ଭୁବନେଶ୍ୱର,୦୮/୧୦: ରମାଦେବୀ ମହିଳା ମହାବିଦ୍ୟାଳୟରୁ ଉପରକୁ ଉଠି ବିଶ୍ୱବିଦ୍ୟାଳୟ ହେଲା । ହେଲେ ନାକ୍ ମାନ୍ୟତାରେ ‘ଏ’ରୁ ତଳକୁ ଖସି ‘ବି ପ୍ଲସ୍ ପ୍ଲସ୍’ରେ ମାନ୍ୟତା ରହିଲା । ତେବେ ନାକ୍ ଦଳ ପାଠପଢ଼ାକୁ ପ୍ରଶଂସା କରଥିବା ବେଳେ ବିଶ୍ୱବିଦ୍ୟାଳୟ ହିସାବରେ ଥିବା ଭିତ୍ତିଭୂମି ଓ ଗବେଷଣାକୁ ମୁହଁ ମୋଡ଼ିଛନ୍ତି । ଅନ୍ୟପକ୍ଷରେ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ କିନ୍ତୁ ‘ବି ପ୍ଲସ୍ ପ୍ଲସ୍’ ମାନ୍ୟତାରେ ଢେର ଖୁସ୍ ।
ରମାଦେବୀ ମହିଳା ବିଶ୍ୱବିଦ୍ୟାଳୟକୁ ପ୍ରଥମ ନ୍ୟାସନାଲ ଆସେସ୍ମେଣ୍ଟ ଆଣ୍ଡ ଆକ୍ରିଡେସନ୍ କାଉନସିଲ୍(ନାକ୍)ର ମାନ୍ୟତା ମିଳିଛି । ପ୍ରଥମ ପର୍ଯ୍ୟାୟ ନାକ୍ ପରିଦର୍ଶନରେ ନାକ୍ ଟିମ୍ ବିଶ୍ୱବିଦ୍ୟାଳୟକୁ ୨.୮୭ ସିଜିପିଏ ପ୍ରଦାନ କରି ‘ବି ପ୍ଲସ୍ ପ୍ଲସ୍’ ଗ୍ରେଡ୍ ମାନ୍ୟତା ଦେଇଛନ୍ତି। ନାକ୍ ଟିମ୍ ତାଙ୍କ ରିପୋର୍ଟରେ ବିଶ୍ୱବିଦ୍ୟାଳୟର ପାଠପଢ଼ାକୁ ପ୍ରଶଂସା କରିଛନ୍ତି । ହେଲେ ଭିତ୍ତିଭୂମି, ନୈରାଶ୍ୟଜନକ ଗବେଷଣା ପତ୍ର ପ୍ରକାଶନ, ଆବଶ୍ୟକୀୟ ସ୍ଥାୟୀ ଅଧ୍ୟାପକ ଓ ଅଣଅଧ୍ୟାପକ ନିଯୁକ୍ତି, ଅନ୍ତର୍ଜାତୀୟ ଶିକ୍ଷାର୍ଥୀ ନଥିବାରୁ ଏହା ନାକ ଟିମକୁ ଖୁସି କରିପାରିନାହିଁ ।
ନାକ୍ ୱେବ୍ସାଇଟ୍ରେ ରମାଦେବୀର ନାକ୍ ରିପୋର୍ଟ ଅପଲୋଡ୍ ହୋଇଥିଲା । ତେବେ ଅପଲୋଡ୍ର କିଛି ସମୟ ପରେ ଏହାକୁ ଉଡାଇ ଦିଆଯାଇଛି । ଏହା ସନ୍ଦେହ ବଢ଼ାଇଛି । ବିଶ୍ୱବିଦ୍ୟାଳୟ କୁଳପତି ପ୍ରଫେସର ଅପରାଜିତା ଚୌଧୁରୀ କହିଛନ୍ତି, ପ୍ରଥମ ସାଇକେଲ୍ରେ ବିଶ୍ୱବିଦ୍ୟାଳୟକୁ ବି ପ୍ଲସ୍ ପ୍ଲସ୍ ମିଳିଛି, ଯାହା ସନ୍ତୋଷଜନକ । କମ୍ ଭିତ୍ତିଭୂମି ଭିତରେ ଆମେ ଭଲ ରେଜଲ୍ଟ କରିଛୁ । ଆଗାମୀ ଦିନରେ ବିଶ୍ୱବିଦ୍ୟାଳୟ ନାକ୍ ମାନ୍ୟତା ଭଲ କରିବ ।
ତେବେ ନାକ ଟିମ ପରାମର୍ଶରେ ଦର୍ଶାଇଛନ୍ତି, ବିଶ୍ୱବିଦ୍ୟାଳୟର ଭିତ୍ତିଭୂମିର ବିକାଶ ପାଇଁ ପରିସୀମା ବୃଦ୍ଧି କରିବା ଆବଶ୍ୟକ । ସ୍ଥାୟୀ ଅଧ୍ୟାପକ ଓ ଅଣଅଧ୍ୟାପକ ପଦବି ପୂରଣ । ଅନ୍ତର୍ଜାତୀୟସ୍ତରର ଶିକ୍ଷାର୍ଥୀଙ୍କୁ ଆକୃଷ୍ଟ କରିବାକୁ ପଡ଼ିବ । ରାଜସ୍ୱ ଆଦାୟ ପାଇଁ ଉତ୍ସ ସୃଷ୍ଟି କରିବାକୁ ପଡ଼ିବ।
