋଇଥିଲା । ହେଲେ କିଏ ଜାଣିଥିଲା ଏହି ଖୁସି ବେଶୀ ସମୟ ରହିବ ନାହିଁ । ସ୍ବାମୀଙ୍କ ଅବସରକୁ ନେଇ ଚାଲିଥିବା ପାର୍ଟିରେ ସବୁ ଲୋକ ଖୁସିରେ ମସଗୁଲ ଥିବା ବେଳେ ସ୍ତ୍ରୀଙ୍କ ମୃତ୍ୟୁ ହୋଇଥିଲା । ରାଜସ୍ଥାନର କୋଟାରୁ ଆସିଛି ଏହି ଦୁଃଖଦ ଖବର ।
ଦେବେନ୍ଦ୍ର ସନ୍ଦଲ ସେଣ୍ଟ୍ରାଲ୍ ଓ୍ବେୟାରହାଉସ୍ର ମ୍ୟାନେଜର ଥିଲେ । ସେ ଅବସର ନେବାର ୩ ଦିନ ପୂର୍ବରୁ ଭିଆରଏସ୍ ନେଇଥିଲେ । ଡିସେମ୍ବର ୨୪ରେ ଅଫିସ୍ରେ ତାଙ୍କର ଶେଷ ଦିନ ଥିଲା । ତାଙ୍କ ସ୍ତ୍ରୀ ଅସୁସ୍ଥ ଥିବାରୁ ସେ ଭିଆରଏସ୍ ନେଇଥିଲେ । ସେହି ଦିନ ସକାଳେ ଦେବେନ୍ଦ୍ରଙ୍କ ସହିତ ତାଙ୍କ ପତ୍ନୀ ଟିନା ମଧ୍ୟ ଅଫିସ୍କୁ ଯାଇଥିଲେ । ସେଠାରେ ଦେବେନ୍ଦ୍ରଙ୍କ ଅବସର ଖୁସିରେ ପାର୍ଟିର ଆୟୋଜନ ହୋଇଥିଲା । ସବୁବେଳେ ଅସୁସ୍ଥ ରହୁଥିବା ଟିନା ଖୁବ ଖୁସି ଥିଲେ । ସବୁ ଲୋକ ଖୁସିରେ ଥିବା ବେଳେ ଦେବେନ୍ଦ୍ରଙ୍କ ବେକରେ ଫୁଳ ମାଳ ପିନ୍ଧାଇ ବିଦାୟ ଦେଉଥିଲେ ।
ଏହି ସମୟରେ ଟିନାଙ୍କ ସ୍ବାସ୍ଥ୍ୟବସ୍ଥା ହଠାତ ବିଗିଡ଼ିଥିଲା ଏବଂ ସେ ପାଖରେ ଥିବା ଏକ ଚୌକିରେ ବସିପଡ଼ିଥିଲେ । ଲୋକେ ତାଙ୍କୁ କିଛି ପଚାରୁଥିବା ନେଇ ଏକ ଫଟୋରେ ଦେଖିବାକୁ ମିଳିଛି । ଏହା ପରେ ଟିନା ପାଖରେ ଥିବା ଏକ ଟେବୁଲ ଆଡ଼କୁ ଟଳି ପଡ଼ିଥିଲେ । ଏହା ଦେଖି ସେଠାରେ ଉପସ୍ଥିତ ଲୋକେ ତାଙ୍କୁ ହସ୍ପିଟାଲ୍ ନେଇଯାଇଥିଲା । କିନ୍ତୁ ଦୁର୍ଭାଗ୍ୟର କଥା ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ସ୍ବାମୀଙ୍କ ଅବସର ଦିନ ହିଁ ସ୍ତ୍ରୀଙ୍କ ପରଲୋକ ଘଟିଛି । ସୂଚନାଯୋଗ୍ୟ, ଏଭଳି ହଠାତ ମୃତ୍ୟୁ ନେଇ ଅନେକ ଘଟଣା ସାମ୍ନାକୁ ଆସେ । ଅନେକ ସମୟରେ ବିବାହ ଉତ୍ସବରେ ଡ୍ୟାନ୍ସ କରୁ କରୁ ହୃଦଘାତରେ ମୃତ୍ୟୁ ହୋଇଥିବା ନେଇ ଖବର ସମସ୍ତଙ୍କୁ ଆଶ୍ଚର୍ଯ୍ୟ କରେ ।
