ଭୁବନେଶ୍ୱର,୦୮/୧୦: ଭୁବନେଶ୍ୱର ବଜାରରେ ଏବେ ନଡ଼ିଆ ଗୋଟାକ ୪୦ରୁ ୫୦ ଟଙ୍କା । ୧ ନମ୍ବର ମାର୍କେଟରୁ ନେଇ ସିଆର୍ପି, ଖଣ୍ଡଗିରିରୁ ନେଇ ରସୁଲଗଡ଼ ସବୁଠି ନଡ଼ିଆ ଦାମ୍ ଚଢ଼ା । ମୂଲଚାଲ ବି ନାହିଁ । ଯାହା କହୁଛନ୍ତି, ସେତିକିରେ କିଣିବାକୁ ବେପାରୀ ବାଧ୍ୟ କରୁଛନ୍ତି । ବର୍ତ୍ତମାନ ପୂଜା ସମୟରେ ଶ୍ରଦ୍ଧାଳୁମାନେ ଅଧିକ ନଡ଼ିଆ କିଣୁଛନ୍ତି । ହେଲେ ଦର ଯାହା ନଡ଼ିଆ କିଣିବାକୁ ପ୍ରଥମେ ଭାବିବାକୁ ପଡ଼ୁଛି । ଛୋଟ ନଡ଼ିଆ ଖୋଜିଲେ ବି ମିଳୁନି । ଯାହାକୁ ଦେଖିଲେ ସବୁ ମଧ୍ୟମ ନଚେତ୍ ବଡ଼ ଆକାରର । ଏବେ ରାଜଧାନୀରେ ଯେଉଁ ନଡ଼ିଆ ବିକ୍ରି ହେଉଛି ତାହା ଓଡ଼ିଶାର ନୁହେଁ, ଦକ୍ଷିଣ ଭାରତର ତାମିଲନାଡ଼ୁ, କେରଳ ଓ ଆନ୍ଧ୍ରପ୍ରଦେଶରୁ ଆସୁଛି । ସେଥିପାଇଁ ନଡ଼ିଆର ଦର ଉଚ୍ଚା ରହୁଥିବା କୁହାଯାଉଛି ।
ବିଶେଷକରି ପୁରୀ ଜିଲ୍ଲା ସାକ୍ଷୀଗୋପାଳ ଓ ଆଖପାଖ ଅଞ୍ଚଳରୁ ୮୦ ପ୍ରତିଶତ ନଡ଼ିଆ ଭୁବନେଶ୍ୱର ସମେତ କଟକ ଓ ଆଖପାଖ ଅଞ୍ଚଳକୁ ଆସୁଥିଲା । ହେଲେ ୨୦୧୯ରେ ଉପକୂଳ ଓଡ଼ିଶାକୁ ଦୋହଲାଇ ଦେଇଥିବା ଫନି ବାତ୍ୟା ପରଠୁ ଏଠାକାର ନଡ଼ିଆ ଭୁବନେଶ୍ୱରକୁ ଆସୁନି ବୋଲି ବ୍ୟବସାୟୀମାନେ କହିଛନ୍ତି । ସେଥିପାଇଁ ବଜାରରେ ଓଡ଼ିଶା ନଡ଼ିଆ ଅଭାବ ପଡ଼ୁଛି ଏବଂ ଦକ୍ଷିଣ ଭାରତୀୟ ନଡ଼ିଆର ଚାହିଦା ବଢ଼ିଯାଇଛି । ପୂର୍ବରୁ ଓଡ଼ିଶା ନଡ଼ିଆର ଦାମ୍ ୧୫ରୁ ୨୦ ଓ ସର୍ବାଧିକ ୨୫ ଟଙ୍କା ଥିଲା । ହେଲେ ଏବେ ବାହାର ନଡ଼ିଆ ଦାମ ବହୁ ଅଧିକ ।
ଓଡ଼ିଶା କୃଷି ବୈଷୟିକ ବିଶ୍ୱବିଦ୍ୟାଳୟର ଏକ ଗବେଷଣା କହୁଛି, ଓଡ଼ିଶାକୁ ପ୍ରତିବର୍ଷ ୪୬ କୋଟି ନଡ଼ିଆ ଦରକାର । ହେଲେ ଏବେ ମାତ୍ର ୩୯ କୋଟି ନଡ଼ିଆ ଉତ୍ପାଦନ ହେଉଛି । ନଡ଼ିଆ ଉନ୍ନୟନ ବୋର୍ଡର ତଥ୍ୟ ଅନୁସାରେ, ମହାବାତ୍ୟାରେ ଉପକୂଳ ଓଡ଼ିଶାରେ ଥିବା ନଡ଼ିଆ ଗଛ କ୍ଷତିଗ୍ରସ୍ତ ହୋଇଥିଲା । ବାତ୍ୟା ପରେ ପୁରୀ, ଗଞ୍ଜାମ, କଟକ, ନୟାଗଡ଼ ଓ ଖୋର୍ଦ୍ଧା ଆଦି ଉପକୂଳ ଜିଲ୍ଲାରେ ୨୦୦୦-୦୧ରେ ୧୭.୭୦ ହେକ୍ଟର ଜମିରେ ନଡ଼ିଆ ଚାଷ ହେଉଥିଲା । ଯେଉଁଠି ହେକ୍ଟର ପିଛା ୬୨୦୯ ନଡ଼ିଆ ଉତ୍ପାଦନ ହେଉଥିଲା । ୨୦୦୪-୦୫ ବେଳକୁ ୫୦.୫୦ ହେକ୍ଟର ଜମିରେ ନଡ଼ିଆ ଚାଷ ହେଲା । ଯେଉଁଠି ଗୋଟିଏ ହେକ୍ଟରରୁ ମାତ୍ର ୫୪୪୨ ନଡ଼ିଆ ଉତ୍ପାଦନ ହେଉଥିଲା । ୨୦୦୯- ୧୦ରେ ୫୧ ହେକ୍ଟର ଜମିରେ ନଡ଼ିଆ ଚାଷ ହେଉଥିବା ବେଳେ ପ୍ରତି ହେକ୍ଟରରୁ ୫୮୨୪ ନଡ଼ିଆ ଫଳୁଥିଲା । ପୁଣି ଫନି ବାତ୍ୟା ପୂର୍ବରୁ ୨୦୧୮-୧୯ରେ ୪୬.୬୭ ହେକ୍ଟର ଜମିରେ ନଡ଼ିଆ ଚାଷରୁ ଉତ୍ପାଦନ ହେଉଥିଲା । ଏଠି ପ୍ରତି ହେକ୍ଟରରୁ ୬୧୩୨ ନଡ଼ିଆ ଆସୁଥିଲା । ହେଲେ ବାତ୍ୟାରେ ୧୪ଲକ୍ଷ ନଡ଼ିଆ ଗଛ ଭାଙ୍ଗି ପଡ଼ିଥିଲା । ବାତ୍ୟା ପରେ ୨୦୨୨- ୨୩ରେ ୫୨.୮୪ ହେକ୍ଟରରେ ଚାଷ ହେଉଥିବା ବେଳେ ଗୋଟିଏ ହେକ୍ଟର ପିଛା ୭୫୨୮ ନଡ଼ିଆ ଉତ୍ପାଦନ ହେଉଛି ।
ଉପକୂଳ ଅଞ୍ଚଳରୁ ନଡ଼ିଆ କୋଲକାତା ମଧ୍ୟ ଯାଉଛି । ଅପରପକ୍ଷେ, ୨୦୨୨- ୨୦୨୩ରେ ପଡ଼ୋଶୀ ଆନ୍ଧ୍ର ପ୍ରଦେଶରେ ପ୍ରତି ହେକ୍ଟରରୁ ରେକର୍ଡ ସଂଖ୍ୟକ ୧୫୯୬୪, କେରଳରେ ପ୍ରତି ହେକ୍ଟରରେ ୭୪୦୨ ଓ ତାମିଲନାଡ଼ୁରେ ୧୧୪୬୯ଟି ନଡ଼ିଆ ଫଳୁଛି । ପଡ଼ୋଶୀ ରାଜ୍ୟର ପଇଡ଼ ପାଣି ମିଠା ହୋଇଥିବାରୁ ଏହାର ଚାହିଦା ମଧ୍ୟ ରହିଛି । ସେଦୃଷ୍ଟିରୁ ନଡ଼ିଆ ବେପାରୀମାନେ ଉଭୟ ନଡ଼ିଆ ଓ ପଇଡ଼ ଆଣୁଛନ୍ତି । ପଇଡ଼ ଭଳି ପ୍ରତିଦିନ ଗୋଟିଏ ଟ୍ରିପ୍ ନଡ଼ିଆ ଭୁବନେଶ୍ୱରକୁ ଆସୁଛି । ଯେଉଁଥିରେ ୨ରୁ ଅଢ଼େଇ ହଜାର ନଡ଼ିଆ ରହୁଛି ବୋଲି ବ୍ୟବସାୟୀମାନେ କହିଛନ୍ତି ।
‘କୋଣାର୍କ’ ହାଇବ୍ରିଡ୍ ପ୍ରଜାତି ନଡ଼ିଆ ଫଳାଇବ ଓୟୁଏଟି
ରାଜ୍ୟରେ ନଡ଼ିଆ ଉତ୍ପାଦନ ବୃଦ୍ଧି ପାଇଁ ଓଡ଼ିଶା କୃଷି ବୈଷୟିକ ବିଶ୍ୱବିଦ୍ୟାଳୟ ଯୋଜନା କରିଆସୁଛି । ‘ସର୍ବଭାରତୀୟ ନାରିକେଳ ଗବେଷଣା ପ୍ରକଳ୍ପ’ ରେ ନଡ଼ିଆ ଚାଷ ହେଉଛି । ଏଥିରେ କେନ୍ଦ୍ର ସରକାରଙ୍କ ୭୫ ଭାଗ ଓ ରାଜ୍ୟର ୨୫ ଭାଗ ଅନୁଦାନ ଖର୍ଚ୍ଚ ହେଉଛି । ଓୟୁଏଟି ପଛପଟେ ବିମାନବନ୍ଦରକୁ ଲାଗି ଗୋଟିଏ ଫାର୍ମ ଥିବା ବେଳେ କୋଣାର୍କରେ ବି ଫାର୍ମ ଅଛି । ଫାର୍ମରେ ହାଇବ୍ରିଡ୍ ପ୍ରଜାତିର ନଡ଼ିଆ ଗଛ ଉପରେ ପରୀକ୍ଷା କରାଯାଉଛି । ଓଡ଼ିଶା ମାଟିକୁ ସୁହାଇବ ସେ ଗଛ ଉପରେ ଧ୍ୟାନ ଦିଆଯାଉଛି । ଚଳିତ ବର୍ଷ ‘କୋଣାର୍କ’ ନାମକ ଏକ ହାଇବ୍ରିଡ୍ ପ୍ରଜାତିକୁ ସୃଷ୍ଟି କରାଯାଇଛି । ଏହି ନଡ଼ିଆ ଆକାରରେ ବଡ଼ ଏବଂ ସୁସ୍ୱାଦୁ ମଧ୍ୟ । ବର୍ଷକୁ ଗଛରେ ୧୦୦ରୁ ୧୫୦ଟି ନଡ଼ିଆ ଫଳିବ । ଏହାବାଦ୍ ଏବେ ଆମେ ୨୪ରୁ ଅଧିକ ହାଇବ୍ରିଡ୍, ୨୨ରୁ ଅଧିକ ପ୍ରଜାତି ସମେତ ଡ୍ୱାଫ୍ର୍(ବାମନ ଗଛ) ଉପରେ ଗବେଷଣା କରୁଛୁ । ସେହିପରି ସାକ୍ଷୀଗୋପାଳରେ ମଧ୍ୟ ଏକ ଫାର୍ମ କରାଯିବ ବୋଲି କୁଳପତି ପ୍ରଫେସର ପ୍ରଭାତ କୁମାର ରାଉଳ କହିଛନ୍ତି ।
