ପୁରୀ,୨୩/୦୫: ଶ୍ରୀନୃସିଂହ ଜନ୍ମ ତିଥି ବୁଧବାର ଠାରୁ ଅଧିକ ଗତି ଧରିଛି ରଥ ନିର୍ମାଣ । ଆହୁରି ଚଳଚଞ୍ଚଳ ହୋଇଛି ରଥ ଖଳା । ନୃସିଂହ ଚତୁର୍ଦ୍ଦଶୀରେ ରଥ ଖଳାରେ ରୂପକାରଙ୍କ ଗୁଜଅନୁକୂଳ ବିଧି ସମ୍ପନ୍ନ ହୋଇଛି । ମୁଖ୍ୟ ବିଶ୍ୱକର୍ମାମାନେ ଅନୁକୂଳ କରି ଅର କାର୍ଯ୍ୟାରମ୍ଭ କରିଛନ୍ତି । ସେପଟେ ମା’ଚର୍ଚ୍ଚିକାଙ୍କ ମନ୍ଦିର ସମ୍ମୁଖରେ ଭୋଇ ସେବକମାନେ ଯନ୍ତା ଗାଡ଼ ଖୋଳିଛନ୍ତି । ଯନ୍ତା ଗାଡ଼ରେ ପଡ଼ି ରଥ ଚକ ପ୍ରସ୍ତୁତ ହେବ ।
ବିଶ୍ୱକର୍ମାମାନେ ଅରମୁଣ୍ଡି ଚଉପଟ କରି ରୂପକାର ସେବକଙ୍କୁ ଯୋଗାଇ ଥିଲେ । ସେଥିରେ ନୃସିଂହ ମୂର୍ତ୍ତି ଅଙ୍କନ ପୂର୍ବକ ମାଳ ମାହାର୍ଦ୍ଦ ତଥା ଶ୍ରୀଫଳ ଲାଗି କରି ଗୁଜ ଅନୁକୂଳ କରିଥିଲେ ମୁଖ୍ୟ ରୂପକାର । ବିଶ୍ୱାସ ରହିଛି କୋଣ ଗୁଜ ରଥକୁ ସୁରକ୍ଷା ପ୍ରଦାନ କରିଥାଏ । ତାଳଧ୍ୱଜ ଓ ନନ୍ଦିଘୋଷର ୧୬ଗୋଟି ଲେଖା କୋଣ ଓ ଦର୍ପଦଳନ ରଥ ୧୨ଗୋଟି କୋଣରେ ଗୁଜମାନ ସ୍ଥାପନ ହେବ । ତିନି ରଥର ମୁଖ୍ୟ ବିଶ୍ୱକର୍ମା ଅନୁକୂଳ କରି ଅର କାର୍ଯ୍ୟ ଆରମ୍ଭ କରିଥିଲେ । ପରେ ଅନ୍ୟ ବିଶ୍ୱକର୍ମାମାନେ ଚକରେ ଲାଗିବାକୁ ଥିବା ଅର ପଟା କାଟି ପ୍ରସ୍ତୁତ କରୁଛନ୍ତି।
ବୁଧବାର କାର୍ଯ୍ୟ ଶେଷ ସୁଦ୍ଧା ୫ଟି ଚକ ପାଇଁ ଆବଶ୍ୟକ ଅର ମୁଖ ସାଲ କରି ସାଇତିଛନ୍ତି । ଭୋଇ ସର୍ଦ୍ଦାର ରବି ଭୋଇଙ୍କ ନେତୃତ୍ୱରେ ଯନ୍ତାଗାଡ଼ ଖୋଳା ଆରମ୍ଭ କରିଛନ୍ତି ଭୋଇ ସେବକ । ଚର୍ଚ୍ଚିକା ଠାକୁରାଣୀଙ୍କ ମନ୍ଦିର ସମ୍ମୁଖ ବଡ଼ଦାଣ୍ଡ ରଥ ଖଳାରେ ଯନ୍ତାଗାଡ଼ ଖୋଳା ଯାଇଛି । ୪୦ ଫୁଟ ଲମ୍ବ, ପ୍ରାୟ ୧୦ ଫୁଟ ଉଚ୍ଚତାର ଗାଡ଼ ଖୋଳା ଯାଇଛି । ସେଥିରେ ଅରମୁଣ୍ଡି, ଫାଳି, ଅରପଟା ପକାଇ ଫାସୀ କାଠ ଗଣ୍ଡି ରଖି ସେଟ୍ କରାଯାଉଛି । ଯନ୍ତା ଗାଡ଼ରେ ପଡ଼ି ସିଙ୍ଗଡ଼ା ବାଡ଼ିଆ ପଦ୍ଧତିରେ ଚକ ପ୍ରସ୍ତୁତ କରାଯିବ । ଯନ୍ତାଗାଡ଼ରେ ପଡ଼ି ୬୭୨ଟି ଅର ସହ ୪୨ ଗୋଟି ତୁମ୍ବ ସଂଯୁକ୍ତ ହୋଇ ତିନି ରଥର ୪୨ଟି ସିଙ୍ଗଡ଼ା ତିଆରି ହେବ । ଠାକୁରଙ୍କ ଚନ୍ଦନଯାତ୍ରା ଭଉଁରୀ ଉତ୍ସବରେ ରଥ ଚକ, ଅଖ ସଂଯୁକ୍ତ ହେବାର ବିଧି ସମ୍ପନ୍ନ ହେବ । ବୁଧବାର ରଥ ଖଳାରେ ୧୮୧ ଜଣ ନିର୍ମାଣକାରୀ ଠାକୁରଙ୍କ କାର୍ଯ୍ୟରେ ଯୋଗ ଦେଇଥିଲେ।