ନୂଆଦିଲ୍ଲୀ,୦୫/୦୭: ବର୍ତ୍ତମାନ ସାଇବର ଠକେଇ ଜଟିଳ ସମସ୍ୟା ଭାବେ ଉଭା ହୋଇଛି । ଏନେଇ ଝାଡଖଣ୍ଡର ଅପରାଧ ଅନୁସନ୍ଧାନ ବିଭାଗ ନିରନ୍ତର କାର୍ଯ୍ୟାନୁଷ୍ଠାନ ଗ୍ରହଣ କରୁଛି । ଆଉ ଏହି କ୍ରମରେ ଆଜି ଝାଡ଼ଖଣ୍ଡ ସିଆଇଡି ଦଳକୁ ଏକ ବଡ଼ ସଫଳତା ମିଳିଛି। ରାଞ୍ଚିର ଜଗନ୍ନାଥପୁର ଥାନା ଅଞ୍ଚଳ ଅନ୍ତର୍ଗତ ଅଲିଭ୍ ଗାର୍ଡେନ୍ ନାମକ ଏକ ହୋଟେଲରେ ଚଢାଉ କରି ୭ ଜଣ ସାଇବର ଅପରାଧୀଙ୍କୁ ଗିରଫ କରାଯାଇଛି। ଗିରଫ ହୋଇଥିବା ସମସ୍ତ ଅଭିଯୁକ୍ତ ଚୀନ୍ ସାଇବର ଠକେଇର ନେଟୱାର୍କ ସହିତ ଜଡିତ ଥିବା ଜଣାପଡ଼ିଛି। ସେମାନେ ଭାରତରେ ଚୀନ୍ ଗ୍ୟାଙ୍ଗ ପାଇଁ କାମ କରୁଥିଲେ।  ଅଭିଯୁକ୍ତମାନେ ପ୍ରଥମେ ଅଧିକ ଲାଭ ପାଇବେ ବୋଲି କହି ଲୋକଙ୍କୁ ଟଙ୍କା ନିବେଶ କରାଉଥିଲେ। ତା'ପରେ ସେମାନେ ସେମାନଙ୍କୁ ଠକିଥିଲେ। କେବଳ ଏତିକି ନୁହେଁ,ସେମାନେ ଲୋକଙ୍କୁ ଡିଜିଟାଲ ଭାବରେ ଗିରଫ କରି ଟଙ୍କା ଆଦାୟ ମଧ୍ୟ କରୁଥିଲେ।

ଏକ ଗୁପ୍ତ ସୂଚନା ଆଧାରରେ, ସିଆଇଡ଼ିର ସାଇବର ଅପରାଧ ଶାଖା ହୋଟେଲରେ ଚଢାଉ କରିଥିଲା। ଗିରଫ ହୋଇଥିବା ୭ ସାଇବର ଅପରାଧୀ ହେଉଛନ୍ତି ବିହାରର ସିୱାନ ଜିଲ୍ଲାର ଟାଉନ୍ ଥାନା ବାସିନ୍ଦା କୁମାର ଦୀପକ,ନାଳନ୍ଦା ଜିଲ୍ଲାର ବିନ୍ଦ ଥାନା ଅଞ୍ଚଳର କୁମାର ସୌରଭ, ସିୱାନ ଜିଲ୍ଲାର ଟାଉନ୍ ଥାନା ଅଞ୍ଚଳର ପ୍ରଭାତ କୁମାର,ମଧ୍ୟପ୍ରଦେଶର ସାଗର ଜିଲ୍ଲାର ଲଖନ ଚୌରାସିଆ,ପାଟନା ଜିଲ୍ଲାର ଦିଦାରଗଞ୍ଜ ଥାନା ଅଞ୍ଚଳର ଅନିଲ କୁମାର,ନୱାଡା ଜିଲ୍ଲାର ଶିବମ କୁମାର ଏବଂ ପାଟନା ଜିଲ୍ଲାର ଗୌରୀଚକ ଥାନା ଅଞ୍ଚଳର ପ୍ରଦୀପ କୁମାର ବୋଲି ଜଣାପଡ଼ିଛି।  ସେହିପରି ଗିରଫ ସାଇବର ଅପରାଧୀମାନଙ୍କଠାରୁ ୧୨ଟି ମୋବାଇଲ୍ ଫୋନ୍, ୧୧ଟି ସିମ୍ କାର୍ଡ, ୧୪ଟି ଏଟିଏମ୍ କାର୍ଡ, ଗୋଟିଏ ଲାପଟପ୍, ଗୋଟିଏ ଚେକ୍ ବୁକ୍ ଏବଂ ୬୦ରୁ ଅଧିକ ହ୍ୱାଟ୍ସଆପ୍ ଏବଂ ଟେଲିଗ୍ରାମ ଚାଟର ବିବରଣୀ ଜବତ କରାଯାଇଛି।

ରାଞ୍ଚି ତଦନ୍ତ ବିଭାଗ ଅନୁଯାୟୀ,ଗିରଫ ହୋଇଥିବା ୭ ଜଣ ସାଇବର ଅପରାଧୀ ଦେଶର ବିଭିନ୍ନ ସ୍ଥାନରୁ ଚୀନ୍ ସାଇବର ଅପରାଧୀଙ୍କୁ ମ୍ୟୁଲ୍ ବ୍ୟାଙ୍କ ଆକାଉଣ୍ଟ ଯୋଗାଇ ଦେଉଥିଲେ। ଗିରଫ ହୋଇଥିବା ସାଇବର ଅପରାଧୀଙ୍କ ମଧ୍ୟରେ ଜଣେ ସ୍ୱତନ୍ତ୍ର ଏଜେଣ୍ଟ ମଧ୍ୟ ଅନ୍ତର୍ଭୁକ୍ତ। ଏହି ସ୍ୱତନ୍ତ୍ର ଏଜେଣ୍ଟ ଚୀନ୍ ମିଲନେ,ଡାର୍ଗନପେ, ସୁପର ପେ, ମାଙ୍ଗୋପେଇଣ୍ଡିଆ ପାଇଁ କାମ କରୁଥିଲେ। ଗିରଫ ହୋଇଥିବା ଚୀନ୍ ନେଟୱାର୍କ ସହିତ ଜଡିତ ଏଜେଣ୍ଟମାନଙ୍କଠାରୁ ହ୍ୱାଟ୍ସଆପ୍ ଏବଂ ଟେଲିଗ୍ରାମ୍ ଚାଟ୍ ମଧ୍ୟ ଜବତ କରାଯାଇଛି। ଯେଉଁଥିରେ ବହୁ ସଂଖ୍ୟକ ବ୍ୟାଙ୍କ ଆକାଉଣ୍ଟର ସୂଚନା ଏବଂ ଡିଜିଟାଲ୍ ପ୍ରମାଣ ରହିଛି। ଗିରଫ ହୋଇଥିବା ଚୀନ୍ ଗ୍ୟାଙ୍ଗ୍ ଏଜେଣ୍ଟଙ୍କଠାରୁ ଏପର୍ଯ୍ୟନ୍ତ 60ଟି ମ୍ୟୁଲ୍ ବ୍ୟାଙ୍କ ଆକାଉଣ୍ଟ୍ ଷ୍ଟେଟମେଣ୍ଟ୍ ଉଦ୍ଧାର କରାଯାଇଛି। ସାରା ଦେଶରେ ଏହି ଗ୍ୟାଙ୍ଗ୍ ବିରୋଧରେ ମୋଟ 68ଟି ଅଭିଯୋଗ ଦାଖଲ ହୋଇଛି।

ଅନ୍ୟପଟେ ଏନେଇ  ରାଞ୍ଚିର କ୍ରାଇମ୍ ଇନଭେଷ୍ଟିଗେସନ୍ ଡିପାର୍ଟମେଣ୍ଟ୍  ସାଧାରଣ ଜନତାଙ୍କୁ ନିବେଦନ କରି କହିଛି,ଏପରି ସାଇବର ଠକେଇରୁ ରକ୍ଷା ପାଇବା ପାଇଁ,କୌଣସି ସୋସିଆଲ ମିଡିଆ ପ୍ଲାଟଫର୍ମର ବିଜ୍ଞାପନରେ  ନିବେଶ ସମ୍ବନ୍ଧୀୟ ଅଫର୍ ଉପରେ କ୍ଲିକ୍ କରିବା ପୂର୍ବରୁ, ନିଶ୍ଚିତ ଭାବରେ ଏହାକୁ ଯାଞ୍ଚ କରନ୍ତୁ। ଏହା ବ୍ୟତୀତ, ନିବେଶ ନାମରେ ସୋସିଆଲ ମିଡିଆ ପ୍ଲାଟଫର୍ମ ମାଧ୍ୟମରେ ଆପଣଙ୍କ ବ୍ୟାଙ୍କ ଆକାଉଣ୍ଟ କିମ୍ବା UPIରୁ ଟଙ୍କା ଜମା କରନ୍ତୁ ନାହିଁ। ଏହା ସହିତ,ଯଦି ଆପଣ କୌଣସି ପ୍ରକାରର ସାଇବର ଠକେଇର ଶିକାର ହୁଅନ୍ତି, ତେବେ ତୁରନ୍ତ ସାଇବର ହେଲ୍ପଲାଇନ୍ ନମ୍ବର ୧୯୩୦ କଲ୍ କରି ଜଣାନ୍ତୁ ।